بيىل 162 مىڭ تالاپكەر ۇلتتىق بىرىڭعاي تەستىلەۋدى تاپسىردى. ونىڭ ىشىندە تۇلەكتەردىڭ 76,16%-عا جۋىعى قازاق تىلىندە, 24,74%-ى ورىس تىلىندە, 0,1%-ى اعىلشىن تىلىندە تەستىلەۋدەن ءوتتى, دەپ حابارلايدى Egemen.kz قر عىلىم جانە جوعارى ءبىلىم مينيسترلىگىنە سىلتەمە جاساپ.
بيىل مەكتەپ تۇلەكتەرى نەگىزگى ۇبت-نى ەكى رەت تاپسىرىپ, ەڭ ۇزدىك ناتيجەمەن گرانت كونكۋرسىنا قاتىسا الادى. وسىلايشا 162 مىڭ تالاپكەر ۇبت-نى 291 مىڭ رەت تاپسىردى.
«تەستىلەۋ قورىتىندىسى بويىنشا 135 مىڭعا جۋىق تالاپكەر شەكتى بالل جينادى, بۇل قاتىسۋشىلاردىڭ جالپى سانىنىڭ شامامەن 83%-ىن قۇرايدى. بۇل كورسەتكىشتەر وتكەن جىلمەن سالىستىرعاندا 16%-عا ارتقان (2022 جىلى – 67%). ۇبت ورتاشا بالى وتكەن جىلعى كورسەتكىشتەن 7 بالعا ارتىپ, 73 بالدى قۇرادى (2022 جىلى – 66 بالل). بەس ادام ەڭ جوعارى كورسەتكىش كورسەتىپ, 137 بالل جينادى. 2868 وقۋعا ءتۇسۋشى 120 بالدان جوعارى ناتيجەگە قول جەتكىزدى», دەپ ءتۇسىندىردى قر عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ.
تەستىلەۋ بەس ءپان بويىنشا وتكىزىلدى, ولاردىڭ ۇشەۋى - مىندەتتى جانە ەكەۋى - بەيىندى. تەست تاپسىرمالارىنىڭ سانى 120, ونىڭ ىشىندە قازاقستان تاريحى بويىنشا – 20, ماتەماتيكالىق ساۋاتتىلىق بويىنشا – 15, وقۋ ساۋاتتىلىعى بويىنشا – 15 جانە ەكى بەيىندىك ءپان بويىنشا – 35 تاپسىرما. تەستىلەۋ ۇزاقتىعى – 4 ساعات (240 مينۋت).
سونداي-اق ەرەكشە ءبىلىم بەرۋ قاجەتتىلىكتەرى بار تالاپكەرلەر ءۇشىن قوسىمشا 40 مينۋت ۋاقىت ساقتالدى. بيىل وسىنداي 478 بالا ۇبت تاپسىردى.
بيىل اپەللياتسياعا 50 مىڭنان استام ءوتىنىش بەرىلدى, ولاردىڭ ىشىندە 805 ءوتىنىش قاناعاتتاندىرىلدى. مەملەكەتتىك كوميسسيا جۇمىسىن اياقتادى, تالاپكەرلەردىڭ سەرتيفيكاتتارى جەكە كابينەتتە قولجەتىمدى.
ۇبت وتكىزۋ بارىسىندا 402 تالاپكەر سمارتفون, شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 312 ادام شىعارىلىپ, ولاردىڭ ناتيجەلەرى جويىلدى. كەيبىر تەستىلەنۋشىلەردەن جاسىرىن كامەرالار, ميكروقۇلاققاپتار, سمارتفوندار جانە باسقا دا تىيىم سالىنعان زاتتار تابىلدى. بوگدە تۇلعالار انىقتالعان جوق.
جالپى, نەگىزگى ۇبت-2023 شتاتتى رەجيمدە ءوتتى.