حالىقارالىق وتباسى كۇنىنە وراي, وڭىردە وتباسى قۇندىلىقتارى مەن ۇلتتىق سالت-ءداستۇردى ناسيحاتتاۋ, وتباسى-وشاق قاسىنداعى تۇرمىستىق زورلىق-زومبىلىقتىڭ الدىن الۋعا ارنالعان 300-دەن استام ءىس-شارا ءوتتى.
ماسەلەن, 15 مامىردا قوستانايدا «مەرەيلى وتباسى» ۇلتتىق بايقاۋى اياسىندا ۇيىمداستىرىلعان «وتباسى اعاشى» اكتسياسى بارىسىندا 20 جاس وتباسى ورتالىق ساياباققا بارىپ, ءوز وتباسىلارىنىڭ اتىنان اعاش كوشەتتەرىن وتىرعىزدى. اۋقىمدى ءىس-شاراعا جاس وتباسىلاردان بولەك, 30 شاقتى ەرىكتى, 40-تان استام قالا تۇرعىنى قاتىستى.
كوپشىلىك تاراپىنان قولداۋ تاپقان يگى شاراعا اتسالىسقان ءار وتباسى وزدەرى وتىرعىزعان قوس ءتۇپ اعاشتىڭ جانىندا ەستەلىك سۋرەتكە ءتۇسىپ, اعاش ءوسىپ تۇرعان ورىندى كەيىن اداسپاي تاۋىپ الاتىنداي ەتىپ بەلگىلەپ قويدى.
شاڭىراق كوتەرگەندەرىنە كوپ بولا قويماعان دۇيسەكوۆتەر وتباسى ءۇش ءتۇپ اعاش وتىرعىزىپتى.
– ءبىز مۇنداي اكتسياعا ءبىرىنشى رەت قاتىسىپ وتىرمىز. شىن مانىندە, بۇل كۇن ءبىر شاڭىراق استىندا تاتۋ-ءتاتتى ءومىر ءسۇرىپ جاتقان ءار وتباسى ءۇشىن ماڭىزدى مەرەكە دەپ بىلەمىن. بۇگىندە ءوزىمىز سياقتى جاستارعا مەملەكەت تاراپىنان جاسالىپ جاتقان قولداۋ كوپ. مىسالى, وسىدان ەكى جىل بۇرىن ءبىز مەملەكەتتىك باعدارلاما ارقىلى باسپانا الدىق. قازىر قوستانايدا بوي كوتەرىپ جاتقان جاڭا شاعىن اۋدانداردا نەگىزىنەن جاس وتباسىلار تۇرادى. جولداسىم ەكەۋمىز جاستار رەسۋرستىق ورتالىعى مەن وبلىستىق اكىمدىك ۇيىمداستىرعان بۇگىنگى ءىس-شاراعا اتسالىسىپ, ءوز وتباسىمىزدىڭ اتىنان اتاۋلى اعاشتارىمىزدى وتىرعىزۋدى ءجون سانادىق. بۇگىن وتىرعىزىلعان كوشەتتەر تامىرى بەكىپ, بويلاپ وسكەنشە ءوزىمىز سۋارىپ, كۇتىم جاساپ وتىرامىز. مىسالى, بۇگىن ءجۇز شاقتى اعاش كوشەتتەرى وتىرعىزىلدى. وسىنداي يگى شارالار ءجيى ۇيىمداستىرىلىپ تۇرسا, سايالى اعاشتار دا كوبەيىپ, قوستاناي جاسىل قالالاردىڭ قاتارىنا قوسىلار ەدى دەپ ويلايمىن. بۇل وسىمەن توقتاپ قالماۋى كەرەك. كوكتەمدە باس قوسىپ, وتاۋ قۇرعان جاس وتباسىلار ءوز ۇيلەرىنىڭ ماڭايىنا ءبىر-ەكى ءتۇپ اعاش وتىرعىزۋدى داستۇرگە اينالدىرسا, جاقسى ەمەس پە؟, – دەيدى اكتسياعا قاتىسۋشى جۇپار دۇيسەكوۆا.
«وتباسى اعاشى» اكتسياسىن ۇيىمداستىرۋشىلاردىڭ ايتۋىنشا, اتالعان ءىس-شارالار بارىسىندا ەرىكتى جاستار قالاداعى ترياتلون ساياباعى مەن تاۋەلسىزدىكتىڭ 25 جىلدىعى اتىنداعى ساياباقتا تال ەگۋ, گۇل وتىرعىزۋ جۇمىستارىن جۇرگىزگەن.
جاس جۇبايلار اتاۋلى اعاشتارىن وتىرعىزعان سوڭ, قازاقستان حالقى اسسامبلەياسىنىڭ جەرگىلىكتى فيليالى مەن وبلىستىق انالار كەڭەسى ۇيىمداستىرعان «ابىسىن-اجىن» بايقاۋىنا قاتىستى.
– بايقاۋ – حالىقارالىق وتباسى كۇنىنە وراي ۇيىمداستىرىلىپ وتىر. وعان ءار اۋداننان كەلگەن ون ءتورت جاس وتباسى قاتىستى. حالقىمىزدا «ابىسىن تاتۋ بولسا, اس كوپ» دەگەن دانا ءسوز بار. ەڭ باستى ماقساتىمىز – وتباسى قۇندىلىقتارى مەن وزىق داستۇرلەردى دارىپتەۋ. كوپشىلىككە ۇلگىلى وتباسىلاردى ناسيحاتتاۋ دەيدى وبلىستىق انالار كەڭەسىنىڭ توراعاسى ايجان كىشكەنتاەۆا.
قوستاناي وبلىسى