1 قىركۇيەكتەن باستاپ جىلۋ جانە ەلەكتر ەنەرگياسى قىمباتتايدى. بۇنىڭ سەبەبىن «Egemen Qazaqstan» گازەتىنىڭ ءتىلشىسى مۇرات قاپان ۇلى انىقتاپ كوردى.
گازەت بەتىندە جارىق كورگەن «جاڭا تاريف: تۇتىنۋشى تۇرالاپ قالماسىن» ماقالاسىندا اۆتور «پاۆلودارەنەرگو» اق باس ديرەكتورىنىڭ ءبىرىنشى ورىنباسارى ۆاديم لەسينمەن جۇزدەسىپ, جىلۋ مەن ەلەكتر ەنەرگياسىنىڭ قىمباتتاۋىنا قاتىستى سۇراق قويدى.
ۆاديم لەسيننىڭ ايتۋىنشا, بۇل قادام بىلىكتى قىزمەتكەرلەردىڭ جۇمىستان جاپپاي كەتۋىنىڭ الدىن الىپ, ەڭبەك ۇيىمىنداعى وندىرىستىك جانە ەكونوميكالىق ناتيجەلەردى ۇلعايتۋعا, تۇتاستاي العاندا, اكتسيونەرلىك قوعامنىڭ ماتەريالدىق تارتىمدىلىعىن ارتتىرۋعا سەپ بولماق. ونىڭ پايىمىنشا, كاسىپورىن ءىرى ونەركاسىپ ورىندارى شوعىرلانعان اۋماقتا ورنالاسقاندىقتان, ەڭبەكاقىعا مىندەتتى تۇردە يندەكساتسيا جاسالۋى كەرەك.
«قولدانىستاعى تاريفكە ەنگىزىلگەن شىعىندار بۇگىندە ەڭبەككەرلەرگە تولەنىپ كەلە جاتقان جالاقىنى جابۋعا دا جەتپەيتىن كورىنەدى. ءتاريفتىڭ ەڭبەكاقىعا جۇمسالاتىن بولىگى ينفلياتسيا مەن ەنەرگيا ءوندىرۋدىڭ وزىندىك قۇنى ارتىپ كەلە جاتۋىنا بايلانىستى جىل سايىن وزەكتىلىگىن جوعالتىپ, بۇگىندە ول ساپالى قىزمەت كورسەتۋگە قىرسىعىن تيگىزە باستاعان», دەيدى ەنەرگەتيكتەر.