وتكەن جىلى قازاقستان ازاماتتارى مۋزەيگە 6 097 مىڭ رەت بارسا, 2021 جىلى 5 104 مىڭ رەت بولعان. حالىقارالىق مۋزەي كۇنىنە وراي ۇلتتىق ستاتيستيكا بيۋروسى مادەني مەكەمەگە بارۋشىلار جايلى ستاتيستيكالىق مالىمەت ۇسىندى, دەپ حابارلايدى Egemen.kz.
مۋزەيگە بارۋشىلاردىڭ باسىم بولىگى تۇركىستان وبلىسىندا – 1 492 مىڭ كەلۋشى, ودان كەيىن استانادا – 643 مىڭ كەلۋشى جانە شىعىس قازاقستان وبلىسىندا – 564 مىڭ. بۇل رەتتە مۋزەي ارالايتىن ادامداردىڭ ەڭ ازى شىمكەنت قالاسىندا تۇراتىنىن ايتا كەتۋ كەرەك – 43 مىڭ.
شىمكەنت قالاسىندا مۋزەي سانى دا كوپ ەمەس - نەبارى بەسەۋ.
جالپى 2023 جىلدىڭ 1 قاڭتارىندا قازاقستاندا بارلىعى 271 مۋزەي جۇمىس ىستەسە, ءبىر جىل بۇرىن ونىڭ سانى جەتىگە ازايعان.
كوش باسىندا مۋزەي سانى بويىنشا تۇركىستان وبلىسى تۇر – 27 مۋزەي.
اقتوبە وبلىسىندا 20 مۋزەي جانە الماتى قالاسى مەن باتىس قازاقستان وبلىسىنىڭ ارقايسىندا 19 مۋزەي جۇمىس ىستەپ تۇر.
271 مۋزەيدىڭ 48-ءى – تاريحي, 109-ى – ولكەتانۋ, 65-ءى – مەموريالدىق, تاعى 14-ءى – قورىق مۋزەي, 11-ءى – ونەرتانۋ جانە باسقا.
مۋزەيلەردە بارلىعى 2,6 ميلليون ەكسپونات ساقتاۋلى تۇر.