ادىلەت مينيسترلىگىندە پارلامەنت ءماجىلىسى زاڭناما جانە سوت-قۇقىقتىق رەفورما كوميتەتىنىڭ «ادۆوكاتتار مەن زاڭ كەڭەسشىلەرىنىڭ بىلىكتى زاڭ كومەگىن كورسەتۋى» تاقىرىبىندا كوشپەلى وتىرىسى ءوتتى.
دوڭگەلەك ۇستەلگە ءماجىلىس دەپۋتاتتارى, ادىلەت, ىشكى ىستەر, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىنىڭ, باس پروكۋراتۋرا جانە ۇقك وكىلدەرى, رەسپۋبليكالىق ادۆوكاتتار القاسىنىڭ توراعاسى, زاڭ كونسۋلتانتتارى پالاتالارى قاۋىمداستىقتارىنىڭ, رەسپۋبليكالىق نوتارياتتىق پالاتانىڭ, رەسپۋبليكالىق جەكە سوت ورىنداۋشىلارى پالاتاسىنىڭ, مەملەكەتتىك ورگاندار مەن ۇيىمداردىڭ وكىلدەرى مەن حالىقارالىق ساراپشىلار قاتىستى.
ءىس-شارا باسىندا ماماندار زاڭ كومەگىن كورسەتۋ سالاسىن جەتىلدىرۋ جانە ونى اۆتوماتتاندىرۋ بويىنشا جۇمىستى جالعاستىرۋ ماسەلەلەرىن تالقىلادى. جيىندى زاڭناما جانە سوت-قۇقىقتىق رەفورما كوميتەتىنىڭ توراعاسى سنەجاننا يماشەۆا اشىپ, ادىلەت ءمينيسترى ازامات ەسقاراەۆ كىرىسپە ءسوز سويلەدى. مەملەكەت باسشىسى ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا زاڭ قىزمەتتەرىن كورسەتۋگە ەرەكشە نازار اۋدارۋدى تاپسىرعانىن اتاپ وتكەن مينيستر: «زاڭ كومەگىن كورسەتۋ سالاسىنداعى وزەكتى ماسەلەلەردى تالقىلاۋ بويىنشا كوشپەلى كەڭەس وتكىزۋ ۋاقتىلى جانە وزەكتى. بۇگىنگى وتىرىس بارىسىندا ايتىلعان ۇسىنىستاردى ىسكە اسىرۋ جونىندەگى ناقتى شارالار كوميتەتتىڭ ۇسىنىمدارىندا كورسەتىلەتىن بولادى. كەلەشەكتە ءبىز ولاردى وسى سالاداعى زاڭنامانى جەتىلدىرۋ جونىندەگى جۇمىس شەڭبەرىندە ەسكەرەمىز», دەدى.
بۇگىنگى تاڭدا رەسپۋبليكا بويىنشا 5 891 ادۆوكات جانە 13 010 زاڭ كەڭەسشىسى زاڭ كومەگىن كورسەتۋدە. «2022 جىلعى 20 ماۋسىمنان باستاپ «ادۆوكاتتىق قىزمەت جانە زاڭ كومەگى تۋرالى» زاڭعا تەگىن زاڭ كومەگىنە كەپىلدىك بەرىلگەن ادامدار توبىن كەڭەيتەتىن وزگەرىستەر ەنگىزىلدى. ەندى از قامتىلعان جانە كوپبالالى وتباسىلار, تۇرمىستىق زورلىق-زومبىلىق قۇرباندارى, ازاپتاۋ قۇرباندارى, 1 جانە 2-ساناتتاعى مۇگەدەكتەر, زەينەتكەرلەر تەگىن كومەك الا الادى», دەدى ادىلەت ۆيتسە-ءمينيسترى بەكبولات مولدابەكوۆ.
ادىلەت ۆيتسە-ءمينيسترىنىڭ ايتۋىنشا, وسى وزگەرىستەردەن كەيىن مەملەكەت كەپىلدىگى ارقاسىندا زاڭ كومەگىن العان ازاماتتار سانى ارتقان. مىسالى, 2021 جىلى زاڭ تۇرعىسىنداعى كومەك 122 337 ازاماتقا بەرىلسە, 2022 جىلى 169 495 ازاماتقا كورسەتىلدى.
دەگەنمەن, ۆيتسە-مينيستر ەلىمىزدىڭ كەيبىر وڭىرلەرىندە مەملەكەت تاراپىنان بەرىلگەن كەپىلدىك تۋرالى كوپ ادام ەستىمەگەنىن, ياعني حالىققا ءتۇسىندىرۋ جۇمىستارى كەمشىن بولىپ جاتقانىن اتاپ ءوتتى. «بۇل رەتتە جەكەلەگەن سۋبەكتىلەردەن قۇقىقتىق اقپارات الۋ جانە زاڭ كومەگىن الۋ قۇقىعى بويىنشا سۇراقتار تۋىندايدى. اتاپ ايتقاندا, اقمولا وبلىسىندا بار بولعانى 846 ازاماتقا زاڭگەرلىك كەڭەس بەرىلسە, سالىستىرمالى تۇردە وسىنداي حالىق سانى بار باتىس قازاقستان وبلىسىندا 3 مىڭنان استام ازاماتقا زاڭگەرلىك كەڭەس بەرىلگەن. اكىمشىلىك ىستەر بويىنشا دا جاعداي وسىنداي, شىمكەنتتە بار بولعانى 120 ازاماتقا كومەك كورسەتىلسە, (2023 جىلى – 3), الماتىدا 1 800-گە جۋىق ازامات (2023 جىلى – 519) كومەك العان. وسىعان بايلانىستى قۇقىق قورعاۋ جانە مەملەكەتتىك ورگاندار, ادۆوكاتتار القالارى مەن سوت ورگاندارىنا حالىق اراسىندا زاڭ كومەگىن الۋ مۇمكىندىگى تۋرالى ءتۇسىندىرۋ جۇمىستارىن كۇشەيتۋ قاجەت دەپ سانايمىز», دەدى ول.
وتىرىستا قاتىسۋشىلار زاڭ كومەگىن كورسەتۋ جۇيەسىن ودان ءارى جەتىلدىرۋ, «ە-زاڭ كومەگى» اقپاراتتىق جۇيەسىن دامىتۋ, سونداي-اق دەپۋتاتتاردىڭ ۇسىنىمدارىندا كورسەتىلەتىن ادۆوكاتتار مەن زاڭ كونسۋلتانتتارىنا ساعاتتىق مولشەرلەمە بويىنشا ۋاقىتتى ىقشامداۋ جولىمەن زاڭ كومەگىن كورسەتكەنى ءۇشىن تولەمدى ۇلعايتۋ ماسەلەسى بويىنشا تۇزەتۋلەر ەنگىزۋ جونىندە ۇسىنىستار ايتتى.