قوستانايلىقتار اباي وبلىسىنداعى ورتتەن زارداپ شەككەن تۇرعىندارعا گۋمانيتارلىق كومەك جونەلتتى. ازىق-ت ۇلىك, كيىم-كەشەك جانە تۇرمىستىق زاتتار تيەلگەن جۇك كولىگىن «Amanat» پارتياسىنىڭ وبلىستاعى وكىلدەرى شىعارىپ سالدى.
الاپات اپات بىلتىر نۋ ورمانىن دۇلەي جالىن جالماپ كەتكەن توبىل-تورعاي وڭىرىندەگى اعايىننىڭ دا قابىرعاسىنا قاتتى باتىپ وتىر. قيىن-قىستاۋدا قالعان الىستاعى جاقىنعا شىن جانى اشىپ, كوپ بولىپ بىرىگىپ كومەك كورسەتۋگە ۇندەگەن بەلسەندى ازاماتتار ەندى ەل ىشىنەن جىلۋ جيناپ, شىعىسقا بەت العان گۋمانيتارلىق كومەكتىڭ لەگىن جالعاستىرۋدىڭ قامىن قاراستىرىپ جاتىر.
«گۋمانيتارلىق كومەك تيەلگەن جيىرما توننالىق جۇك كولىگى كۇنى كەشە جولعا شىقتى. ونى جيناۋعا وبلىستىق, اۋداندىق ءماسليحاتتىڭ دەپۋتاتتارى, جەرگىلىكتى جەرلەردەگى باستاپقى پارتيا ۇيىمدارىنىڭ وكىلدەرى اتسالىستى. بۇل يگى ءىس كوپشىلىك تاراپىنان قولداۋ تاۋىپ, بىزگە سان سالادا ەڭبەك ەتىپ جاتقان كاسىپكەرلەر مەن قاراپايىم تۇرعىندار حابارلاسىپ, نە كەرەك ەكەنىن, قالاي كومەك كورسەتە الاتىنىن سۇراستىرىپ جاتىر. ازاماتتىق جاۋاپكەرشىلىگى جوعارى, جاناشىر جانداردىڭ كوپ ەكەنى كوڭىل توعايتادى.
«جاستار رۋحى» جاستار قاناتىنىڭ بەلسەندىلەرى دە جۇگىرىپ ءجۇرىپ ءبىراز شارۋا تىندىردى. بۇكىل ەلدىڭ باسىنا تۇسكەن سىندارلى ساتتە اۋىرتپالىق كورگەندەرگە قولۇشىن سوزباي, ءبىر شەتتە ءۇنسىز جاتىپ الۋ ادامدىعىمىزعا دا, اعايىندىعىمىزعا دا سىن بولادى. سوندىقتان قازىر جۇرت بولىپ جۇمىلىپ, ورتتەن زارداپ شەككەن اعايىنعا بارىنشا كومەك كورسەتۋىمىز كەرەك», دەيدى «Amanat» پارتياسى وبلىستىق فيليالىنىڭ توراعاسى بيبىگۇل اققوجينا.
قوستاناي وبلىسى