ەل اۋماعىنان كومىر مەن ليگنيتتى (سۋلى, تومەن كالوريالى جانە اعاشتىڭ قوسىندىلارى بار قوڭىر كومىردىڭ ءبىر ءتۇرى) اۆتوموبيل كولىگىمەن اكەتۋگە 6 ايعا شەكتەۋ ەنگىزىلدى, دەپ حابارلايدى Egemen.kz.
يدم ءباسپاسوز قىزمەتىنىڭ ايتۋىنشا, اتالعان ءتارتىپ حالىقتى جانە كوممۋنالدى-تۇرمىستىق سەكتوردى كومىرمەن قامتاماسىز ەتۋ, سونداي-اق جىلۋ بەرۋ ماۋسىمىنا دايىندىق پەن وسى كەزەڭدەگى ەنەرگەتيكالىق قاۋىپسىزدىكتى ساقتاۋ ماقساتىندا ىقتيمال دۇربەلەڭدى الدىن الۋ ءۇشىن قولعا الىندى.
بۇل شەكتەۋگە سايكەس:
– تاس كومىر, بريكەتتەر, تۇيىرشىكتەر جانە قاتتى وتىننىڭ ۇقساس تۇرلەرى, كومىردەن الىنعان – تاس كومىر, شاڭدى كومىر نەمەسە شاڭسىز, بىراق اگلومەراتسيالانباعان (ەۋرازيالىق ەكونوميكالىق وداقتىڭ سىرتقى ەكونوميكالىق قىزمەتىنىڭ تاۋار نومەنكلاتۋراسىنىڭ تن ۆەد 2701 كودى بويىنشا);
– گاگاتتان باسقا اگلومەرلەنبەگەن نەمەسە كومىرتەكسىز ليگنيت نەمەسە قوڭىر كومىردى 6 اي مەرزىمگە اۆتوموبيل كولىگىمەن شىعارۋعا تىيىم سالىندى (تن ۆەد 2702).
ۋاقىتشا ەنگىزىلىپ وتىرعان شەكتەۋ بيىل 22-ءشى اقپاندا وتكىزىلگەن سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ وتىرىسىندا قولداۋ تاپتى.