اباي وبلىسىنداعى ءىرى ورمان ءورتىن ءسوندىرۋ 18 ساعاتقا جۋىق ۋاقىتتان بەرى جالعاسىپ جاتىر. جالىن 1100 گەكتار اۋماقتى شارپىعان, دەپ حابارلايدى Egemen.kz.
سوڭعى مالىمەتتەر بويىنشا, 23 مامىر كۇنى تاڭەرتەڭ اباي وبلىسىنداعى ورمان ءورتىنىڭ اۋماعى 1100 گەكتاردى شارپىدى. وبلىس اكىمىنىڭ ايتۋىنشا, ەلدى مەكەندەرگە قاۋىپ ءتونىپ تۇرعان جوق. قاۋىپتى ايماقتان ادامداردى شۇعىل شىعارۋ ءۇشىن بارلىق قىزمەتتەر دايىن.
ساعات 05:50-دە توتەنشە جاعدايلار دەپارتامەنتى مەن ورمان شارۋاشىلىعىنىڭ كۇشتەرى ءورت ءسوندىرۋدى جالعاستىرىپ جاتىر.
سونداي-اق مي-873 ۆسۋ تىكۇشاعى استانادان ساعات 7:00-دە ۇشادى دەپ حابارلاندى.
اباي وبلىسى توتەنشە جاعدايلار دەپارتامەنتىنەن جەكە قۇرامنىڭ 68 ادامى مەن 20 دانا تەحنيكاسى, شىعىس قازاقستان وبلىسى توتەنشە جاعدايلار دەپارتامەنتىنەن 30 ادام مەن 7 تەحنيكا, ورمان شارۋاشىلىعىنان 147 ادام مەن 56 تەحنيكا, 4 ادام جانە وبلىستىڭ جەرگىلىكتى اتقارۋشى ورگاندارىنان 56 دانا تەحنيكا, سۋ تاسىعىش - 4 كاماز تارتىلدى.
2023 جىلدىڭ 22 مامىرىندا «101» پۋلتىنە التاي ايماعىنداعى «اۋىل» ستانساسىنان 7 شاقىرىم جەردە, نوۆەنكويا اۋىلىندا بورودۋليحا اۋدانىندا قۇرعاق ءشوپ ورتەنىپ جاتقانى تۋرالى حابارلاما تۇسكەن.