الاكول دەمالۋشىلاردى كۇتۋگە دايار

اۋەلى الىستاعى الاكولگە ق­الاي جەتەمىز دەگەن ماسەلەنىڭ الدىن الايىق. بيىل ەمدىك كولگە بارار جول تاقتايداي تەگىس ەكەنىن ايتقىمىز كەلەدى. ول از دەسەڭىز, ۇشاقپەن جىلدام ۇشىپ بارساڭىز دا بولادى. ءسىز ءۇشىن Qazaq Air 22 مامىردان باستاپ ەلوردادان جەتىسۋدىڭ تورىنە كۇن سايىن ۇشپاق نيەتتە. ۇشۋلار جاڭا گەنەراتسيالانعان de-Havilland Dash 8-Q400 كانادالىق اۋە كەمەسىندە ورىندالادى. رەيستەر جەرگىلىكتى ۋا­قىت بويىنشا جۇزەگە اسادى. تۇستەپ كورسەتسەك: IQ 429 استانا 13.00 – تالدىقورعان 14.45; IQ 430 تالدىقورعان 15.15 – استانا 17.05. ۇشۋ كەستەسى تۋرا­لى اقپاراتتى www.flyqazaq.com سايتىنان بىلە الاسىز. بي­لەت­­تەردى برونداۋ جانە ساتىپ الۋ ءۇشىن اۋە كاسسالارىنا حابار­لاسۋعا بولادى. سونداي-اق اۋە كومپانيانىڭ سايتىنان ساتىپ الۋعا مۇمكىندىك بار.

«ەستەرىڭىزگە سالا كەتەيىك, Qazaq air اۋە كومپانياسى قازاقستان قالالارىنان تۇر­كىستان, ومبى جانە ەكاتە­رين­بۋرگكە حالىقارالىق تىكەلەي جا­نە قوسىلاتىن رەيستەردى ورىن­دايدى. www.flyqazaq.com سايتىنان بيلەتتەرگە قازىر­دەن باستاپ تاپسىرىس بەرىپ, بىز­بەن بىرگە ساياحاتتاڭىز» دەلىن­گەن اۋە كومپانياسىنىڭ حابارلاماسىندا.

جاڭا شومىلۋ ماۋسىمىنا دەمالىس ايماقتارىنىڭ يەلەرى مۇقيات دايىندىق ۇستىندە. ولار دەمالۋشىلاردىڭ جاق­سى تىنىعۋى ءۇشىن بارلىق جاعداي­دى جاسايدى. ىسكەر ايەل زۋرا مول­داحانوۆا – تۋربيزنەس ارداگەرى. ونىڭ ايتۋىنشا, 18 جىل ىشىندە تۋريستەر الدەقايدا كوبەيگەن. ناتيجەسىندە, تۇراقتى كليەنتتەر قاتارى ارتقان.

ء«بىز جۇمىستى ءۇشارال قا­لاسىنداعى ءدامحانادان باستا­­دىق. دەمالۋشىلار بۇل جەرگە ۇنەمى تۋىستارىمەن كەلەدى. مۇم­كىن جەر الىپ, تىنى­عۋشى­لار­عا پايداسى بار ارنايى ورىن سالۋ كەرەك شىعار. كول سۋىنىڭ ەم­دىك قاسيەتى بار. ول بۋىن مەن تەرى اۋرۋى بار ادامدارعا جاقسى كومەك­تەسەدى. سول سەبەپتى ساناتوري جاساۋعا بولادى دەپ ويلايمىن», دەيدى كاسىپكەر.

قوناقۇي نومىرىندە تۇرۋ تاۋلى­گىنە 10 مىڭ تەڭگەدەن باستالادى. بىراق پانسيونات يەلەرى جىل سايىن باعانى كوتەرۋگە ءماجبۇر. ويت­كەنى قىزمەتكەرلەر تابۋ قيىن. كاسىپ­كەرلەر ەڭ قيىنى قوقىستىڭ تەز جينالاتىنىن, جاعالاۋدا جۋى­نا­تىن ورىننىڭ جوق ەكەنىن ايتادى.

بيىل شەنەۋنىكتەردىڭ جوسپارى بويىنشا الاكولگە 1,5 ميلليون دەمالۋشى كەلمەك. كولگە ىرگەلەس اۋماقتا 300-گە جۋىق دەمالىس ايماعى بار. جاڭا ماۋسىمدا ولارعا تاعى 14-ءى قوسىلادى.

«ماۋسىمنىڭ اشىلۋىنا دايىن­دىق ءجۇرىپ جاتىر. ءبىز وتان­­­دىق ءتۋريزمدى دامىتۋعا تى­رى­­­سامىز. الاكول كولى ۇزدىك 10 تۋ­ريستىك ورىنعا كىرەدى. سوندىق­تان ءبىز دەمالۋشىلارعا بارلىق جاع­دايدى جاساۋعا تىرىسامىز», دەيدى الاكول اۋدانىنىڭ كاسىپ­كەر­لىك ءبولىمىنىڭ باسشىسى داۋلەت جۋاندىقوۆ.

قالاي بولعاندا دا جاعاجايعا وڭتايلى جەتۋگە ءالى كوپ كۇش جۇم­­­سا­لۋعا ءتيىس. ويتكەنى بۇل جەر­گە تاياۋدا مىڭداعان دەمالۋ­شى اعىلادى. ياعني جەرگىلىكتى بي­لىك پەن كاسىپكەرلەر ءۇشىن وتە ماڭىزدى.

جالپى, وبلىستا تۋريزم سالا­سىنىڭ دا الەۋەتى زور. جەتىسۋ جەرىنىڭ تابيعي-كليمات­تىق جاع­دايىنىڭ قولايلى بولۋىنىڭ ناتي­جەسىندە بىزدە ءتۋريزمنىڭ بار­لىق ءتۇرىن دامىتۋعا مۇمكىن­دىك بار. بۇل ءوز كەزەگىندە تۋريس­تىك باسەكەلەستىكتە ءبىرشاما ەلەۋ­لى ارتىقشىلىق بەرەدى. تۋريستي­فيكاتسيا كارتاسىنا سايكەس باسىم وبەكتىلەر تىزبەسىنە 5 دەس­تيناتسيا: الاكول, بالقاش كول­دەرىنىڭ جاعالاۋلارى, «ال­تىن­­ەمەل», «جوڭعار-الاتاۋ» ۇلتتىق پارك­­­تەرى جانە تەكەلى تاۋ­ل­ا­رى ەنگىزىلدى. ولاردى دامىتۋ ماق­ساتىندا ينفراقۇرىلىمدىق جوبالار ىسكە اسىرىلىپ جاتىر.

«الاكول كولىنىڭ جاعالاۋىن­دا ەكى جىل ىشىندە سەرۆيستى كوتەرىپ, دەمالۋشىلار ءۇشىن ينفرا­قۇرى­لىمدى وتە جاقسى دەڭگەيگە جەت­كىزە الدىق. تۋريستەردى ىڭعايلى جەتكىزۋدى ۇيىمداستىرۋ بويىنشا جۇمىستار جۇرگىزىلۋدە. ءۇشارال قالاسى اۋەجايىنىڭ ۇشۋ-قونۋ جولاعىن قايتا جاڭارتۋ اياقتالىپ, «تالدىقورعان-ءۇشارال» (313,5 كم), ء«ۇشارال-دوستىق» (184 كم) اۆتوموبيل جولدارىنىڭ اسفالتبەتون جابىنى قامتاماسىز ەتىلىپ, «تالگو» جۇردەك پويىزى ىسكە قوسىلدى», دەيدى جاۋاپتى ماماندار.

الاكولدەن بولەك, بالقاش كولى دە تۋريستەر ءۇشىن تارتىمدى ورىن­داردىڭ ءبىرى سانالادى. ونى دامىتۋ باعىتىندا ۇزىن­دى­عى 16,3 شاقىرىم تۋريستىك-رەك­رەاتسيالىق ايماق قۇرىلادى. 40 ملرد تەڭگەدەن اسا ينۆەستيتسيا تارتا وتىرىپ, بولمە قورى 45 مىڭعا جۋىقتايتىن ورنالاس­تىرۋ ورىندارىن سالۋ جوسپارلانىپ جاتىر.

جاعالاۋعا دەيىنگى جولدىڭ قۇرىلىسى كەلەسى ەكى جىل ىشىن­­دە اياقتالادى. سونىمەن قا­تار مەملەكەت باسشىسىنىڭ تاپ­سىر­ماسى بويىنشا جوڭعار الا­­تاۋىنىڭ ەتەگىندەگى تەكەلى قالا­سىندا تۋريستىك ينفراقۇ­رىلىم نىساندارىن سالۋ كوزدەلىپ وتىر. ناتيجەسىندە, 2025 جىلعا دەيىن تارتىلاتىن ينۆەستيتسيالار كو­لەمى 79,1 ملرد تەڭگەگە, ال تۋريس­تەر لەگى 2,4 ملن ادامعا جەتەدى دەپ كۇ­تىلۋدە, بۇل بيۋدجەتتىڭ كىرىس بو­لى­گىنە قوماقتى ۇلەس قوسادى.

جەتىسۋ وبلىسى