پرەزيدەنت قاسىم-جومارت توقاەۆ دۇنيەجۇزى حالقىنىڭ 45 پايىزىن قامتيتىن شىۇ كەڭىستىگى ءالى تولىق پايدالانىلماعان الىپ تۋريستىك نارىق بولىپ سانالاتىنىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسى بىلتىردان باستاپ ءۇندىستان, يران جانە قىتاي ازاماتتارى ءۇشىن ۆيزاسىز رەجيم ەنگىزىلگەنىن ەسكە سالىپ, بۇل شارا شىۇ مەملەكەتتەرى اراسىنداعى ءتۋريزمدى دامىتۋعا ىقپال ەتكەنىن تىلگە تيەك ەتتى. وسى تۇستا پرەزيدەنت قازاقستاننىڭ شىۇ-عا توراعالىق ەتۋ كەزەڭىندە الماتى قالاسىن شانحاي ىنتىماقتاستىق ۇيىمىنىڭ تۋريستىك جانە مادەني استاناسى دەپ جاريالاۋدى ۇسىندى.
«شىۇ-نىڭ كەڭ بايتاق كەڭىستىگى – ەۋرازيالىق وركەنيەتتىڭ التىن بەسىگى. ال مادەنيەتتەردىڭ بىرتۇتاستىعىن ايشىقتايتىن بىرەگەي «شانحاي رۋحى» – ونىڭ باعا جەتپەس قۇندىلىعى. ورتاق يدەالدارىمىز بەن قۇندىلىقتارىمىزدى الەمگە دايەكتى تۇردە دارىپتەۋ ماڭىزدى. قازاق جەرى – ەجەلدەن وركەنيەتتەر توعىسقان, داستۇرلەر مەن مادەنيەتتەر بىتە قايناسقان مەكەن. ال بۇگىندە قازاقستان بارىمىزگە ورتاق, باي رۋحاني مۇرانى ساقتاۋ جانە ونى ناسيحاتتاۋ ىسىنە بارىنشا اتسالىسۋعا دايىن. وسىعان وراي «شىۇ-نىڭ كيەلى ورىندارى» جوباسىن قولعا الۋدى ۇسىنامىز. ۇلى ويشىل قوجا احمەت ياساۋي كەسەنەسى قازاقستانداعى الەمدىك ماڭىزى بار وسىنداي كيەلى ورىن سانالادى. شىۇ-نىڭ «التىن وردا جانە ونىڭ مۇراسى» اتتى كونفەرەنتسياسى اياسىندا وسى ورتاعاسىرلىق ساۋلەت ونەرىنىڭ ۇلى ەسكەرتكىشىنىڭ تانىستىرىلىمىن قاسيەتتى تۇركىستان شاھارىندا وتكىزۋدى جوسپارلاپ وتىرمىز. مۇنداي اۋقىمدى شارا ەلدەرىمىز اراسىندا اناعۇرلىم تىعىز گۋمانيتارلىق بايلانىستار ورناتۋعا ىقپال ەتەتىنىنە سەنىمدىمىن», دەدى قاسىم-جومارت توقاەۆ.