بابا مۇراسىن ساقتاۋ – ۇلت كەلەشەگىن قالىپتاستىرۋدىڭ نەگىزى. ءال-فارابي بابامىز ايتقانداي, «وتكەندى بىلمەي, بولاشاقتى بولجاۋ مۇمكىن ەمەس». سارعايعان تاريح پاراعىن ساقتاۋ ۇرپاقتىڭ ساناسىن قورعاۋ ىسپەتتى.
ۇلتتىق مۋزەيدە «مۋزەيدىڭ قور ساقتاۋ قىزمەتىن ۇيىمداستىرۋ: تەورياسى مەن پراكتيكاسى» سيمپوزيۋمى بولىپ ءوتتى. ءىس-شارادا ءارتۇرلى ىرگەلى تاقىرىپتارعا بايانداما جاسالىپ, قوردالى ماسەلەلەر كوتەرىلدى. العاشقى بولىپ ءسوز العان ۇلتتىق مۋزەي ديرەكتورى ايبەك سىدىقوۆ جيىندى وتكىزۋ ماقساتىنا توقتالدى.
سيمپوزيۋم ءۇش كەزەڭنەن تۇردى: پلەنارلىق وتىرىس, پانەلدىك سەسسيالار جانە پراكتيكالىق ساباق. ءىس-شارادا «مۋزەيلىك قۇندىلىقتار: جيناقتاۋ, ەسەپكە الۋ, ساقتاۋ», «قور ىرىكتەۋ كوميسسياسىنىڭ وتىرىسىن ۇيىمداستىرۋ» سىندى باياندامالار جاسالىپ, قوناقتاردىڭ نازارىن اۋدارتتى.
– باسقوسۋدا ۇلتتىق مۋزەيدەگى قور جۇمىسى, ونى ۇيىمداستىرۋ, زاتتارمەن قالاي جۇمىس ىستەۋ, ساقتاۋ, ەسەپكە الۋ, ولاردى جيناۋ ماسەلەلەرى قاراستىرىلدى. وسى ورايدا قىزمەتكەرلەرىمىز ايماقتاردان كەلگەن قور ساقتاۋشى ماماندارمەن تاجىريبە الماستى. جيىندا قور جيناقتاۋ ماسەلەسى كوتەرىلدى. نەگىزى قور جيناقتاۋ ءىسى وتە كۇردەلى جۇمىس. بۇل تۇرعىدا ادامدارمەن بايلانىستا بولۋ, مەكەمەلەرگە حات جازۋ, ىسساپارلارعا بارۋ, ارحەولوگيالىق, ەتنوگرافيالىق ەكسپەديتسيالارعا قاتىسۋ, ولاردان اكەلگەن زاتتاردى دۇرىستاپ قۇجاتتاۋ ماسەلەلەرى تۋىندايدى, – دەيدى ۇلتتىق مۋزەيدىڭ باس ساقتاۋشىسى باتەش راحمەتجانقىزى.
سيمپوزيۋمدا قۇندى وي-پىكىرلەر ايتىلىپ, ءىس-شارا سوڭىندا مۋزەي قىزمەتكەرلەرى مەن قوناقتارعا ارنايى سەرتيفيكات تابىستالدى.