يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ ايتۋىنشا, جىل سوڭىنا دەيىن تاعى 9 جاڭا حالىقارالىق اۋە مارشرۋتى اشىلادى. بۇل تۋرالى مينيستر كەزەكتى ۇكىمەت وتىرىسىندا ايتتى, دەپ حابارلايدى Egemen.kz.
«2022 جىلدىڭ قورىتىندىسى بويىنشا وتاندىق اۆياكومپانيالار 11 ملن جولاۋشىنى تاسىمالدادى. بۇل 2021 جىلمەن سالىستىرعاندا 17%-عا ارتىق. ءوسۋ قارقىنى بيىل دا ساقتالىپ وتىر. سونىمەن قاتار اۋە ءترانزيتى دە جوعارى قارقىنمەن ءوسىپ جاتىر. ماسەلەن, 2022 جىلى قىزمەت كورسەتىلگەن ۇشۋ كولەمى 410 مىڭ ۇشاقتى قۇرادى, بۇل 2021 جىلعى كورسەتكىشتەن 90%-عا ارتىق», دەدى مارات قاراباەۆ.
ءمينيستردىڭ بايانداۋىنشا, بۇگىنگى تاڭدا اپتاسىنا 56 ىشكى اۆيامارشرۋت بويىنشا 706 رەيس ورىندالادى, 103 باعىت بويىنشا 27 ەلگە حالىقارالىق تاسىمالداۋ قامتاماسىز ەتىلەدى.
سونداي-اق جىل سوڭىنا دەيىن دوحا, كۋالا-لۋمپۋر, انكارا, كاراچي, لاحور, دجيددا, ماسكات, پراگا جانە تەل-اۆيۆكە تاعى 9 جاڭا حالىقارالىق مارشرۋت اشىلادى دەپ جوسپارلانىپ جاتىر.
2025 جىلعا دەيىن مۋمباي, گونكونگ, ۆەنا, توكيو, سينگاپۋر, نيۋ-يورك جانە باسقا قالالارعا رەيستەر اشىلادى.
«قازىرگى ۋاقىتتا قازاقستاننىڭ ۇشۋ قاۋىپسىزدىگى ستاندارتتارىنا سايكەستىك دەڭگەيى 82% قۇرايدى. بۇل – تاۋەلسىز مەملەكەتتەر دوستاستىعى ەلدەرى اراسىنداعى ەڭ جوعارى كورسەتكىشتەردىڭ ءبىرى. قازاقستان دانيا مەن پولشا سياقتى ەۋروپالىق وداق ەلدەرىمەن ءبىر دەڭگەيدە تۇر.
2023 جىلى الماتى, شىمكەنت, قىزىلوردا جانە قوستاناي قالالارىنداعى اۋەجايلاردى جاڭعىرتۋ جۇمىستارى جوسپارلانعان. مەملەكەت باسشىسىنىڭ تاپسىرماسىنا سايكەس پاۆلودار قالاسى اۋەجايىنىڭ ۇشۋ-قونۋ جولاعىن, بالقاش قالاسى اۋەجايىنىڭ پەررونىن جانە رۋلدەۋ جولاعىن رەكونسترۋكتسيالاۋ ماسەلەسى پىسىقتالىپ جاتىر», دەدى مينيستر.
سالانى ودان ءارى دامىتۋ بويىنشا ۇشۋ قاۋىپسىزدىگى ستاندارتتارىنا سايكەستىك دەڭگەيىن 90%-عا دەيىن ارتتىرۋ, حالىقارالىق مارشرۋتتاردى ۇلعايتۋ, اۋەجايلاردىڭ بارلىق تەرمينالىن رەكونسترۋكتسيالاۋ جوسپارلانىپ جاتىر.