استانادا جۋرناليستەر ساياباعى اشىلعاننان كەيىن ءسان-سالتاناتى كەلىسكەن الاڭدا ىلە-شالا العاشقى ءىس-شارا دا ءوتىپ ۇلگەردى. اتاپ ايتقاندا, «قازاق گازەتتەرى» جشس قىزمەتكەرلەرىنە كاسىبي مەرەكە – باق قىزمەتكەرلەرى كۇنى قارساڭىندا تاعايىندالعان ماراپاتتاردى تابىستاۋ سالتاناتى ءوتتى.
«سىزدەر حالىق پەن بيلىك اراسىندا دانەكەر بولىپ, ەلدىڭ جۇگىن ارقالاپ جۇرسىزدەر. الداعى ۋاقىتتا دا تەك جەمىستى ەڭبەك ەتىپ, اقيقاتتىڭ جارشىسى بولا بەرىڭىزدەر», دەگەن سەرىكتەستىكتىڭ باس ديرەكتورى ديحان قامزابەك ۇلى اقپارات جانە قوعامدىق دامۋ مينيسترلىگىنىڭ «اقپارات سالاسىنىڭ ۇزدىگى» توسبەلگىسىن باس ديرەكتوردىڭ ءبىرىنشى ورىنباسارى ۆلاديمير كۋرياتوۆقا, «Egemen Qazaqstan» گازەتىنىڭ اعا ءتىلشىسى ازامات ەسەنجولعا جانە رەداكتسيا قىزمەتكەرى باقىتجامال قايىپجانوۆاعا تابىستادى.
سونىمەن قاتار, «Egemen Qazaqstan» گازەتىنىڭ سولتۇستىك قازاقستان وبلىسىنداعى مەنشىكتى ءتىلشىسى جاقسىباي سامرات اقپارات جانە قوعامدىق دامۋ مينيسترلىگىنىڭ «ەڭبەك ارداگەرى» مەدالىمەن ماراپاتتالسا, باس رەداكتوردىڭ ورىنباسارى بانۋ ادىلجانعا پرەزيدەنتتىڭ العىس حاتى تابىس ەتىلدى.
بۇدان بولەك, اقپارات جانە قوعامدىق دامۋ ءمينيسترىنىڭ قۇرمەت گراموتاسىمەن دۇيسەنالى الىماقىن, اسەم ناسيموۆا, پەريزات نۇربەكوۆا, اقپارات جانە قوعامدىق دامۋ ءمينيسترىنىڭ العىس حاتىمەن باۋىرجان كارسۇلتانوۆ, اينۇر بەيبىتحان ماراپاتتالدى. «Egemen Qazaqstan» گازەتىنىڭ ءتىلشىسى ەسكەندىر زۇلقارنايعا ىشكى ىستەر مينيسترلىگىنىڭ گراموتاسى بەرىلدى. سونىمەن قاتار مەرەكەگە وراي ۇيىمداستىرىلعان سپورتتىق جارىستاردا جەڭىمپاز جانە جۇلدەگەر اتانعان رەداكتسيا قىزمەتكەرلەرى ماقتاۋ قاعازدارىمەن ماراپاتتالدى.