ءۇيىرلى شەگىرتكە ەگىستىكتى وتاپ جاتىر

جانگەلدين اۋدانىنداعى «الماس» شارۋا قوجالىعىنىڭ باسشىسى قايرات رايىسوۆتىڭ ايتۋىنشا, كيىكتەر قوجالىققا قاراستى القاپقا جازداي دامىل بەرمەگەن.

– بيىل جاعدايىمىز اسا اۋىر بولىپ تۇر. سەبەبى جازداي ەگىنىمىزدى كيىك جەپ, كيىكتەن قورعانىپ جۇرگەندە, شەگىرتكە قاپتاپ كەلىپ ەگىننىڭ دىمىن قالدىرماي جەپ قويدى. ءبىز التى شارۋا قوجالىعى بىرىگىپ 10 مىڭ 500 گەكتار جەرگە ەگىن سەپكەنبىز. سونىڭ ءبارى شەگىرتكەگە جەم بولدى. شەگىرتكە كەشە تۇسكە تامان كىرگەن. بۇگىن ءبىر اگرەگات كومەككە كەلدى. ونىڭ ءوزىنىڭ شاشاتىن ۋى جوق. ار جاعىمىزدا تۇرعان ۇشاقتىڭ ۇشاتىن كەروسينى جوق. وسىلايشا, ەگىنىمىز تىپ-تيپىل بولدى.  بۇل اڭگىمە شەگىرتكە كىرگەن مەزەتتەن باستاپ ءبىراز جەرگە ايتىلدى. بىراق قوزعالعان ءبىر جان جوق. وسى كيىك پەن شەگىرتكەدەن قورعانامىز دەپ ءشوپ تە شابا الماي وتىرمىز. شاباتىن ءشوپ تە جوق, كيىك جەپ ءبىتىردى. 200-گە تارتا مال باسى بار ەدى, قىستا قىرىپ الىپ جۇرەرمىز, تۇگەل ەتكە وتكىزەتىن شىعارمىز دەپ وتىرمىز, دەيدى اشىنعان شارۋا.  

اۋىل شارۋاشىلىعى مينيسترلىگىنە قاراستى مەملەكەتتىك ينسپەكتسيا كومي­تەتى قوستاناي وبلىستىق اۋماقتىق ينسپەك­تسياسىنىڭ مالىمەتىنشە, بۇگىنگە دەيىن وڭىردە 1 ملن 625 مىڭ گەكتار جەرگە زەرتتەۋ جۇمىستارى جۇرگىزىلىپ, ناتيجەسىندە, 445,174 مىڭ گەكتار القاپتى شەگىرتكە باسقانى انىقتالعان. «ونىڭ ىشىندە, 266,118 مىڭ گەكتار القاپتاعى شەگىرتكەنىڭ زيانكەستىكتىڭ ەكونوميكالىق شەگىنىڭ جوعارى ەكەندىگى انىقتالدى. جانگەلدين اۋدانىنداعى 241, 978 مىڭ گەكتار القاپتى ەكونوميكاعا جوعارى قاۋىپ توندىرەتىن ءۇيىرلى شەگىرتكە باسىپ قالعان. بۇگىنگە دەيىن جانگەلدين اۋدانىنداعى 226,043 مىڭ گەكتار, امانگەلدى اۋدانىنداعى 14,275 مىڭ گەكتار القاپقا شەگىرتكەگە قارسى ءدارى شاشىلدى. جانگەلدين اۋدانىنداعى ءۇيىرلى شەگىرتكەنىڭ ناۋىرزىم اۋدانىنا قاراستى ەگىن القاپتارىنا دا كوشكەنى تۋرالى مالىمەت تىركەلدى. الايدا ءۇيىرلى شەگىرتكە ەگىستىككە ايتارلىقتاي زيان تيگىزگەن جوق. قازىرگى ۋاقىتتا ءۇيىرلى شەگىرتكەنىڭ دەنى اۋىلشارۋاشىلىق القاپتارىن تاستاپ, جانگەلدين اۋدانىنداعى دالالىق ايماققا قاراي كوشتى», دەلىنگەن اۋماقتىق ينسپەكتسيادان كەلگەن حاتتا.   

اۋماقتىق ينسپەكتسيا شەگىرتكەگە قارسى ءىس-شارالاردىڭ كۇن سايىن اتقارىلىپ جاتقانى تۋرالى مالىمەت بەرىپ وتىر. الايدا جاۋىن-شاشىن, كۇشتى جەل, اپتاپ ىستىق كەدەرگى كەلتىرگەندىكتەن, حيميالىق وڭدەۋ جۇمىستارىن تيىسىنشە جۇرگىزۋگە مۇمكىندىك بولماي وتىر.

القاپتى حيميالىق وڭدەۋ جۇمىستارى ادەتتە +25 گرادۋستان تومەن تەمپەراتۋرادا, تاڭەرتەڭ نەمەسە كەشقۇرىم مەزگىلدە عانا جۇرگىزىلەدى ەكەن.   وعان جاۋاپتى ينسپەكتسيانىڭ مالىمەتىنشە, قازىر جانگەلدين مەن ناۋىرزىم اۋداندارىندا 6 جەردەن ءدارى شاشقىش, 2 ۇشاق, 5 گاز گەنەراتورى شەگىرتكەگە قارسى دارىلەۋ جۇمىستارىن اتقارىپ جاتىر. قاجەتتى تەحنيكالىق قۇرالدار مەن حيميالىق زاتتار دا جەتكىلىكتى كورىنەدى. ءۇيىرلى شەگىرتكەنىڭ شەكتەن تىس تارالىپ كەتۋ قاۋپىن جويۋدىڭ ناقتى شارالارى قابىلدانعان.

الايدا «الماس» شارۋا قوجالىعىنىڭ باسشىسى قايرات رايىسوۆ: «وسى شەگىرتكەگە قارسى ۋ شاشاتىن مەكەمە قىزمەتكەرلەرىنىڭ ۋى جوق, ۋى بولسا, اگرەگاتى جوق, اگرەگاتى بولسا, جانارمايى جوق. ءبىز قايدا بارىپ شاعىم ايتىپ, كىمنەن قولداۋ سۇرايتىنىمىزدى بىلمەي وتىرمىز. وسى جانگەلدين اۋدانىنداعى القاپتاردى ەكى جىلدان بەرى ۋلاپ جاتىر. سودان بەرى بۇكىل اۋدانعا قاراستى القاپتى ۋلاپ بىتەتىن ۋاقىت بولدى. بىلمەيمىن, بىزدە ءبىر جايباسارلىق بار. ەرىكسىز اۋماقتىق ينسپەكتسيا ماماندارى وزدەرىنە سەنىپ تاپسىرىلعان مىندەتتى دۇرىس اتقارىپ جاتقان جوق دەگەن كۇمان تۋا­دى. ولارعا مەملەكەت تاراپىنان شەگىرتكەگە قارسى ءدارى, جانارماي بولىنەدى. سول جانارماي مەن ءدارى ءتيىستى ماقساتقا جۇمسالماي, ورتا جولدا ساتىلىپ كەتتى مە دەگەن كۇمانىمىز بار. مەنىڭ وزىمە دە ءبىر-ەكى رەت كەلىپ, ارزان ۋ بار, الاسىڭدار ما دەپ ۇسىنىس جاساعان ادامدار دا بولعان. ونى ساتىپ الۋعا مەنىڭ ارىم جىبەرمەدى», دەيدى.

قوستاناي وبلىسى