«وزەنمۇنايگاز» كومپانياسىنا جۇرگىزىلگەن تەكسكەرىستىڭ قورىتىندىسى بەلگىلى بولدى. بۇل تۋرالى «Egemen Qazaqstan» گازەتىنىڭ ءتىلشىسى گۇلايىم ءداۋىتباي «وزەنمۇنايگازداعى» تەكسەرىس قورىتىندىسى» ماقالاسىندا ەگجەي-تەگجەيلى جازدى.
«قازمۇنايگاز» ۇك» اق ەكونوميكالىق جانە ىشكى قاۋىپسىزدىك ءبولىمىنىڭ باستىعى ءا.اتاباەۆ «وزەنمۇنايگازعا» جۇمىسقا ورنالاسۋ جانە ىشكى كوممۋنيكاتسيا ماسەلەلەرى, مەردىگەرلىك ۇيىمداردى باسقارۋ مەن مەكەمەنىڭ قارجى-شارۋاشىلىق قىزمەتىن تەكسەرۋ قورىتىندىلارىن ايتىپ بەردى.
- «وزەنمۇنايگاز» اۋتستاففينگىنىڭ جەكەلەگەن قىزمەتكەرلەرىن جالعان جۇمىسقا ورنالاستىرۋ بويىنشا اقپاراتقا تەكسەرۋ جۇرگىزىلدى. كومپانياعا كەلتىرىلگەن زالالدىڭ الدىن الا سوماسى 47 ملن تەڭگەنى قۇرايدى. وسى فاكتى توڭىرەگىندە قر قك 361-بابى 3-تارماعىنىڭ 4-بولىگى, ياعني لاۋازىمدىق وكىلەتتىكتەرىن تەرىس پايدالانۋ بويىنشا كومپانيانىڭ لاۋازىمدى باسشى تۇلعالارىنا قاتىستى سوتقا دەيىنگى تەرگەۋ جۇرگىزىلىپ جاتىر», دەدى ءا.اتاباەۆ.
سونداي-اق سيرەك قولدانىستاعى ماماندىق يەسى رەتىندە جۇمىسقا قابىلدانعان 238 ادامنىڭ 17-ءسىنىڭ بىلىكتىلىگى جوق بولىپ شىقسا, 33 ادام قىسقا مەرزىمدە كومپانياداعى وزگە قىزمەتتەرگە اۋىسىپ كەتكەن. بايانداماشىنىڭ ايتۋىنشا, سيرەك قولدانىستاعى ماماندىق يەسىنە دەگەن سۇرانىستى شتاتقا قابىلدانۋدىڭ امالى رەتىندە پايدالانعان.
سونداي-اق ماڭعىستاۋ وبلىسى وقۋ ورىندارىنىڭ جالعان سەرتيفيكاتتارى «وزەنمۇنايگاز» كومپانياسىنىڭ شتاتىنا كىرۋ ءۇشىن پايدالانىلعانى تۋرالى فاكتىلەر, «وزەنمۇنايگاز» اق كورپوراتيۆتى وقۋ ورتالىعىنىڭ حاتتاماسىندا كوميسسيا مۇشەلەرىنىڭ اتىنان الدەكىمدەر جالعان قول قويىپ, جۇمىسقا قابىلداۋ پروتسەدۋراسىنان وتپەگەن ادامداردى ينجەنەر قىزمەتىنە قابىلداعانى انىقتالىپ, قۇزىرلى ورىندارعا جىبەرىلگەن.