شىمكەنتتىك وقۋشىلار – ەرداۋلەت پەن رامازان ءبىر توپ دوستارىمەن بىرگە بادام وزەنىنە شومىلۋعا كەلە جاتىپ, كىشكەنتاي بالانىڭ وزەنگە باتىپ بارا جاتقانىن بايقاپ قالادى. ولار بالانى قۇتقارۋ ءۇشىن جالما-جان وزەنگە قاراي ۇمتىلىپ, ونى جاعاعا الىپ شىعادى. سۋ جۇتقان بالادا ەس جوق. كوپ سۋ جۇتىپ قويعان ونىڭ ءىشى ءىسىپ, بەت-ءجۇزى كوگەرە باستاپتى. بالالاردىڭ ىشىندەگى ەرەسەگى, 9-سىنىپتا وقيتىن رامازان تەز ارادا العاشقى مەديتسينالىق كومەك كورسەتەدى. ءبىر سىنىپ تومەن وقيتىن دوسى ەرداۋلەت تە جاردەم بەرەدى. جىلدام ارەكەتتىڭ ناتيجەسىندە التى جاسار بالا ەسىن جيىپ, دەم الا باستايدى.
وسىلايشا, ۋاقىتىندا كورسەتىلگەن مەديتسينالىق كومەكتىڭ ارقاسىندا كىشكەنتاي بالا امان قالدى. ال بەيبىت كۇننىڭ باتىرلارى رامازان امانگەلديەۆ پەن ەرداۋلەت شىڭعىسحان توتەنشە جاعدايلار ءمينيسترىنىڭ بۇيرىعىمەن باتىلدىعى مەن ەرجۇرەكتىگى ءۇشىن «سۋعا باتقانداردى قۇتقارعانى ءۇشىن» مەدالىمەن ماراپاتتالدى. سونداي-اق ولارعا قالالىق توتەنشە جاعدايلار دەپارتامەنتى باسشىلىعىنىڭ اتىنان دا ەستەلىك سىيلىق تابىستالدى. ءدال سول كۇنى رامازان مەملەكەتتىك ەمتيحان تاپسىراتىن بولعاندىقتان, ونىڭ سىيلىعى اناسىنىڭ قولىنا بەرىلدى. قوس باتىر شىمكەنت قالاسىنداعى №128 جالپى ورتا مەكتەپتە وقيدى.
توتەنشە جاعدايلار دەپارتامەنتىنىڭ حابارلاۋىنشا, بادام وزەنى جۇزۋگە تىيىم سالىنعان ايماق بولىپ سانالادى. نەگىزىندە مەگاپوليستە شومىلۋعا ارنالعان 13 ورىن بار.
شىمكەنت