نۇرجان التاەۆ قاماۋعا الىندى

7 ماۋسىمدا سىبايلاس جەمقورلىققا قارسى قىزمەت جاسىرىن ءىس-شارالار كەشەنىنىڭ ناتيجەلەرى بويىنشا ەكس-ۆيتسە-مينيستر ن.ب. التاەۆتى اسا اۋىر جەمقورلىق قىلمىس جاسادى دەگەن كۇدىكپەن ۇستاعان بولاتىن.

ن.ب. التاەۆ «اتامەكەن» ۇكپ باسقارما توراعاسى ا.ي. مىرزاحمەتوۆكە «ەڭبەك» مەملەكەتتىك باعدارلاماسى بويىنشا مەملەكەتتىك تاپسىرىستى الۋعا جاردەمدەسۋ ءۇشىن 2018-2019 جىلدار ارالىعىندا قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى بولا تۇرا, جۇيەلى تۇردە پارا رەتىندە اي سايىن 5 000 اقش دوللارى مولشەرىندە اقشا قاراجاتىن الدى دەگەن كۇدىككە ىلىنگەن.

ايىپتالۋشى 2020 جىلعا دەيىن اسا ءىرى كولەمدە, جالپى سوماسى 135 000 اقش دوللارىن قالتاسىنا باسقان.

انتيكور قىلمىس جاسىرىن تەرگەۋ ارەكەتتەرىنىڭ ناتيجەلەرىمەن, ءتيىستى قۇجاتتارمەن, زاتتاي دالەلدەمەلەرمەن, بارلىق قاتىسى بار ادامداردىڭ ايعاقتارىمەن جانە ءىستىڭ باسقا ماتەريالدارىمەن راستالعانىن مالىمدەدى.

جينالعان دالەلدەمەلەردى ەسكەرە وتىرىپ, پروكۋراتۋرا ورگاندارىنىڭ كەلىسىمى بويىنشا التاەۆتىڭ ارەكەتتەرى قر قك 366-بابى 4-بولىگى بويىنشا سارالانىپ, استانا قالاسى پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى.

سونداي-اق قر قپك 201-بابىنا سايكەس تەرگەۋ مۇددەسى ءۇشىن وزگە اقپارات جاريا ەتۋگە جاتپايتىنىن ايتتى.

كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.