ءورت 15 قاباتتى ءۇيدىڭ ءدالىزىنىڭ قوسالقى بولمەسىنەن شىققان, دەپ حابارلايدى Egemen.kz.
19 مامىر كۇنى ساعات 11:40 شاماسىندا اتىراۋ قالاسى ايتەكە بي كوشەسى مەكەنجايىندا ورنالاسقان 15 قاباتتى ءۇيدىڭ ءدالىزىنىڭ قوسالقى بولمەسىندە ءورت شىققان. جالىن شارپىعان ۇيگە اتىراۋ قالالىق پوليتسيا باسقارماسىنىڭ اعا ۋچاسكەلىك پوليتسيا ينسپەكتورلارى سامالبەك بەگاليەۆ پەن اسىلانبەك جولاي وقيعا ورنىنا دەرەۋ كەلىپ, ءورتتىڭ ءۇشىنشى قاباتتان شىعىپ جاتقانىن بايقاعان. ءتارتىپ ساقشىلارى توتەنشە جاعداي قىزمەتكەرلەرىمەن بىرلەسىپ, ادام ومىرىنە تونگەن قاۋىپتى بىرگە اۋىزدىقتاعان.
قىزمەتكەرلەردىڭ جەدەل ارەكەتى ناتيجەسىندە ورتكە ورانعان ۇيدەن ەكى زەينەتكەر, 10 ءجاسوسپىرىم (ونىڭ ىشىندە ءتورت نارەستە بار) مەن 13 پاتەر تۇرعىنى قاۋىپسىز جەرگە شىعارىلىپ, ناتيجەسىندە 25 ادام ەۆاكۋاتسيالاندى.
«ادام ومىرىنە قاۋىپ تونگەن ۋاقىتتا ويلانۋعا ۋاقىت جوق. سىن ساعاتتا دەرەۋ ارەكەت ەتپەسەك, كەش قالۋىمىز مۇمكىن ەدى. وقيعا ورنىنا كەلگەن كەزدە ءورتتىڭ ءۇشىنشى قاباتتان شىققانىن بايقاپ, توتەنشە جاعداي قىزمەتكەرلەرىمەن دەرەۋ ارەكەت ەتىپ, ءۇي ىشىندە قالعان 25 تۇرعىندى سىرتقا شىعاردىق. شۇعىل شەشىم قابىلداۋدىڭ ناتيجەسىندە جاراقات العان ادام بولمادى», دەيدى ءورتتى اۋىزدىقتاعان قوس پوليتسەي سامالبەك پەن اسىلانبەك.