اباي وبلىسىنداعى «سەمەي ورمانى» مەملەكەتتىك ورمان تابيعي رەزەرۆاتى» رمم اۋماعىندا ءورت سالدارىنان بولعان توپتىق جازاتايىم وقيعانىڭ سەبەپتەرى مەن ءمان-جايلارىن تەرگەۋ ءۇشىن قر پرەمەر-ءمينيسترىنىڭ ءبىرىنشى ورىنباسارى رومان سكلياردىڭ توراعالىعىمەن ارنايى ۇكىمەتتىك كوميسسيا قۇرىلدى, دەپ حابارلايدى Egemen.kz.
كوميسسيا ورمانداعى ءورتتىڭ شىعۋ سەبەبى مەن وعان كىنالىلەردى انىقتاۋ ماقساتىندا ەگجەي-تەگجەيلى زەرتتەۋ جۇرگىزەدى. سونداي-اق كەلتىرىلگەن شىعىنداردى ەسەپتەپ, زارداپ شەككەندەر مەن كوز جۇمعانداردىڭ وتباسىنا كومەك كورسەتۋ شارالارىن ۇيىمداستىرادى.
ارنايى ۇكىمەتتىك كوميسسيا جۇمىستى 10 جۇمىس كۇنى ىشىندە اياقتايدى دەپ بولجانىپ وتىر. تەرگەۋ ناتيجەلەرى الداعى ۋاقىتتا حابارلانادى.