31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي باتىس قازاقستان وبلىسىنىڭ قازتالوۆ اۋدانى ورتالىعىندا «بەسەۋدىڭ حاتى» ەسكەرتكىش تاقتاسى اشىلدى.
«بەسەۋدىڭ حاتى» – قازاق دالاسىندا «كىشى وكتيابردىڭ» قارا داۋىلى سوعىپ, قالىڭ جۇرت جاپپاي اشارشىلىققا ۇشىراعان كەزدە شىققان زيالىلاردىڭ جانايقايى بولاتىن. 1930 جىلدارى قولدان ۇيىمداستىرىلعان زىميان ساياساتقا قارسىلىق بىلدىرگەن عابيت مۇسىرەپوۆ, مانسۇر عاتاۋلين, ەمبەرگەن التىنبەكوۆ, مۇتاش داۋلەتقاليەۆ, قادىر قۋانىشەۆ سىندى قازاق وقىعاندارى ستالينگە حات جازادى. سول زاماننىڭ شىڭعىرعان شىندىعىن كورسەتكەن نارازىلىق حاتى سول كەزدە ەل باسقارعان گولوششەكيننىڭ قولىنا تۇسكەن. ارينە, ونىڭ سوڭى تراگەديامەن اياقتالدى. حاتتىڭ جازىلۋىنا تۇرتكى بولعان حالكوم كەڭەسىنىڭ توراعاسى وراز يساەۆ تا, «بەسەۋدىڭ حاتىن» ءوز موينىنا العان مانسۇر عاتاۋللين دە «وتىز جەتىنىڭ» قاندى قىرعىنىندا اتىلىپ كەتتى. حالىق جازۋشىسى شەرحان مۇرتازا وسى ءبىر تاريحي وقيعا جايىندا «بەسەۋدىڭ حاتى» اتتى دراما جازىپ, جاس ۇرپاققا ءتالىم بەرەر, حالىق قاسىرەتىن ۇقتىرار تۋىندى قالدىرعان بولاتىن.
وسى وقيعاداعى مانسۇر عاتاۋللين – ءدال وسى قازتالوۆ اۋدانىنىڭ تۋماسى ەدى. جەرلەستەرى ەل باسىنا كۇن تۋعان سىن ساتتە باسىن قاتەرگە تىگىپ العا شىققان باتىر ۇلدى ماقتانىش ەتەدى. قازتالوۆ اۋىلىنىڭ ورتالىعىنداعى «جەڭىس» ساياباعىندا بوي كوتەرگەن تاريحي ەسكەرتكىش اۋىل تۇرعىندارىنىڭ پاتريوتتىق سەزىمىنىڭ كورىنىسىندەي. اكادەميك, سۋرەتشى ماقسۇت يسماعۇلوۆتىڭ جوباسى بويىنشا جاسالعان ەسكەرتكىش تاقتا قاراپايىمدىلىعىمەن كوز تارتادى. شاعىن كومپوزيتسيادا اق پەن قارا ءتۇس كلاسسيكالىق تۇرعىدا ۇيلەسىم تاۋىپ تۇر. حات اۆتورلارىنىڭ ەسىمى جازىلعان تاقتا قۇستىڭ سىڭار قاناتىنا ۇقسايدى. سول ارقىلى اۆتور زوبالاڭ جىلداردىڭ زورلىعىن كورسەتكەن.
تاقتانىڭ اشىلۋ سالتاناتىندا ءسوز سويلەگەن قازتالوۆ اۋدانى اكىمى اسلانبەك سارقۇلوۆ وڭىردە پرەزيدەنت تاپسىرماسىنا وراي تاريحي ادىلدىكتى قالپىنا كەلتىرۋ, ساياسي قۋعىن-سۇرگىن قۇرباندارىن اقتاۋ بويىنشا جۇمىستارعا جەرگىلىكتى ازاماتتاردىڭ دا اتسالىسىپ جاتقانىن ايتتى.
- ساياسي قۋعىن-سۇرگىن مەن اشارشىلىق تاقىرىبىن قوزعاعان كەزدە ءبىز «بەسەۋدىڭ حاتىن», جەرلەسىمىز مانسۇر عاتاۋلليندى ويعا الامىز. ەل مەن جەر تاريحىن جوقتاپ جۇرەتىن سەرىك جۇماعاليەۆ, ءۋاليوللا ابىشەۆ سىندى ولكەتانۋشىلارىمىزدىڭ باستاماسىمەن, حالىقتىڭ قولداۋىمەن بۇگىن وسى ەسكەرتكىش تاقتانى اشىپ وتىرمىز. وسى ساۋاپتى ىسكە قولداۋ كورسەتكەن بارشا جانعا شەكسىز ريزاشىلىعىمدى بىلدىرەمىن, - دەدى اۋدان اكىمى.