مەملەكەت باسشىسى قاسىم-جومارت توقاەۆ بۇۇ دەلەگاتسياسىمەن – بۇۇ باس حاتشىسىنىڭ ورىنباسارى – بۇۇ ازيا جانە تىنىق مۇحيتى ءۇشىن ەكونوميكالىق جانە الەۋمەتتىك كوميسسياسىنىڭ اتقارۋشى حاتشىسى ارميدا اليسدجابانمەن, باس حاتشىنىڭ ساياسي ماسەلەلەر جونىندەگى كومەكشىسى ميروسلاۆ ەنچيمەن جانە بۇۇ باس حاتشىسىنىڭ كومەكشىسى – بۇۇ دامۋ باعدارلاماسى اكىمشىسىنىڭ كومەكشىسى يۆانا جيۆكوۆيچپەن كەزدەسۋ وتكىزدى, دەپ حابارلايدى Egemen.kz.
كەزدەسۋگە قاتىسۋشىلار قازاقستان مەن بۇۇ ينستيتۋتتارى اراسىنداعى كوپجاقتى ىنتىماقتاستىقتى دامىتۋ پەرسپەكتيۆالارىن تالقىلادى, سونداي-اق حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
پرەزيدەنت استانا حالىقارالىق فورۋمىنا بەلسەندى قاتىسقانى ءۇشىن ديپلوماتتارعا ريزاشىلىعىن ءبىلدىرىپ, ولاردىڭ بۇۇ اياسىنداعى ۇسىنىستارى فورۋم جۇمىسىنىڭ مازمۇنىن بايىتۋعا ۇلەس قوسقانىن ايتتى.
مەملەكەت باسشىسى بۇۇ-نىڭ بەيبىتشىلىكتى نىعايتۋ, قاۋىپسىزدىك پەن جاھاندىق دامۋدى قامتاماسىز ەتۋ ىسىندەگى ايرىقشا رولىنە نازار اۋداردى. قاسىم-جومارت توقاەۆ بۇۇ قاۋىپسىزدىك كەڭەسىن جان-جاقتى رەفورما جۇرگىزۋ قاجەتتىگىنە جانە وسى ورگاننىڭ وكىلدىگىن كەڭەيتۋدىڭ ماڭىزدىلىعىنا توقتالدى.
پرەزيدەنت وسى امبەباپ ۇيىمنىڭ ءرولىن نىعايتۋ ماقساتىندا قازاقستان بۇۇ-مەن كۇش بىرىكتىرۋگە نيەتتى ەكەنىن راستادى.
قازاقستاندا بۇۇ-نىڭ 20-دان استام بولىمشەسى تابىستى جۇمىس ىستەپ جاتىر. وسى رەتتە الماتى قالاسىندا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى وڭىرلىك ورتالىق قۇرۋ ماڭىزدى ەكەنى اتاپ ءوتىلدى. بۇل ورتالىقتىڭ قىزمەتى 2030 جىلعا دەيىنگى كۇن ءتارتىبىن ىلگەرىلەتۋ ءۇشىن كەشەندى شارالار قابىلداۋ ارقىلى بۇۇ اگەنتتىكتەرىنىڭ وڭىردەگى ەلدەر ۇكىمەتتەرىمەن اراداعى ۇيلەسىمدىلىكتى نىعايتۋعا باعىتتالادى.