قر پرەمەر-ءمينيسترى ءاليحان سمايىلوۆ ماڭعىستاۋ اتوم ەنەرگەتيكالىق كومبيناتىندا (ماەك) جوندەۋ-قالپىنا كەلتىرۋ جۇمىستارىنىڭ بارىسىن تەكسەرۋ ءۇشىن اقتاۋعا جۇمىس ساپارىمەن باردى. وندا 3 شىلدە كۇنى اپاتتىق جاعدايدا №1 ەنەرگەتيكالىق بلوكتىڭ جۇمىسى توقتاپ قالعان ەدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ماەك اقتاۋ قالاسىنىڭ جانە ماڭعىستاۋ وبلىسىنىڭ باسقا دا ەلدى مەكەندەرىنىڭ تۇرعىندارىن ەلەكتر جانە جىلۋ ەنەرگياسىمەن قامتاماسىز ەتەدى. سونداي-اق كاسىپورىننىڭ تۇششىلاندىرۋ كەشەنى اۋىز سۋ, ىستىق جانە تەحنيكالىق سۋ بەرەدى.
ماەك-ءتىڭ نەگىزگى ەنەرگەتيكالىق جابدىقتارى وتكەن عاسىردىڭ 60-90-شى جىلدارى پايدالانۋعا بەرىلگەن, ونىڭ توزۋ دەڭگەيى بۇگىنگى كۇنى 80%-دان اسادى. وسىعان بايلانىستى مەملەكەت باسشىسى كاسىپورىندى جاڭعىرتۋ تۋرالى تاپسىرما بەرگەن بولاتىن. اتالعان جۇمىس اياسىندا اكىمدىك رەزەرۆىنەن ەلەكتر ستانتسياسىنىڭ ابدەن توزعان جابدىقتارىن, تۇششىلاندىرۋ قوندىرعىلارىنىڭ سورعى جابدىقتارىن جانە ت. ب. اۋىستىرۋعا 2,6 ملرد تەڭگە ءبولىندى.
كومبيناتتى ارالاۋ بارىسىندا ءاليحان سمايىلوۆ ماڭعىستاۋ وبلىسىنىڭ اكىمى نۇرلان نوعاەۆ پەن «ماەك» جشس باس ديرەكتورى جاسۇلان سۇيىنشاليەۆتىڭ جەس-تەگى قازىرگى احۋال تۋرالى, سونداي-اق بولعان اپاتتىڭ سالدارىن جويۋ بويىنشا جۇرگىزىلىپ جاتقان جۇمىستار تۋرالى باياندامالارىن تىڭدادى. جوندەۋ جۇمىستارى كەستە بويىنشا جۇرگىزىلىپ جاتقانى اتاپ ءوتىلدى, 7 شىلدەدە ەنەرگيا بلوگىن تولىق جۇمىس رەجيمىنە شىعارۋ جوسپارلانىپ وتىر.
پرەمەر-مينيستر ماەك-ءتىڭ ەنەرگەتيكالىق جابدىقتارىنىڭ توزۋىنان جابدىقتار ءجيى ىستەن شىعىپ, اپاتتى جاعدايلارعا اكەلەتىنىن اتاپ ءوتتى. 3 شىلدەدە №1 ەنەرگوبلوكتىڭ توقتاپ قالۋى سالدارىنان ماڭعىستاۋ جانە اتىراۋ وبلىستارىنداعى نىساندار جارىقسىز قالدى.
«ۇكىمەت ەنەرگەتيكالىق جابدىقتاردى جاڭعىرتۋ ءۇشىن 4,9 ملرد تەڭگە ءبولۋ تۋرالى شەشىم قابىلدادى. بۇل كاسىپورىن جۇمىسىنىڭ تۇراقتىلىعىن ارتتىرادى. اكىمدىك بارلىق ونەركاسىپ كاسىپورىندارىنىڭ جۇمىسىن تەز ارادا قالپىنا كەلتىرۋى قاجەت», دەدى ءاليحان سمايىلوۆ.