قىزىلوردادا اقىن, جىراۋ ءجۇسىپ قادىربەرگەن ۇلىنىڭ 150 جىلدىعىنا ارنالعان «قارا ولەڭنىڭ شەبەرى – قاڭلى ءجۇسىپ» اتتى رەسپۋبليكالىق اقىندار ايتىسى ءوتتى. سىرداعى ءسوز سايىسىنا قىزىلجار, الماتى, تاراز, شىمكەنت, تۇركىستان, وڭىرلەرى مەن وبلىس اۋداندارىنان 12 اقىن قاتىستى.
ايماقتاعى اقىندىق مەكتەپتىڭ كورنەكتى وكىلىن ۇلىقتاۋعا ارنالعان ايتىستا وبلىس اكىمى نۇرلىبەك نالىباەۆ ءسوز شەبەرلەرىن قۇتتىقتاپ, ساتتىلىك تىلەدى. ءوڭىر مادەنيەتىن دامىتۋ باستامالارى جايىندا ايتىپ ءوتتى.
– بيىل وبلىس ورتالىعىنان 1000 ورىندىق ونەر ورتالىعىن ەل يگىلىگىنە تابىستايمىز. بۇل رۋحانيات سارايى تالاي تالانتتىڭ جولىن اشىپ, حالىق مۇراسىن جاڭعىرتاتىن ونەرلى ۇرپاقتىڭ جەتىلۋىنە قىزمەت ەتپەك. بيىلدان بەرى مادەنيەت جانە ادەبيەت وكىلدەرىنە وبلىس اكىمىنىڭ «تۇران» سىيلىعىن تاپسىرۋدى باستادىق. بۇل سىيلىق ادەبيەت پەن ونەر وكىلدەرىنىڭ شىعارماشىلىعىن شىڭداۋعا سەپتىگىن تيگىزەتىنىنە سەنىمدىمىن, – دەدى ايماق باسشىسى.
وبلىستا قارا ولەڭنىڭ شەبەرى اتانعان شايىر رۋحىن ۇلىقتاۋ شارالارى ءداستۇرلى تۇردە وتكىزىلىپ كەلەدى. وسىدان 10 جىل بۇرىن تۇعىرلى تۇلعانىڭ تۋعان جەرى سىرداريا اۋدانىندا 140 جىلدىق مەرەيتويىنا ارنالعان «سايراعان باقتا بۇلبۇلداي» اتتى مادەني شارا ۇيىمداستىرىلدى.
ءوز زامانىنداعى ساياسي-الەۋمەتتىك وقيعالاردى, قوعامداعى بولىپ جاتقان وزگەرىستەردى جىرعا قوسقان اقىننىڭ مۇراسىن زەرتتەپ, كەيىنگىگە تانىتۋدا قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى عابيت تۇياقباەۆتىڭ قوسىپ كەلە جاتقان ۇلەسى ۇلكەن.
جالپى, سىر بويىندا ونەر وكىلدەرىن قولداۋدىڭ ۇلگىلى ءۇردىسى بار. الدا جىل سايىن تۇراقتى تۇردە ءبىر مارتە رەسپۋبليكالىق الامان ايتىس ۇيىمداستىرۋ جولعا قويىلماق. كوپ ۇزاماي «ايتىس وليمپياداسى» اتتى وبلىستىق جاسوسپىرىمدەر ايتىسى وتكىزىلەدى.
قازاقستاننىڭ ەڭبەك سىڭىرگەن قايراتكەرى, رەسپۋبليكالىق جانە حالىقارالىق اقىندار ايتىسىنىڭ جەڭىمپازى امانجول التاەۆ جۇرگىزگەن ايتىستا اقىندار ونەرىنە قازاقستاننىڭ ەڭبەك سىڭىرگەن قايراتكەرى, تۇركى ەلدەرى جازۋشىلار وداعىنىڭ توراعاسى ۇلىقبەك ەسداۋلەت, قورقىت اتا اتىنداعى قىزىلوردا ۋنيۆەرسيتەتىنىڭ پروفەسسورى, ا.بايتۇرسىن ۇلى اتىنداعى التىن مەدال يەگەرى عابيت تۇياقباەۆ, اقىن, قازاقستان جازۋشىلار وداعىنىڭ مۇشەسى ەلۋباي اۋەزوۆ, ايتىسكەر اقىندار بەكارىس شويبەكوۆ جانە مامىر بايداۋلەتوۆتەر باعا بەردى.
رەسپۋبليكالىق ايتىستىڭ باس جۇلدەسى شىمكەنتتىك اقىن نۇرلان ەسەنقۇلوۆقا بۇيىردى. ءبىرىنشى ورىندى مۇحتار نيازوۆ السا, ەكىنشى ورىن شيەلىلىك ايتىسكەر اقىن يرانعايىپ كۇزەنباەۆقا, ءۇشىنشى ورىن قىزىلوردالىق نۇرمات مانسۇروۆ پەن ارالدىق بەكسۇلتان ورىنباساروۆقا بۇيىردى. مۇنان بولەك, پاۆلوردارلىق جىگەر بوكەنگە, وسكەمەندىك سەرىك قۋانعانعا, قارماقشىلىق سىرىم ادىلبەكوۆكە, الماتىلىق نۇرزات قارۋعا, شيەلىلىك ەرجىگىت بەكجانعا ىنتالاندىرۋ سىيلىقتارى تابىستالدى.
قىزىلوردا