تىرەك اۋىلداعى تۇيتكىل

قازىر وكرۋگتەگى تۇرعىندار سانى 8 مىڭنان اسقان. اۋىل تۇرعىندارى اكىم­دىكتە, 3 مەكتەپ پەن اگرارلىق-تەح­ني­كالىق كوللەدج, 2 بالاباقشا مەن 1 دارىگەرلىك امبۋلاتوريادا, ما­دە­نيەت ۇيىندە, تەمىرجولدا جۇمىس ىستەي­دى. كاسىپكەرلىكتى تابىس كوزىنە اينال­دىر­عاندار بار.

وزگە اۋىلدار سەكىلدى مۇندا دا كۇر­مەۋى كوپتەن شەشىلمەي كەلە جاتقان تۇيت­كىلدى ءتۇيىن جەتەرلىك. ماسەلەن, اقتوبە وبلىسىنىڭ اۋماعىنان باستا­لىپ, ساعىز اۋىلىنىڭ ورتاسىمەن اعىپ وتەتىن نوعايتى وزەنى كوكتەمدە توسىن «مىنەز» تانىتادى. شاعىن وزەن كوكتەمدە ارناسىنان اسىپ, تۇرعىنداردى ابىگەرگە سالدى. بىلتىر ءتۇن ورتاسىندا 24 تۇر­عىن ۇيدەن 50 ادام قاۋىپسىز جەرگە شى­عا­رىلدى. كەيىن وزەن جاعالاۋى قۇم سالىنعان قاپپەن بەكىتىلدى.

ساعىزدا «اۋىل – ەل بەسىگى» باعدار­لاماسىمەن جاڭا سپورت كەشەنى سالىنىپ جاتىر. بىلتىر باستالعان قۇرىلىس جۇمىستارى الداعى تامىزدا اياقتالۋعا ءتيىس. الايدا اۋىل تۇرعىندارىمەن كەزدەسكەن وبلىس اكىمى سەرىك شاپكەنوۆتىڭ ايتۋىنشا, مەردىگەر «SCS ينجينيرينگ» جشس قۇرىلىسىن مەزگىلىنەن كەشىكتىرىپ وتىر. قازىر نىسان قۇرىلىسىنىڭ 33 پايىزى عانا ورىندالعان.

– مەردىگەر مەكەمەگە قۇرىلىستى تەزدەتۋدى, ال جاۋاپتى باسشىلارعا جۇمىستى قاتاڭ قاداعالاۋدى تاپسىردىم. بەرىلگەن تاپسىرمانىڭ قالاي ورىندالعانىن ءبىر جارىم ايدان كەيىن كورەمىز. سول كەزدە ءتيىستى ناتيجەسى بولماسا, مەردىگەر مەكەمەمەن اراداعى كەلىسىمشارت بۇزىلادى, – دەدى سەرىك شاپكەنوۆ.

بۇل اۋىلعا اۋىز سۋ «كەرەگەن-ساعىز-جامانسور» توپتىق سۋ قۇبىرىمەن جەتكىزىلەدى. تاۋلىگىنە 2 400 تەكشە مەتر سۋ ايدايتىن مۇنارا ورناتىلعان. ىلدي بەتكەيدەگى مۇنارا 700 تەكشە مەتر سۋ بەرىپ تۇر. سول سەبەپتەن, قوسىمشا 2 سۋ قويماسىن, اۋىلىشىلىك جەلى مەن بيىك تۇستان سۋ مۇناراسىن سالۋ جوسپارلانىپ وتىر.

اۋىل تۇرعىندارىن الاڭداتاتىن ماسەلەنىڭ ەڭ كۇردەلىسى – جاستار ارا­سىنداعى جانجال. جاستاردىڭ ءوزارا كەلىسپەۋشىلىگىنىڭ سوڭى توبەلەسكە ۇلاسىپ, سالدارىنان ورىمدەي جىگىتتەر قىر­شىنىنان قيىلىپ جاتىر. ماسەلەن, بۇرناعى جىلعى كۇزدە اۋىل سىرتىمەن وتەتىن «اقتوبە-اتىراۋ» تاس جولىنىڭ بويىندا توبەلەس بولىپ, ارتى اتىسقا ۇلاسقان. ءبىر ادام وقتان اجال قۇشىپ, التى جىگىت جاراقات العان.

بۇل ءىستىڭ تەرگەۋى ۇزاققا سوزىلدى. بيىلعى ناۋرىزدا اتىراۋ وبلىسى­نىڭ قىلمىستىق ىستەر جونىندەگى ما­مان­­داندىرىلعان اۋدانارالىق سوتىن­دا القابيلەردىڭ قاتىسۋىمەن 21 ادام­نىڭ ۇستىنەن قوزعالعان قىل­مىس­­تىق ءىس قارالدى. قىلمىستىق ءىستىڭ القا­بي­لە­ردىڭ قاتىسۋىمەن قارالۋى­نا سوت­تا­لۋشىلاردىڭ ءبىرىنىڭ ءوتىنىشى نە­گىز بولعان. كۇدىكتىلەرگە قىلمىستىق كو­دەكستىڭ 99-بابىنىڭ 2-بولىگىنىڭ 7,9-تارماقتارى, 24-بابىنىڭ 3-بولى­گى, 99-بابىنىڭ 2-بولىگىنىڭ 1,7,9-تار­ماقتارى, 107-بابىنىڭ 2-بولىگىنىڭ 4,5-تارماقتارى, 434 جانە 432-بابى­مەن ايىپ تاعىلدى. پروكۋرور سوتتالۋشى­لارعا 2 جىل 6 ايدان 18 جىلعا دەيىنگى باس بوستاندىعىنان ايىرۋ جازاسىن تاعايىنداۋدى سۇرادى. ال جابىرلەنۋشى تاراپ سوتتالۋشىلارعا ەڭ اۋىر جازا تاعايىندالعانىن قالادى.

القابيلەردىڭ شەشىمىمەن 11 كۇ­دىكتى قىلمىستىق كودەكستىڭ 434-بابىندا كوزدەلگەن قىلمىستىق قۇقىق بۇزۋشىلىقتى جاساعانى دالەلدەنبەۋىنە بايلانىستى اقتالدى. كۇدىكتىنىڭ ءبىرى كىنالى دەپ تانىلعانىمەن, راقىمشىلىققا سايكەس جاۋاپتىلىقتان بوساتىلدى. ال التى كۇدىكتىگە «راقىمشىلىق تۋرالى» زاڭىنا سايكەس, تۇپكىلىكتى 2 جىل 8 اي مەرزىمگە باس بوستاندىعىنان شەكتەۋ جازاسى تاعايىندالدى. ءبىر ادام 16, تاعى بىرەۋى 11 جىل 3 ايعا, ءۇشىنشى كۇدىكتى 5 جىل­عا سوتتالدى. 

– ءار اۋىلداعى, اسىرەسە وسى وكرۋگتەگى تۇرعىنداردى قاۋىپسىزدىك پەن قوعامدىق ءتارتىپتىڭ ساقتالۋى الاڭداتادى. سول سەبەپتەن, بيىل ساعىز اۋىلىن­دا 50 بەي­نە­باقىلاۋ كامەراسى ورناتى­لادى. پو­ليتسيا بولىمشەسىنىڭ جاڭا عيما­­را­تىن سالۋ جوسپارلاندى. اۋىل تۇرعىن­دارىنىڭ يگىلىگى ءۇشىن ينفراقۇ­رىلىمدى دامىتىپ, الەۋمەتتىك نىسانداردى كوپتەپ سالۋعا نازار اۋدارىپ وتىرمىز, – دەدى سەرىك شاپكەنوۆ.

وكرۋگ تۇرعىندارىن مەكتەپ ماسە­لەسى دە تولعاندىرادى. قىزىلقوعا اۋداندىق قۇرىلىس, ساۋلەت جانە قالا قۇرىلىسى ءبولىمىنىڭ باسشىسى دۋلات نىعمەتوۆتىڭ ايتۋىنا قاراعاندا, وكرۋگتە تۇرعىندار سانى جىل سايىن ءوسىپ وتىر. اۋىلداعى ءۇش ورتا مەكتەپتە وقۋشىلار سانى كوبەيىپ, ورىن جەتىسپەۋدە. بۇل اۋىل تۇرعىندارىنىڭ وبلىس, اۋدان اكىمدەرىمەن كەزدەسۋدە ءجيى كوتەرەتىن ماسەلەسىنە اينالعان. 

–  جاقىندا وبلىس اكىمى سەرىك شاپ­كە­­نوۆ ساعىز وكرۋگىنىڭ تۇرعىندارىمەن كەزدەسۋدە «جايلى مەكتەپ» جوباسىمەن جاڭا ءبىلىم ورداسى سالىناتىنىن ءمالىم ەتتى. سوعان وراي اۋىلدا 600 ورىندىق جاڭا مەكتەپتىڭ قۇرىلىسىن باستاۋ 2024-2025 جىلداردىڭ جوسپارىنا ەنىپ وتىر. قازىر جاڭا مەكتەپتىڭ قۇرىلىسىن جۇرگىزۋ ءۇشىن ساعىز اۋىلىنان جەر تەلىمى ءبولىندى. قۇرىلىس نىسانىنىڭ باستاپقى قۇجاتتارى ازىرلەندى. ەندى جوبالاۋ جۇ­مىستارى جىل سوڭىنا دەيىن دايىن بولادى, – دەيدى دۋلات نىعمەتوۆ.

اتىراۋ وبلىسى