ارايلى استانا قالاسىنىڭ 25 جىلدىعىنا وراي قوناەۆ قالاسىندا اشىق سۋدا جۇزۋدەن «Oceanman Kazakhstan – 2023» حالىقارالىق جارىسى ءوتتى. بۇل بايراقتى باسەكەگە مادەنيەت جانە سپورت مينيسترلىگى, الماتى وبلىسى دەنە شىنىقتىرۋ جانە سپورت باسقارماسى, الماتى وبلىستىق بۇقارالىق-سپورتتىق شارالاردى وتكىزۋ ورتالىعى, «Kazakh Tourism» ۇلتتىق كومپانياسى مەن «Oceanman Kazakhstan» قوعامدىق قورى ۇيىتقى بولدى.
جارىستىڭ اشىلۋ سالتاناتىندا مادەنيەت جانە سپورت ءمينيسترى اسحات ورالوۆ, الماتى وبلىسىنىڭ اكىمى مارات سۇلتانعازيەۆ, وبلىستىق دەنە شىنىقتىرۋ جانە سپورت باسقارماسىنىڭ باسشىسى نۇرباقىت تەڭىزباەۆ, وليمپيادا چەمپيونى دميتري بالاندين جارىسقا قاتىسۋشىلاردى مەرەكەمەن قۇتتىقتاپ, ۇزدىك ونەر كورسەتۋلەرىنە تىلەكتەستىكتەرىن ءبىلدىردى.
– بۇل حالىقارالىق جارىس ەلىمىزدە وسىمەن ەكىنشى رەت وتكىزىلىپ وتىر. بىلتىر قاپشاعاي جاعالاۋىندا 3 مىڭ قوناق جينالىپ, ءدۇبىرلى دودا وتكەن ەدى. اتى الەمگە ايگىلى Oceanman سايىسى 15 مەملەكەتتە, اتاپ ايتساق, يسپانيا, يتاليا, گرەتسيا, مەكسيكا, رەسەي, مالايزيا, شۆەيتساريا, ۋكراينا, اراب بىرىككەن امىرلىگى, كولۋمبيا, تۇركيا, كيپر, فرانتسيا, رۋمىنيا, تايلاندتا تۇراقتى وتكىزىلەتىندىگىن اتاپ ايتا كەتكەن ءجون. ەلىمىزدە ءوتىپ جاتقان بيىلعى شاراعا قاتىسۋشىلارعا ىستىق ىقىلاسىمىزدى بىلدىرەمىز. «Oceanman Kazakhstan» سىندى بەدەلدى جارىستى جاڭادان گۇلدەنىپ كەلە جاتقان قوناەۆ قالاسىندا وتكىزۋ ءبىز ءۇشىن ۇلكەن مارتەبە.
الماتى وبلىسى قازاقستانداعى سپورتتىق بەلسەندى ايماق دەپ ايتۋعا تولىق نەگىز بار. 2022 جىلى وڭىرىمىزدە 500-دەن اسا حالىقارالىق جانە رەسپۋبليكالىق دەڭگەيدە سپورتتىق شارا وتكىزىلگەن. سپورتتىق سايىستاردىڭ تۋريزم دامۋىنا قوسار ۇلەسى زور. جاعاجاي جانە سۋ سپورتى تۇرلەرىنىڭ استاناسىنا اينالۋدى كوزدەيتىن قوناەۆ قالاسى مەن الماتى وبلىسى جايىندا كوپتەگەن شەتەلدىكتەر قىزىعۋشىلىق تانىتىپ, وسى شۇرايلى مەكەنگە ساياحاتتاۋىنا سەبەپ بولۋدا, دەدى جارىستىڭ اشىلۋ سالتاناتىندا ءسوز العان ءوڭىر باسشىسى مارات ەلەۋسىز ۇلى.
بيىل حالىقارالىق جارىستىڭ گەوگرافياسى كەڭەيدى. بەدەلدى باسەكەگە 7 مەن 70 جاس ارالاعىنداعى 8 جاس دارەجەسىندەگى سپورتشىلار قاتىسۋدا. ولاردىڭ قاتارىندا رەسەي, قىرعىزستان, يتاليا, وزبەكستان, اقش, يسپانيا, گرۋزيا, يزرايل, ءۇندىستان, ءباا, بەلارۋس, كولۋمبيا, گەرمانيا, ساۋد ارابياسى, ۋكراينا, پاكىستان, كاتار, رۋمىنيا, تايلاند جانە قازاقستان بار, بارلىعى 1 800 ادامنان استام سۋدا ءجۇزۋ شەبەرلەرى باق سىناستى.
Oceanman – بۇل الەمنىڭ تۇكپىر-تۇكپىرىندە جىلىنا بىرنەشە رەت وتەتىن تۋرنير. ونىڭ تۇساۋى 2015 جىلى يسپانيادا كەسىلگەن. ودان كەيىن الەمنىڭ ەڭ كورىكتى جەرلەرىندە جالعاسىپ كەلەدى.
الماتى وبلىسى