مىناۋ الەمدەگى تسيفرلىق دۇنيەنىڭ دامۋىندا توقتاۋ جوق. جىل سايىن ەمەس, كۇن سايىن قارىشتاپ بارادى. بۇل كوشكە كىدىرىسسىز ىلەسۋ ءۇشىن تەحنيكا ءتىلىن مەڭگەرگەن ماماندار دايارلاپ, بىلىمدەرىن ۇشتاپ, باعىت-باعدار بەرىپ وتىرۋىمىز قاجەت. سوندىقتان دا شىعار, وسكەمەندە كاسىبي IT جوبالارمەن اينالىساتىن ستۋدەنتتەردى قولداۋ ءۇشىن IT حاب اشىلدى.
ايماقتىق IT حاب ورتالىعىنىڭ اشىلۋ سالتاناتىنا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين قاتىستى.
«سمارت سيتي» جوبالارى بويىنشا وسكەمەن قالالار اراسىنداعى رەيتينگ بويىنشا ءۇشىنشى ورىندا. جامان كورسەتكىش ەمەس. اشىلعان IT حاب تەك قانا باستاما رەتىندە جاسالىپ جاتىر. بىراق بولاشاعى زور. ويتكەنى «Astana Hub» ورتالىعىمەن بىرلەسىپ اشىلدى. بۇعان ۋنيۆەرسيتەتتەر دە كومەكتەسەدى. مۇنىڭ نەگىزگى ماقساتى – IT سالاسىنداعى جۇمىس ىستەپ جۇرگەن مامانداردى ءبىر ورتاعا جيناۋ جانە ىنتالاندىرۋ, مەملەكەت تاراپىنان قولداۋ كورسەتۋ», دەدى ب.مۋسين.
سونىمەن قاتار شىعىس قازاقستان وبلىسىنىڭ اكىمدىگى, «Astana Hub» تەحنوپاركى, د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتى اراسىندا ۇشجاقتى ىنتىماقتاستىق تۋرالى مەموراندۋمعا قول قويدى.
ايتا كەتەرلىگى, IT حابتىڭ اشىلۋىنا وبلىس اكىمدىگى ۇلكەن كومەك كورسەتتى. ماتەريالدىق-تەحنيكالىق بازامەن تولىقتاي قامتاماسىز ەتىپ, ورىن قاراستىردى. ال «Astana Hub» تاراپىنان ادىستەمەلىك جانە ۇيلەستىرۋ جۇمىستارى بويىنشا قولداۋ كورسەتىلدى. قولعا الىنعان جۇمىستىڭ تولىقتاي اياقتالۋىنا د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىنىڭ IT ماماندارى زور ۇلەس قوستى.
ەندىگى كەزەكتە IT حاب شەڭبەرىندە ۇلكەن جۇمىس اتقارىلۋعا ءتيىس. وسى ورايدا ورتالىقتىڭ بەلسەندىلەرى وبلىس جاستارىن ءىت حابقا شاقىرادى. اسىرەسە بولاشاق ءىت مامانداردىڭ ورتالىقپەن ۇنەمى بايلانىستا بولعانى ابزال.
وسكەمەن