جەلىمنىڭ جاڭا ءتۇرى

ۇلتتىق مەملەكەتتىك عىلىمي-تەحنيكالىق ساراپتاما ورتالىعىنىڭ حابارلاۋىنشا, دۇنيەجۇزىلىك نارىقتا تىعىزداعىش جانە جەلىمدەگىش ماتەريالدارعا دەگەن سۇرانىس تا, ونى وندىرۋشىلەر دە ارتىپ كەلەدى. سوڭعى اناليتيكالىق زەرتتەۋلەردىڭ بىرىندە گەرمەتيكتەر مەن جەلىمدەرگە دەگەن جاھاندىق سۇرانىس جىلىنا ورتا ەسەپپەن 5 پايىزعا وسەدى دەلىنگەن. 2022 جىلى سۇرانىس 2 ميلليون توننانى قۇراعان. جەلىمدەگىش زاتتارعا قۇرىلىس يندۋسترياسى, وڭدەۋ ونەركاسىبى, ەلەكترونيكا ءوندىرىسى جانە قاپتاما جۇمىسىندا سۇرانىس كوپ. ول كوبىنەسە دامۋشى ەلدەردە بايقالادى ەكەن.

ماركەتينگتىك تالداۋ كورسەتكەندەي, ەلىمىزدىڭ نارىعىندا جەلىم يمپورتىنىڭ ۇلەسى وتە جوعارى. قازىرگى ۋاقىتتا قازاقستاندا گەرمەتيكالىق جانە جەلىم ماتەريالدارىن شىعاراتىن وتاندىق ءوندىرۋشى جوق. ءوز كەزەگىندە قارقىندى دامىپ كەلە جاتقان زاماناۋي تاسىلدەر, قۇرىلىستاعى, ماشينا جاساۋداعى, اۆياتسيالىق قۇرىلىستاعى, سونداي-اق جوندەۋ جانە تۇرمىستىق قىزمەت كورسەتۋدەگى تەحنولوگيالار قۇرىلىس حيمياسىنىڭ وتاندىق ماتەريالدارىن ءوندىرۋ قاجەتتىلىگىن تۋعىزىپ وتىر.

قاراعاندىلىق عالىمدار قانىقپاعان كاربون قىش­قىلدارى مەن اميدتەرى بار قانىقپاعان پوليەفيرلى شايىر­لاردىڭ سوپوليمەرلەرى نەگىزىندە اۋا رايىنا ءتوزىمدى جاڭا تىعىزداعىش ماتەريالدار مەن جەلىمدەر جاساۋ ءۇشىن يننوۆاتسيالىق ازىرلەمەلەردى ۇسىنىپ وتىر.

وتاندىق عالىمدار ۇسىنىپ وتىرعان يننوۆاتسيانى قارۋ-جاراق وق-دارىلەرى مەن ارتيللەريالىق قوندىرعىلاردى پلومبالاۋدان باستاپ ستانوك جاساۋ مەن قۇرىلىستاعى قۇراما بۇيىمدار مەن مەتالل كونسترۋكتسيالاردىڭ تۇيىسپەلەرىنە دەيىن قولدانۋعا بولادى.

عىلىمي زەرتتەۋ ناتيجەسىندە ماماندار قولدا بار جانە ارزان شيكىزاتتان جاڭا تىعىزداعىشتار مەن جەلىمدەر جاساپ, يمپورتتى الماستىراتىن جاڭا ونىمدەر مەن ماتەريالداردى وندىرىسكە ەنگىزبەك. بۇل ەلىمىزدىڭ ماشينا جاساۋ, قورعانىس جانە قۇرىلىس ونەركاسىبى كاسىپورىندارىندا سۇرانىسقا يە تۇپكىلىكتى ءونىمنىڭ وزىندىك قۇنىن تومەندەتۋگە سەپتىگىن تيگىزەدى.