بۇگىن وقۋ-اعارتۋ ءمينيسترى عاني بەيسەمباەۆ استانا قالاسىنداعى №8 مەكتەپ-ليتسەيىندە وتكەن سالتاناتتى جيىنعا قاتىستى. ءىس-شارا بارىسىندا باق وكىلدەرىمەن سۇحباتتاسقان مينيستر ءوزى وقۋشى بولعان كەزىن ەسكە الدى, دەپ حابارلايدى Egemen.kz.
ءمينيستردىڭ ايتۋىنشا, اتا-اناسىنىڭ كوڭىلىنەن شىعۋ ءۇشىن ول ۇنەمى ءمىنسىز وقۋعا تىرىسقان. ال اناسى جاقسى باعا العان بالاسىن ەركەلەتىپ, ءدامدى تاعامداردار ءپىسىرىپ بەرەتىن.
«مەنىڭ اتا-انام, اسىرەسە انام مەنىڭ باعالارىمدى قاداعالاپ وتىراتىن. مەن جاقسى باعا العان سايىن انام ءتاتتى مەن توقاش پىسىرەتىن», دەدى عاني بەيسەمباەۆ.
مينيستر ۇنەمى ءتورت پەن بەسكە وقىعانىن ايتتى. بىراق ءبىر رەت «ەكىلىك» العانىن جاسىرمادى.
«مەن 11-سىنىپتا «باستاپقى اسكەري دايىندىق» پانىنە قاتىسا المادىم. ارنايى فورمام بولعان جوق. سول سەبەپتى «ەكىلىك» العانمىن», دەدى بەيسەمباەۆ.
ءمينيستردىڭ ايتۋىنشا, ول ءوزىنىڭ مەكتەپتەن تۇلەپ ۇشقان ءساتىن ەسىندە جاقسى ساقتاعان. بىراق سول جىلدارى تۇلەكتەر ءۇشىن ءبىتىرۋ كەشى ۇيىمداستىرىلماعان.
«مەنىڭ مەكتەپ بىتىرگەنىمە 30 جىلدان اسىپ كەتتى. ءبىزدىڭ ۋاقىتتا ەشقانداي مەرەكەلىك شارالار بولعان جوق. بىراق مۇعالىم اتانعان ساتتەن باستاپ بالالارمەن بىرگە قۋاناتىنمىن», دەدى مينيستر.
عاني بەيسەمباەۆتىڭ ايتۋىنشا, سوڭعى قوڭىراۋدىڭ 1 ماۋسىمعا اۋىستىرىلۋى مەكتەپ وقۋشىلارى مەن ولاردىڭ اتا-انالارىنىڭ كوڭىل-كۇيىنە اسەر ەتكەن جوق.