ەلورداداعى ۇلتتىق مۋزەيدە حالىقارالىق بالالاردى قورعاۋ كۇنىنە ارنالعان «Balavision 2023» بالالار كورمەسى اشىلدى. وندا مۋزەيدەگى كەسكىندەمە جانە گرافيكا ۇيىرمەcىنە قاتىساتىن جاسوسپىرىمدەردىڭ شىعارماشىلىق جۇمىستارى كورسەتىلدى.
– بۇگىنگى كورمە – بالالار ءۇشىن ۇلكەن مەرەكە. ولاردىڭ جىل بويى ورىنداعان جۇمىستارى كورمەگە قويىلدى. سۋرەتتەر ءتۇرلى تەحنيكامەن, كومپوزيتسيامەن, سان الۋان سيۋجەتپەن ورىندالعان. بالالار ءارى قاراي وسىنداي كورمەلەرگە قاتىسىپ, جەڭىسكە جەتە بەرسىن, – دەدى ۇيىرمە جەتەكشىسى, قازاقستان سۋرەتشىلەر وداعىنىڭ مۇشەسى مۇحتار بايبوسىنوۆ.
ەكسكۋرسيا جۇمىستارى, مۋزەي پەداگوگيكاسى جانە ەكسپوزيتسيالىق زالداردى ساقتاۋ قىزمەتىنىڭ باسشىسى جانار بەيىسوۆانىڭ ايتۋىنشا, وسى ۋاقىتقا دەيىن ۇيىرمە 10-نان اسا جەكە كورمە وتكىزگەن. سونداي-اق ۇيىرمەگە قاتىسۋشىلار قايىرىمدىلىق كورمەلەرى مەن بايقاۋلارعا قاتىسقان. «Balavision 2023» كورمەسىنە 25 وقۋشىنىڭ ءار ءتۇرلى سۋرەت سالۋ تەحنيكاسىندا جاسالعان 50-دەن اسا جۇمىسى قويىلدى.
سونىمەن قاتار كورمەنىڭ اشىلۋىندا «باقىتتى بالالىق شاق» اتتى مەرەكەلىك كونتسەرت ۇيىمداستىرىلدى. وعان استاناداعى مۋزىكالىق مەكتەپتەردىڭ ونەرلى وقۋشىلارى قاتىستى.
كەسكىندەمە جانە گرافيكا ۇيىرمەسى بالالار كورمەسىن 2015 جىلدان بەرى وتكىزىپ كەلەدى. ۇيىرمەدەگى وقىتۋ باعدارلاماسى بالانىڭ اسەمدىككە قاتىستى قابىلەتىن جەتىلدىرىپ, ومىردەگى جانە ونەردەگى سۇلۋلىقتى سەزىنە ءبىلۋ قاسيەتىن قالىپتاستىرادى. سونداي-اق ۇيىرمە جەتەكشىلەرى الەمدىك جانە وتاندىق ونەردىڭ تاريحىن وقىتىپ, شىعارماشىلىق تاپسىرمانىڭ ورىندالۋ تەحنيكاسىن مەڭگەرتەدى.
مەرەي اۋعالي,
ل.ن.گۋميلەۆ اتىنداعى ەۇۋ ستۋدەنتى