پرەزيدەنت وزبەكستان رەسپۋبليكاسى ولي ءماجىلىسى سەناتىنىڭ توراعاسى تانزيلا نارباەۆانى قابىلدادى, دەپ حابارلايدى اقوردانىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا پارلامەنتارالىق بايلانىستاردى دامىتۋعا جانە مەملەكەتارالىق قاتىناستارعا تىڭ سەرپىن بەرۋگە باعىتتالعان قازاق-وزبەك ىنتىماقتاستىعىنىڭ وزەكتى ماسەلەلەرى تالقىلاندى.
قاسىم-جومارت توقاەۆ تانزيلا نارباەۆاعا ءىلتيپات بىلدىرە وتىرىپ, بۇگىن استانادا وتكەن ماڭىزدى باستاما – «ورتالىق ازيا ەلدەرى ايەلدەرىنىڭ ديالوگى» اتتى شارانى قولداعانى جانە جيىنعا بەلسەندى قاتىسقانى ءۇشىن ولي ءماجىلىسى سەناتىنىڭ توراعاسىنا ريزاشىلىعىن ءبىلدىردى. مەملەكەت باسشىسى وسى الاڭنىڭ ءبىرىنشى وتىرىسىنىڭ قورىتىندىسى وڭىردەگى ءوزارا ءىس-ارەكەتتى جانداندىرۋعا ىقپال ەتەتىنىنە, ورتالىق ازياداعى گەندەرلىك تەڭدىك پەن ورنىقتى دامۋدى قامتاماسىز ەتۋ باعىتىندا ۇزاق مەرزىمدى شەشىمدەر ازىرلەۋگە مۇمكىندىك بەرەتىنىنە سەنىم ءبىلدىردى.
پرەزيدەنت سەنات توراعاسىنىڭ ساپارى ەكىجاقتى ىنتىماقتاستىقتىڭ ەرەكشە سيپاتىنىڭ جارقىن كورىنىسى ەكەنىن جانە قازاقستان مەن وزبەكستان اراسىنداعى ستراتەگيالىق سەرىكتەستىك پەن وداقتاستىق دەڭگەيىنە ساي كەلەتىنىن اتاپ ءوتتى.
«بىلتىر جەلتوقسان ايىندا وزبەكستانعا جاساعان مەملەكەتتىك ساپارىمنىڭ ناتيجەسىن جوعارى باعالايمىز. بيىل 3 ناۋرىزدا شىمكەنتتە وتكەن بەيرەسمي كەزدەسۋ بارىسىندا ەلدەرىمىز اراسىنداعى ءوزارا ءىس-ارەكەتتىڭ وزەكتى ماسەلەلەرى تالقىلاندى. تەك ۇكىمەت دەڭگەيىندە عانا جۇيەلى جۇمىس جۇرگىزىلىپ جاتقان جوق, پارلامەنتارالىق ديپلوماتيا دا بەلسەندى دامىپ كەلە جاتىر. بۇل – قۋانتارلىق جايت. سوندىقتان كەلەسى جىلى ەكىنشى پارلامەنتارالىق فورۋمنىڭ سامارقاند قالاسىندا وتكىزىلۋىن قۇپتايمىن», دەدى قاسىم-جومارت توقاەۆ.
ءوز كەزەگىندە تانزيلا نارباەۆا قۇرمەت كورسەتكەنى ءۇشىن العىس ايتىپ, وزبەكستان پرەزيدەنتى شاۆكات ميرزيوەۆتىڭ سالەمىن جەتكىزدى.
ء«سىزدىڭ باسشىلىعىڭىزبەن قازاقستاندا جۇزەگە اسىرىلىپ جاتقان كەڭ اۋقىمدى رەفورمالاردى جوعارى باعالايمىز. ءسىزدى قازاقستاننىڭ بۇكىل جۇيەسىنىڭ ساياسي جاڭعىرۋىنا ىقپال ەتكەن اۋقىمدى ءىس-شارالاردىڭ تابىستى جۇزەگە اسىرىلۋىمەن قۇتتىقتاعىم كەلەدى. ەلىڭىز تۋرا جولمەن كەلەدى جانە حالىق ىسكە اسىرىلىپ جاتقان رەفورمالارىڭىزدى بەلسەندى قولدايدى. ءبىز بۇعان قۋانىشتىمىز», دەدى سەنات توراعاسى.
كەزدەسۋ سوڭىندا مەملەكەت باسشىسى وزبەكستان پرەزيدەنتىنە جۇرەكجاردى سالەمىن جولدادى.