بيىل ناۋرىزدىڭ ون ءۇشى كۇنى تەمىرتاۋدا كوپقاباتتى ءۇيدىڭ ءۇشىنشى قاباتىندا گاز جارىلدى. جارىلىستان التى ادام زارداپ شەكتى. ونىڭ تورتەۋى بالا, ەكەۋى ەرەسەك ادام ەدى. بۇل تۋرالى ينتەرنەت ارقىلى اقپارات تەز تارادى. جاريالانعان اقپاراتتا كوپقاباتتى ءۇيدىڭ ءبىر كىرەبەرىسىندەگى ون بەس پاتەر يەسىنىڭ كوشىرىلگەنى دە ايتىلعان بولاتىن. اۋىر حالدەگى ەكى ەرەسەك پەن ءتورت بالا دا اۋرۋحاناعا تۇسكەن ەدى سول ساتتە. جارىلىس تۋرالى بارلىق باق مالىمەتى وسى سىڭايدا. ال وسى التى ادامدى گازدان تۇتانعان ورتتەن الىپ شىققان كىم؟
ول جونىندە بىردە-ءبىر ءباسپاسوز, تەلەۆيدەنيە, نە اقپارات اگەنتتىگى ءلام-ميم دەمەدى. البەتتە, مىناداي اۋىر جاعداي جاساعان جاقسىلىقتى ساۋداعا سالىپ تۇراتىن كەز ەمەس. دەگەنمەن ەرلىك يەسىن ەل بىلۋگە ءتيىس. ول ازامات سول ارادا شۇعىل ارەكەت ەتپەگەندە, ءتورت بالانىڭ تاعدىرى نە بولارى بەلگىسىز ەدى. التى ادامدى قۇتقارىپ قالعان ازاماتتىڭ ەسىمى تالعاتبەك, تەگى تولەۋباەۆ. ءورت ءسوندىرۋ قىزمەتىندە ون التى جىلدان بەرى جۇرگىزۋشى بولىپ جۇمىس ىستەيدى. ءدال قايعىلى وقيعا ورىن العان كۇنى تالعاتبەك ۇيىندە بولعان ەكەن. جارىلىس ءۇشىنشى قاباتتان شىققان. ال تالعاتبەك ەكىنشى قاباتتا تۇرادى.
«تەمىرتاۋدا ءبىز تۇراتىن ءۇيدىڭ ءۇشىنشى قاباتىندا گاز جارىلعاندا, مەن ەڭبەك دەمالىسىندا ەدىم. دالادان ۇيگە كىرگەنىم سول ەدى, بەس-ون مينۋتتان سوڭ جارىلىس بولدى. دۇڭك ەتىپ ءۇي سىلكىندى. قاراساق, جارىلىستىڭ ەكپىنى پاتەرىمىزدىڭ ەسىگىندەگى ىلگەكتى ج ۇلىپ الىپتى. ۇيدەن اتىپ شىقتىم. جوعارى قاباتتان ءبىر ايەل ءۇستى-باسى جانىپ كەتكەن, ايعايلاپ جۇگىرىپ كەلەدى. راسىندا, كيىمى تۇك قالماي جانىپ كەتىپتى. ونى ۇيىمىزگە كىرگىزىپ جاتقاندا, «ويباي, بالالار, بالالار!» دەي بەردى. ونى ەستىسىمەن ورتەنگەن پاتەرگە جۇگىردىم. ادامنىڭ مۇندايدا ويلانۋعا مۇرشاسى دا كەلمەيدى ەكەن. دەرەۋ پاتەرگە كىرسەم, بالالاردى دا كۇيىك شالىپتى. تەرىلەرى ءتۇسىپ جاتىر ۇلبىرەپ. بىرتىندەپ كوتەرىپ الىپ, ۇيگە اكەلدىم. ەكى ايەلدىڭ بىرەۋى ۇلكەن كىسى, ەكىنشىسى – الپىستار شاماسىندا. ۇستەرىندەگى كيىمدەرى تۇگەلىمەن جانىپ كەتىپتى. كەلىنشەگىم شاماسى كەلگەنشە ۇلكەندەردى وراپ, كيىندىردى. پاتەردەن الىپ شىققان ءتورت بالا دا شىرىلداپ جاتىر. بىرەۋى جارىمجان بالا ەكەن. وعان اسا كۇيىك تيمەگەندەي كورىندى. بىلمەيمىن عوي بىراق. ءبارىن كيىندىرىپ, دالاعا شىعارىپ جاتقاندا باسقا ادامدار كەلىپ كومەكتەستى. جاسىراتىنى جوق, ول كەزدە ادامداردى قۇتقارىپ قالۋدان باسقا وي بولعان جوق. قولىمىزدان كەلگەنشە كومەك بەرۋگە تىرىستىق. كەيبىرەۋلەر «تەلەفوننىڭ بەينەجازباسىنا ءتۇسىرىپ المادىڭىز با؟» دەيدى. مىناداي اۋىر وقيعادا قايداعى ۆيدەو؟» دەيدى تالعاتبەك زامانبەك ۇلى.
جارىلىس بولعان پاتەردەگى التاۋدىڭ ەكەۋى – بالالاردىڭ اجەلەرى. قالعان تورتەۋى ولاردىڭ نەمەرەلەرى ەكەن. اكە-شەشەلەرى جارىلىس كەزىندە ۇيدە بولماعان. پاتەر جالدامالى. باللون پاتەر يەسىنەن قالعان. تالعاتبەك زامانبەك ۇلى وسى وقيعادان سوڭ قوس قاريانىڭ وڭالماعانىن ەستىگەنىن ايتادى.
«امان قالسا ەكەن» دەپ بارىنشا تىلەپ ەدىك. بىزگە باسقا ەشتەڭە دە كەرەك ەمەس ەدى, – دەيدى تالعاتبەك تولەۋباەۆ. – الايدا ادامنىڭ قالاۋى بولا بەرمەيتىنى تاعى شىندىق».
قازىرگى تاڭدا تالعاتبەك زامانبەك ۇلى قىزىنىڭ ەكى بولمەلى پاتەرىندە تۇرىپ جاتىر. قىزىنىڭ ءتورت بالاسى بار. ءسويتىپ, امالسىزدان ەكى بولمەدە ونشاقتى ادام تىرشىلىك ەتىپ كەلەدى.
تەمىرتاۋ قالاسى اكىمدىگى ون بەس پاتەردى جوندەپ بەرۋگە ۋادە بەرگەن. بىراق ەكى اي وتسە دە, ەشتەڭە وزگەرمەگەن. جاقىندا سول ءۇيدىڭ تۇرعىندارىمەن وتكەن جيىندا ەكى ايدان سوڭ تەندەر وتەتىنى, جوندەۋ جۇمىستارىنىڭ سودان كەيىن عانا باستالاتىنى تۋرالى ايتىلعان ەدى. ال تەندەردىڭ قاشان اياقتالارى تاعى بەلگىسىز. وسى بەلگىسىزدىك ت.زامانبەك ۇلىن قاجىتىپ وتىر. اكىمدىك پاتەر جالداۋ اقىسىن تولەپ بەرۋگە مۇددەلى ەكەن. بىراق ول دا شەشىم ەمەس. ءوز ءۇيى – ولەڭ توسەگى بولماعان سوڭ, بىرەۋدىڭ ۇيىندە وگەيدىڭ كۇيىن كەشۋ الپىستان اسقان ادامعا وڭاي ەمەس.
ت.زامانبەك ۇلى ءوزىن ەرلىك جاسادىم دەمەيدى. بىزبەن سۇحباتىنىڭ وزىندە سوزگە ساراڭدىق تانىتىپ, ايتقىسى دا كەلمەدى. «امان ءجۇر ەكەن, بىزگە سول جەتەدى» دەگەندى ءجيى ايتادى. ايتكەنمەن, سىن ساتتە ساۋاتتى ءىس-ارەكەت ەتە بىلگەن جىگىت اعاسىنىڭ بۇل باتىلدىعىن ەرلىك ەمەس دەۋگە كىمنىڭ ءداتى بارادى؟ وتتىڭ ورتاسىندا قالعان شىرقىراعان ءتورت بالانى قۇتقارۋ ءۇشىن باسىن بايگەگە تىككەن تالعاتبەكتىڭ باتىلدىعى ەسكەرۋسىز قالعانى قىنجىلتادى. بار بولعانى توتەنشە جاعدايلار دەپارتامەنتىنىڭ باسشىسى مۇرات قاتپانوۆتىڭ العىسحاتى بەرىلىپتى. دەگەنمەن ول دا جاسالعان ەرلىككە بەرىلگەن ناقتى باعا دەسەك, اقيقاتقا قيانات جاسايمىز.
جاساعان يگى ءىسىن وزگەلەر سەكىلدى جارنامالامايتىن مۇنداي ادامداردى قوعام كوبىنە بىلە بەرمەيدى. ويتكەنى قازىر ەسەپپەن جۇرەتىندەردىڭ باعى جانىپ تۇرعان ۋاقىت. ەسەسىنە ت.زامانبەك ۇلى سەكىلدى ازاماتتار بيلىكتەن ەشتەڭە سۇرامايدى. تەك ءوزىنىڭ تيەسىلى پاتەرىنىڭ جىلدام جوندەلىپ, باسپاناسىنا كىرۋىنە عانا مۇقتاج. دەسەك تە, ادام ءومىرىن امان ساقتاپ قالعان ازاماتتىڭ وسىناۋ ەرلىگى ەلەۋسىز قالماس دەگەن ءۇمىت وتى ءالى دە سونگەن جوق. التى ادامدى قۇتقارۋ العىسحاتپەن عانا الدارقاتىپ قوياتىنداي ەرلىك ەمەس قوي سەبەبى...
قاراعاندى وبلىسى,
تەمىرتاۋ قالاسى