قر پرەمەر-ءمينيسترى ءاليحان سمايىلوۆ توتەنشە جاعدايلار ءمينيسترى سىرىم ءشارىپحانوۆتىڭ رەسپۋبليكامىزدىڭ بىرقاتار وڭىرىندە اۋا تەمپەراتۋراسىنىڭ كوتەرىلۋىنە بايلانىستى قابىلدانىپ جاتقان شارالار تۋرالى بايانداماسىن تىڭدادى, دەپ حابارلايدى Egemen.kz.
ءمينيستردىڭ ايتۋىنشا, اۋا رايىنا بايلانىستى ازاماتتىق قورعاۋ ورگاندارى جوعارى دايىندىق رەجيمىنە كوشتى.
«ۇكىمەت باسشىسى تجم-گە وبلىس اكىمدىكتەرىمەن بىرلەسىپ شتاتتان تىس جاعدايلارعا, ونىڭ ىشىندە تابيعي ورتكە جانە ادامداردىڭ سۋداعى قاۋىپسىزدىگىنە تولىق دايىندىقتى قامتاماسىز ەتۋ ءۇشىن قاجەتتى كۇشتەر مەن تەحنيكالىق قۇرالداردى جۇمىلدىرۋدى تاپسىردى», دەلىنگەن ۇكىمەت تاراتقان حابارلامادا.
ايتا كەتەيىك, ەلىمىزدە الداعى ءۇش كۇندە 43 گرادۋس ىستىق بولىپ, جاڭبىر جاۋادى.
وسىعان بايلانىستى قر تجم ازاماتتىق قورعاۋ ورگاندارى اۋا رايىنىڭ بولجامدى جاعدايلارىنا بايلانىستى جوعارى دايىندىق رەجيمىنە اۋىستىرىلعانىن حابارلاعان ەدى.