كوكشەتاۋدا ماعجان اقىن ۇلىقتالدى

الدىمەن جىرسۇيەر قاۋىمنىڭ نازارىنا جان جۇرەگىڭدى شىمىرلاتىپ, ۇلت قامىن جەگەن ۇلىلاردىڭ كوكىرەگىندەگى اسىل ارمان, ىزگى مۇرات يشاراسى ۇسىنىلدى. مىڭ قۇبىلعان زاماندا سوڭىنان ەرگەن, مەدەت تۇتقان التى الاشىن قالاي امان الىپ شىعۋدى ويلاپ, جار شەتىندە تۇرعان كەنەسارى بەينەسى. ازاتتىق جولىنداعى ارپالىس. سوڭعى شەشىم. قاۋمالاعان قارا بۇلتتىڭ ار جاعىنان سەبەزگىلەپ ساۋلە كورىنەدى.

زامان الماسقان. كۇنى كەشە التى الاشتى سوڭىنان ەرتۋدى ارمان ەتكەن كەنەسارىدان كەيىن جالىندى جىرىمەن جارق ەتىپ ماعجان شىعادى كەڭىستىككە. الاش اسپانى ءالى دە تۇنەرىپ تۇر. اقىن جۇرەگىن جارىپ شىققان جالىندى جىرلارىمەن الديلەمەك, كۇرەسكەرلىك, قايراتكەرلىك رۋحىمەن دەم بەرمەك, سىرلى سازىمەن جەبەمەك. كونفەرەنتسيانى ش.ءۋاليحانوۆ اتىنداعى كوكشەتاۋ ۋنيۆەرسيتەتىنىڭ رەكتورى, بەلگىلى عالىم مارات سىرلىباەۆ اشىپ, جۇرگىزىپ وتىردى. وبلىس اكىمىنىڭ ءبىرىنشى ورىنباسارى ەلدوس رامازانوۆ وبلىس اكىمى ەرمەك مارجىقپاەۆتىڭ جىر الىبىنا دەگەن ءىلتيپاتىنا ورانعان جۇرەكجاردى قۇتتىقتاۋىن جەتكىزدى. كوكشەگە ارنايى كەلگەن فيلولوگيا عىلىمدارىنىڭ دوكتورى, پروفەسسور, ۇلتتىق عىلىم اكادەمياسىنىڭ اكادەميگى, الاشتانۋشى, ساياسي قۋعىن-سۇرگىن قۇرباندارىن اقتاۋ جونىندەگى مەملەكەتتىك كوميسسيانىڭ مۇشەسى, «قازاق گازەتتەرى» سەرىكتەستىگىنىڭ باس ديرەكتورى ديحان قامزابەك ۇلى «ماعجان تۇلعاسى جانە مەملەكەتشىلدىك» اتتى مازمۇندى بايانداما جاسادى. سونداي-اق تاريح عىلىمدارىنىڭ دوكتورى, پروفەسسور, ساكەن سەيفۋللين مۋزەيىنىڭ باسشىسى مارات ابسەمەتوۆ, بەلگىلى عالىم باقتىباي ءجۇمادىلدين, كوكشەتاۋلىق جازۋشى-دراماتۋرگ جابال ەرعاليەۆ, ش.ءۋاليحانوۆ اتىنداعى كوكشەتاۋ ۋنيۆەرسيتەتىنىڭ وقىتۋشىسى, عالىم ەربولات بايات ۇلى, استانا قالاسىنداعى جاستار تەاترىنىڭ اكتەرى مەيىرعات امانگەلديندەر ءسوز سويلەپ, ماعجان اقىننىڭ سان قىرىن اشىپ كورسەتتى.

ءسوز ونەرىن ايرىقشا سىيلايتىن كوكشە توپىراعىندا ءاردايىم جۇلدىزى جوعارى ماعجان اقىننىڭ بار مۇراسى تولايىم حالقىمەن قايتا تابىسقان اسەرلى دە ادەمى كەش بولدى بۇل.