استانادا 1 ماۋسىم – بالالاردى قورعاۋ كۇنى اياسىندا شاعىن فۋتبولدان Abay CUP ءتۋرنيرى ءوتتى, دەپ حابارلايدى Egemen.kz.
ەلورداداعى اباي قۇنانباي ۇلى اتىنداعى №87 مەكتەپ-گيمنازياسىنىڭ قولداۋىمەن وتكەن تۋرنيرگە 2012-2013 جىلدارى تۋعان التى كوماندا قاتىستى.
بۇل جولعى ءتۋرنيردىڭ ەرەكشىلىگى - ارنايى چەلەندج. ياعني ءبىر ۋاقىتتا استاناداعى بىرنەشە مەكتەپتە ءدال وسىنداي تۋرنير باستاۋ الدى. سونداي-اق قاتىسۋشى بارلىق كومانداعا جۇلدەلەر مەن مەدالدار ۇيلەستىرىلدى. جارىس اينالمالى جۇيەدە ءوتتى. ەرەجەگە ساي بارلىق كوماندا ءبىر-بىرىمەن ءوزارا كەزدەسىپ, جەڭىمپازدى انىقتادى.
«بالالارىمىزدىڭ دەنى ساۋ بولۋى ءۇشىن سپورتپەن اينالىسۋ كەرەك ەكەنى بەلگىلى. سول ماقساتتا ءبىز 1 ماۋسىم – بالالاردى قورعاۋ كۇنىنە وراي فۋتبولدان قالالىق تۋرنير ۇيىمداستىرىپ وتىرمىز. بۇل كۇن بالالار ءۇشىن مەيرام. سول سەبەپتى دە تۋرنيرگە قاتىسقان بالالاردىڭ بارلىعى جۇلدەگە يە بولادى. مۇنداي جارىستار مەكتەبىمىزدە كوپتەپ ۇيىمداستىرىلىپ كەلەدى», دەيدى مەكتەپ ديرەكتورى ايگۇل قاشاەۆا.
تۋرنير قورىتىندىسى بويىنشا ەكى توپتان سۋىرىلىپ شىققان ءتورت كوماندا جارتىلاي فينالدا كەزدەسىپ, فينالدا قاي كوماندانىڭ وينايتىنىن انىقتادى. ناتيجەسىندە فينالدىق ويىندا Alash-2014 كومانداسىن 5:3 ەسەبىمەن جەڭگەن Namys كومانداسىنان جاساقتالعان «اباي» مەكتەبى جەڭىمپاز اتانسا, ءۇشىنشى ورىندى «بىرلىكتەن» 2:1 ەسەبىمەن باسىم بولعان «قازعارىش» مەكتەبى تۇيىندەدى.
«بىزگە وسىنداي تۋرنيرلەر ۇنايدى. سەبەبى بۇل تۋرنير جەڭىسكە جەتۋىمىزگە, چەمپيون بولۋىمىزعا موتيۆاتسيا بەرەدى. Abay CUP ءتۋرنيرىن ۇيىمداستىرۋشىلارعا راحمەت ايتامىن», دەيدى «اباي» مەكتەبىنىڭ وقۋشىسى زاڭعار ابدىكەرىم.
اتالعان تۋرنيردە جەكەلەي كوماندالاردان بولەك, جەكەلەي ويىنشىلاردىڭ دا شەبەرلىگى ەسكەرىلدى. «ەڭ ۇزدىك قاقپاشى» اتالىمى – انۋار جاقانعا (Namys), «ەڭ ۇزدىك قاقپاشى» – جالعاس سەرىككە (Alash), «ەڭ ۇزدىك قورعاۋشى» – دارحان شاكيرگە («بىرلىك»), «ەڭ ۇزدىك شابۋىلشى» ءاليحان داۋلەتبەككە («قازعارىش»), «ەڭ ۇزدىك ويىنشى» مانسۇر امانگەلدىگە (Alash) بۇيىردى.