تۇلەكتەر تارتۋى

2003 جىلعى تۇلەكتەر مەكتەپ تابالدىرىعىن العاش ات­تا­عاندا ءارىپ تانىتىپ, الىپپە وقىت­قان قاماريا داركەنباەۆا, مايداش تاقاباەۆا, گۇلزيرا نۇرمۇحانبەتوۆا, جۇماگۇل تاجيەۆا, جۇمابيكە سۇپەەۆا سىندى باستاۋىش سىنىپ مۇ­عا­لىمدەرى مەن 11-سىنىپ­تى اياقتاتىپ, اتتەستاتتارىن قولىنا ۇستاتقان كا­دەن جان­­­تۋوۆا, اينۇر بەر­تاە­­ۆا باستاعان ۇلاعاتتى ۇس­تاز­دارىنا ءىلتيپاتتارىن ءبىل­دىر­دى. ءوز كەزەگىندە ۇستازدارى شا­كىرتتەرىنىڭ دۇنيەگە كىر­پىش بولىپ قالانىپ, ورىن تاپقاندارىنا ريزاشى­لىق­تارىن جاۋدىردى. وسىنداي سىي-قۇرمەتپەن ورىلگەن اسەر­لى كەزدەسۋلەرىندە 2003 جىل­دىڭ تۇلەكتەرى ومىردەن ەرتە وتكەن سىنىپتاستارىنا قۇ­ران باعىشتاپ, ەسكە الۋدى دا ۇمىتپادى. سونداي-اق ءىس-شا­رانى ۇيىمداستىرۋشىلار اقىل­داسا كەلىپ, سارىجاز اۋىلىندا تۇراتىن سىنىپتاستارى جازيرا قاباەۆاعا پاتەر ساتىپ الىپ بەردى. سەبەبى جازيرا كا­مالقىزى – اتا-اناسىنان ەرتە ايىرىلىپ, ارتىنان ىلەسكەن التى باۋىرىنا پانا بولىپ, ولاردى تۇگەل اياقتاندىرعان ۇلكەن جۇرەكتى مەيىرىم يەسى. ءوزى دە تۇرمىس قۇرىپ, 2 بالالى بولعاندا كۇيەۋى دۇنيەدەن ءوتىپ, قيىندىقتىڭ قامىتىن كيگەن ەدى. مىنە, تاعدىردىڭ اۋىرتپالىعىن ارقالاپ, باۋىر-تۋعاندارىمەن بىرگە تىرشىلىك ەتىپ جۇرگەن سىنىپتاستارىنىڭ ءوز الدىنا وتاۋ بولۋىنا قول­ۇشىن بەرىپ, قامقورلىق جاساۋ­دى ءجون كورگەن تۇلەكتەر قال­تالارىنان قارجى جيناپ, بەس بولمەلى ءۇيدىڭ كىلتىن تابىستاپ, قۋانىشقا بولەدى. سونىمەن قاتار 20 جىلدىققا كەلگەن تۇلەكتەردىڭ اۋىل مەشى­تىنە التى قانات اقبوز ءۇي سىيلاپ, جومارتتىق جاساعانىن دا ايرىقشا اتاعانىمىز ابزال. ءىس-شارانى ۇيىمداستىرۋشىلار بۇل ءۇردىستىڭ ءجىبىن ۇزبەي جال­عاسۋىن كەيىنگى تۇلەكتەرگە اماناتتادى.

بۇعان قوسا التىنبەك سار­سەنباەۆ اتىنداعى سارىجاز ورتا مەكتەبىنە مىنبەر, ۇس­تەل, جۇمساق جيھاز تابىس ەتىپ, مەكتەپ بۇيىمدارىن جا­ڭارت­تى جانە باستاۋىش سىنىپ وقۋشىلارىنا ەستە­لىك سىيلىقتار بەرىپ, قۋانىش­تارىن ەسە­لەدى. سپور­ت­تىق شارالار ۇيىمداس­تى­رىپ, اۋىل ءىشىن مارە-سارە ەتتى. بۇل كۇندەرى بالالاردىڭ قۋانىش­تارىندا شەك بولماعانى انىق.

ءسويتىپ, سىنىپتاستاردىڭ 20 جىلدىق كەزدەسۋى ويىن-ساۋىقپەن عانا شەكتەلمەي, قا­يىرىمدىلىق شارالارىمەن ءورىلىپ, ەرەكشە ەستە قالارلىق ءارى كوپكە ۇلگى بولارلىق دارەجەدە ۇيىمداستىرىلعانىنا ۇستاز­دارى مەن اۋىلداستارى ءدان ريزا بولىپ, اق باتاسىن بەردى.

الماتى وبلىسى