ەلوردا تورىندە حالىق اقىنى, جىراۋ, ءانشى جانە كومپوزيتور كەنەن ازىرباەۆتىڭ قۇرمەتىنە ءمۇسىنى ورناتىلىپ, اشىلۋ سالتاناتى ءوتتى. ءىس-شاراعا مەملەكەت جانە قوعام قايراتكەرى مىرزاتاي جولداسبەكوۆ, قالامگەر, اكادەميك ءۋاليحان قاليجان ۇلى, اقىننىڭ ۇلى باقىتجان كەنەن ۇلى مەن قىزى تورتكەن كەنەنقىزى, سونداي-اق استانالىق ونەرسۇيەر قاۋىم قاتىستى.
دالا دارىنىنىڭ ەسكەرتكىش-ءبيۋستىن مىرزاتاي جولداسبەكوۆ پەن تورتكەن كەنەنقىزى تانىستىرىپ, لەنتاسىن قيدى. سونىمەن قاتار جيىن بارىسىندا ا.جۇبانوۆ اتىنداعى مۋزىكالىق مەكتەپتىڭ ديرەكتورى نۇركەن ءاشىروۆ اقىنعا ارناپ شىعارعان «كوكشولاق» كۇيىن ورىنداسا, تانىمال جاس تالانت ەرجان ماكسيم كومپوزيتوردىڭ «شىرقا داۋسىم» اتتى ءانىن ورىندادى.
ءىس-شارادا جازۋشى, اكادەميك ءۋاليحان قاليجان ۇلى سويلەپ, اقىننىڭ تەلەگەي مۇراسىنىڭ ماڭىزى جونىندە ايتىپ ءوتتى.
كەنەن ازىرباەۆ – قازاق ونەرىندەگى سال-سەرىلىك جانە ايتىسكەرلىك داستۇرلەردى ۇزبەي, حح عاسىردىڭ 70-جىلدارىنا دەيىن جەتكىزگەن ونەرپاز. داستان جانرىن جاستايىنان جىرلاعان. قازاق حالقىنىڭ ايتىس ونەرىنىڭ ناسيحاتشىسى. 150-دەي ءان تولعاپ, اندەرى حالىق ءسۇيىپ ايتاتىن ماڭگىلىك رۋحاني قازىناعا اينالدى.
– مۇسىنگە كىرىسپەس بۇرىن كەنەن ازىرباەۆتىڭ شىعارماشىلىعىن جان-جاقتى جيناقتاپ, تەرەڭىرەك تانىسۋعا مۇمكىندىك الدىم. اندەرىن تىڭداپ, ولەڭدەرىن وقىدىم. ەسكەرتكىشتىڭ بيىكتىگى – 3,2 مەتر, ال ەنى 70 سانتيمەتر. قاجىرلى جۇمىستىڭ ارقاسىندا اتامىزدىڭ ءمۇسىنىن جاساۋعا ەكى اي ۋاقىت جۇمسادىم, – دەدى ءمۇسىنشى رينات ابەنوۆ.