الماتى قالاسىندا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن جامبىل اتىنداعى قازاق مەملەكەتتىك فيلارمونياسىنىڭ ۇيىمداستىرۋىمەن ەلىمىزدەگى كونتسەرتتىك مەكەمەلەردىڭ «مادەني بايلانىستاردى قالىپتاستىرۋ جانە دامىتۋ» سەمينارى ءوتتى.
ونەر ۇجىمدارى باسشىلارىنىڭ باسىن قوسقان شارانىڭ نەگىزگى ماقساتى – قازاقستاننىڭ مادەنيەت سالاسىن كوركەيتۋ, سونداي-اق الداعى ۋاقىتتا جۇزەگە اسىرىلۋى ءتيىس ماسەلەلەردى سارالاۋ.
سەمينارعا توراعالىق ەتىپ, العاشقى ءسوز تىزگىنىن العان اقان ابدۋاليەۆ ءوز بايانداماسىندا بۇگىنگى تاڭدا قوردالانعان ماسەلەلەر تىزبەگىن اتاپ ءوتتى.
كۇن تارتىبىندە رەپەرتۋارداعى ۇلتتىق شىعارمالاردىڭ ازدىعى, تەحنيكالىق ماماندار جەتىسپەۋشىلىگى, ارتيستەردى اتتەستاتسيادان وتكىزۋ, نورماتيۆتىك قۇجات, گونورار مەن قاراجات ماسەلەسى, مەرەيتويلىق, داتالى ءىس-شارالارمەن قاتار, تەحنيكالىق جابدىقتاردىڭ السىزدىگى جونىندە قىزۋ تالقىلانىپ, ولاردى وڭتايلى شەشۋ جولدارى قاراستىرىلدى.
جيىنعا ەلىمىزدىڭ ءار وڭىرىنەن كەلگەن كونتسەرتتىك مەكەمە باسشىلارى اراسىنان جەتەكشى رەتىندە ءبىراۋىزدان «ق.بايجانوۆ اتىنداعى قاراعاندى كونتسەرتتىك بىرلەستىگى» قمقك باسشىسى تالعات ىدىرىسوۆ تاعايىندالدى.
الداعى ۋاقىتقا جوسپارلانعان ورتاق جۇمىستار زامان تالابىنا ساي بولۋىمەن قوسا, ۇلتتىق قۇندىلىقتاردىڭ قايماعىن بۇزباي ىسكە اسىرىلۋى قاجەتتىلىگى جانە وسى سىندى بىرقاتار تالاپ-تىلەك ايتىلدى. سەمينارعا قاتىسۋشىلار ونەر ۇجىمدارىنداعى اسپاپتاردى جاڭارتۋ, ءوزارا شىعارماشىلىق قارىم-قاتىناستى نىعايتۋ مەن ناگرادالاۋ جۇمىستارى, ەلىمىزدەگى فيلارمونيالاردىڭ اسسوتسياتسياسى مەن قورىن جانە ورتاق ەلەكتروندى پورتالىن قۇرۋ, ولاردى تسيفرلاندىرۋ, جاستارمەن جۇمىس ىستەۋدەگى ولقىلىقتاردى تۇزەتۋ, ارتيستەرگە جانە وزگە دە قىزمەتكەرلەرگە ارنالعان شەبەرلىك دارىستەرىن كوبەيتۋ, مادەنيەت زاڭدارىنا وزگەرىستەر ەنگىزۋ, ساحنا كوستيۋمدەرىن جاڭارتۋعا بايلانىستى ۇسىنىستارىن ءبىلدىردى. اتالعان شارادا ءسوز العان «دومبىراشىلار وداعى» رەسپۋبليكالىق قوعامدىق بىرلەستىگىنىڭ توراعاسى قانات ەرجىگىتوۆ فيلارمونيالاردىڭ بەينەباياندارى مەن گاسترولدىك روليكتەرىن ءوز ارنالارىندا كورسەتۋگە دايىن ەكەنىن تىلگە تيەك ەتتى.
سايىپ كەلگەندە, سەمينار قورىتىندىسى رەتىندە شەشىمىن تابۋعا ءتيىس كۇردەلى ماسەلەلەر مەن ۇسىنىستار لەگى سارالانىپ, جيىن سوڭىندا مەكەمە باسشىلارى ءوزارا مەموراندۋمعا قول قويدى. سونداي-اق شارانى ۇيىمداستىرعان جامبىل اتىنداعى قازاق مەملەكەتتىك فيلارمونياسىنىڭ اتىنان ەستەلىك سىيلىقتار تابىستالدى.
«جالعىزدىڭ اتى, جاياۋدىڭ شاڭى شىقپاس» دەگەندەي, بىرلەسە جۇمىس ىستەپ, بىرلىكتە ارەكەت ەتۋگە باعىتتالعان باسقوسۋ مادەنيەت پەن ونەر سالاسىن وركەندەتىپ, دامىتۋ جولىنداعى ەلەۋلى وزگەرىستەردىڭ, جارقىن ىستەردىڭ باستاماسى بولادى دەپ سەنەمىز.
گۇلايىم جۇماش