قازاقستان پرەمەر-ءمينيسترى ءاليحان سمايىلوۆ دوحادا ءوتىپ جاتقان ءۇشىنشى قاتار ەكونوميكالىق فورۋمى اياسىندا قاتار پرەمەر-ءمينيسترى – سىرتقى ىستەر ءمينيسترى شەيح مۇحاممەد بين ابدۋراحمان ءال تانيمەن كەلىسسوز جۇرگىزدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
تاراپتار ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى. اتاپ ايتقاندا, ساۋدا, اگروونەركاسىپتىك كەشەن, ينۆەستيتسيا تارتۋ جانە ازاماتتىق اۆياتسيا سالالارىنداعى ءوزارا ءىس-قيمىلدى ودان ءارى نىعايتۋ پەرسپەكتيۆالارى قارالدى.
ءاليحان سمايىلوۆ سوڭعى جىلدارى قازاقستان مەن قاتاردىڭ ەكىجاقتى قارىم-قاتىناستارى ورنىقتى دامىپ كەلە جاتقانىن, بۇعان ەكى مەملەكەت كوشباسشىلارىنىڭ بەلسەندى بايلانىستارى ىقپال ەتكەنىن اتاپ ءوتتى.
«استانا ەكىجاقتى جانە كوپجاقتى فورماتتا دوحامەن ءوزارا ءىس-قيمىلدىڭ جوعارى دەڭگەيىن ساقتاۋعا ءارى نىعايتۋعا نيەتتى», دەدى پرەمەر-مينيستر.
ول قازاقستان ەكونوميكاسى ءۇشىن اگروونەركاسىپتىك كەشەن ستراتەگيالىق سالالاردىڭ ءبىرى بولىپ سانالاتىنىن جانە ونىڭ الەۋەتى جوعارى ەكەنىن باسا ايتتى.
«قازىرگى ۋاقىتتا ەت جانە ەت ونىمدەرىن, سونداي-اق جالپى ازىق-ت ۇلىك تاۋارلارىن شىعاراتىن قازاقستاندىق كومپانيالاردىڭ كوپ بولىگى ءوز ونىمدەرىن قاتار نارىعىنا ەكسپورتتاۋعا مۇددەلى بولىپ وتىر. وسىعان بايلانىستى مەن ءبىزدىڭ ەلدەرىمىز اراسىندا حالال سەرتيفيكاتتارىن كەلىسۋ راسىمدەرىن جەدەلدەتۋ ورىندى دەپ سانايمىن», دەدى ءاليحان سمايىلوۆ.
سونىمەن قاتار, ول قازاقستاندىقتار مەن قاتارلىقتاردىڭ ەكى باعىتتاعى تۋريستىك ساپارلارعا دەگەن قىزىعۋشىلىعى ارتىپ كەلە جاتقانىن اتاپ ءوتتى. تاراتا ايتقاندا, بۇعان Qatar Airways اۋەكومپانياسىنىڭ الماتىعا تىكەلەي رەيستەرىنىڭ ارتقانى ىقپال ەتتى. ءوز كەزەگىندە, قازاقستاندىق Fly Arystan كومپانياسى دا وسى جىلدىڭ سوڭىنا دەيىن استانادان دوحاعا تۇراقتى رەيستەردى باستاۋدى جوسپارلاپ وتىر.
ءوز تاراپىنان شەيح مۇحاممەد بين ابدۋراحمان ءال ءتاني ەكىجاقتى ىنتىماقتاستىقتىڭ بارلىق سپەكترى بويىنشا ءوزارا ءتيىمدى ءىس-قيمىلدى نىعايتۋعا دايىن ەكەندىگىن ءبىلدىردى.