بۇگىن ءماجىلىستىڭ VIII شاقىرىلىمىنىڭ ءبىرىنشى سەسسياسىنىڭ قورىتىندى وتىرىسى ءوتتى. پارلامەنت ءماجىلىسىنىڭ توراعاسى ەرلان قوشانوۆ اتقارىلعان جۇمىستاردىڭ ناتيجەسىمەن ءبولىستى, دەپ حابارلايدى Egemen.kz.
«پرەزيدەنت قاسىم-جومارت كەمەل ۇلى توقاەۆ وسى سەسسيانىڭ اشىلۋىندا ماجىلىستەگى ءاربىر فراكتسيانىڭ الدىنا بىرقاتار مىندەتتەر جۇكتەدى. فراكتسيا مۇشەلەرى دە, ءبىر مانداتتى وكرۋگتەر بويىنشا سايلانعان دەپۋتاتتار دا مەملەكەت باسشىسىنىڭ رەفورمالارىن ءىس جۇزىندە جۇزەگە اسىرۋدا بەلسەندى جۇمىس جاسادى, ويتكەنى بۇل – ەلىمىزدىڭ دامۋىنا ۇلەس قوساتىن ورتاق ماقساتىمىز. سوڭعى سەسسيا قىسقا مەرزىمگە قاراماستان وتە ماڭىزدى جانە مازمۇندى بولدى. بۇل شاقىرىلىمنىڭ ءبىر ەرەكشەلىگى – كوپتەگەن ماڭىزدى زاڭ جوبالارىنا دەپۋتاتتاردىڭ ءوزى باستاماشى بولدى. بۇل سەسسيادا بارلىعى 31 زاڭ قابىلداندى. ونىڭ ۇشتەن ءبىرى دەپۋتاتتار باستاماشى بولعان زاڭدار», دەدى ەرلان قوشانوۆ.
سونداي-اق ەرلان قوشانوۆ ءاربىر دەپۋتاتتىڭ باستاماسىنىڭ استارىندا پارتيالار مەن دەپۋتاتتاردىڭ ۇستانىمدارى, سايلاۋشىلاردىڭ ءۇمىتى تۇرعانىن اتاپ ءوتتى. ونىڭ ايتۋىنشا, دەپۋتاتتار سايلاۋ ناۋقانى بارىسىندا ايتىلعان ازاماتتاردىڭ بارلىق تالاپتارىن ەسكەرگەن.
«وسىلايشا, دەپۋتاتتار قوعامدىق باقىلاۋ, زاڭسىز الىنعان م ۇلىكتى مەملەكەت مەنشىگىنە قايتارۋ, جول قوزعالىسىن ۇيىمداستىرۋ, سۇيىتىلعان گاز جانە تۇرعىن ءۇي-كوممۋنالدىق شارۋاشىلىق اينالىمىن رەتتەۋ ماسەلەلەرى بويىنشا ونلاين-پلاتفورمالاردا جانە ونلاين رەجيمىندە زاڭداردى قابىلداۋعا باستاماشى بولدى. ءاربىر زاڭ ازاماتتىق قوعام وكىلدەرىمەن جان-جاقتى تالقىلاندى. ەلباسى «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن جاريالاعانىن بىلەسىزدەر. ونىڭ اياسىندا ءماجىلىستىڭ وكىلەتتىگى كۇشەيتىلدى. وسى تۇجىرىمدامانى ورىنداۋ ماقساتىندا وسى سەسسيادا ءبىز ءبىرىنشى رەت جوعارعى ەسەپ پالاتاسىنىڭ ەسەبىن تىڭدادىق. دەپۋتاتتار بەلسەندىلىگىنىڭ تاعى ءبىر كورسەتكىشى – دەپۋتاتتىق ساۋالدار. بۇل سەسسيادا ءاربىر جالپى وتىرىستا ورتا ەسەپپەن 30-عا دەيىن دەپۋتاتتىق ساۋال ايتىلدى. ولاردىڭ ارقايسىسى ازاماتتاردىڭ ءومىرىن جاقسارتۋعا باعىتتالعان وتكىر ماسەلەلەردى كوتەردى. ءاربىر ايتىلعان ماسەلەنىڭ شەشىمى ءبىزدىڭ ەرەكشە باقىلاۋىمىزدا بولادى», دەدى ەرلان قوشانوۆ.
سونداي-اق ەرلان قوشانوۆ دەپۋتاتتاردىڭ جۇمىسى سايلاۋشىلار ءۇشىن ارقاشان اشىق ەكەنىن اتاپ ءوتتى.
ونىڭ ايتۋىنشا, بۇعان مەملەكەت باسشىسىنىڭ ەلىمىزدىڭ مەملەكەتتىك تەلەارنالارىندا پلەنارلىق وتىرىستاردى تىكەلەي ەفيردە كورسەتۋ باستاماسى سەپتىگىن تيگىزىپ, كورەرمەننىڭ ىستىق ىقىلاسىنا بولەندى.
«بارلىق دەڭگەيدەگى كەزدەسۋلەر مەن پىكىرتالاستار باق وكىلدەرى مەن ساراپشىلاردىڭ قاتىسۋىمەن بارىنشا اشىق وتكىزىلەدى. بۇل سەسسيادا ءماجىلىس جانىنداعى قوعامدىق پالاتانىڭ جۇمىسى دا قىزۋ باستالدى. حالىقتى ەرەكشە تولعاندىراتىن زاڭ جوبالارى پالاتا وتىرىستارىندا قوعامدىق ساراپتامادان وتەدى. دەپۋتاتتار حالىقارالىق پارلامەنتتىك ۇيىمدار اياسىندا جانە ەكىجاقتى پارلامەنتارالىق ىنتىماقتاستىقتى نىعايتۋ باعىتىندا دا بەلسەندى جۇمىس اتقاردى.
جاقىندا ءبىز قازاقستاننىڭ توراعالىعىمەن وتكەن ورتالىق ازيا ايەلدەرى ديالوگىنىڭ وتىرىسىن ءساتتى وتكىزدىك», دەدى ەرلان قوشانوۆ.
ءماجىلىس توراعاسى دەپۋتاتتارعا دا ءۇن قاتتى.
«سەسسيا اياقتالۋعا جاقىن. الدا – ايماقتارعا ساپارلار, حالىقپەن كەزدەسۋلەر جوسپارلانعان. ءبىز ءار وڭىرگە, سونىڭ ىشىندە شالعاي اۋىلدار مەن ەلدى مەكەندەرگە جەتۋىمىز كەرەك. ءبىزدىڭ باستى ماقساتىمىز – حالىقپەن بىرگە بولىپ, ماسەلەلەردى ءتيىمدى شەشۋ, وڭىرلەرمەن بايلانىستى نىعايتۋ. جازدا اتقارىلعان جۇمىستار كەلەسى سەسسيا جۇمىسىنا وڭ اسەرىن تيگىزەدى دەپ ويلايمىن», دەپ قوستى ەرلان قوشانوۆ.