قازاقتىڭ استاناسى بار

وتكەن جىلدىڭ باسىندا الەمگە ايگىلى كينورەجيسسەر تيمۋر بەكمامبەتوۆ 1994 جىلى ءوزى قۇرعان رەسەيدەگى «Bazelevs» كي­نوستۋدياسىن ساتىپ جىبەردى. سول ارقىلى ول ءوزىنىڭ رەسەيدىڭ كينو بيزنەسىمەن قوشتاسقانىن مالىمدەگەن. بۇل كينوستۋديانىڭ لوس-اندجە­لەستە وكىلدىگى بار, ول جەكە كومپانيا بولىپ سانالادى. كومپانيانىڭ قاتىسۋىمەن «اسا قاۋىپتى», «پرەزيدەنت لينكولن: ۆامپير اڭشىسى» جانە «حاردكور» سەكىلدى گولليۆۋد جۇلدىزدارى ويناعان تانىمال فيلمدەر شىقتى. رەسمي اقپاراتتا ساتۋ تۋرالى شەشىم تەك رەسەيلىك «Bazelevs»-ءتىڭ زاڭدى تۇلعاسى – «بازەلەۆس» جشك-كە قاتىستى ەكەنى, ال لوس-اندجەلەستەگى ءوندىرىس ءوز جۇمىسىن جالعاستىرا بەرەتىنى تۋرالى دا ايتىلادى. وسى تۇستا ءبىر عانا دەرەك ايتا كەتەيىك. الەمگە ايگىلى اكتەرلەر – دجەيمس ماكەۆوي, مورگان فريمەن, اندجەلينا دجولي وينايتىن «اسا قاۋىپتى» ءفيلمىنىڭ ەكى اپتا ىشىندەگى كاسسالىق جيىنتىعى 350 ميلليون دوللاردان اسقان.

ال جاقىندا اقپاراتتار اعىنىنان تاعى ءبىر جاڭالىقتى كوزىمىز شالىپ قالدى. «ازۋىن ايعا بىلەگەن» سول تانىمال رەجيسسەر ەلىمىزگە كەلىپ, بىرىنەن كەيىن ءبىرى ەكى مينيسترمەن كەزدەسكەن ەكەن. مينيسترلىكتەر تاراتقان اقپاراتتاردا كينورەجيسەرمەن كەزدەسۋ بارىسىندا «وتاندىق تەلەارنالارداعى كونتەنت ساپاسىن ارتتىرۋ, سەريالدار مەن كينو­فيلمدەر ءتۇسىرۋ, كرەاتيۆ يندۋستريا, اني­ماتسيالىق جوبالار جاساۋ, ولاردى الەمدىك نارىققا شىعارۋ سياقتى ماڭىزدى ماسەلەلەر تالقىلانعانى» جونىندە ايتىلادى. ءتىپتى تيمۋر بەكمامبەتوۆ سالاعا قاتىستى ماماندار دايارلاۋ مەن جاستارعا تاجىريبەسىن ۇيرەتۋگە دايىن ەكەنىن جەتكىزگەن. قولىنا « ۇلى دالا تاريحىن» ۇستاعان بەلگىلى رەجيسسەردىڭ باسىنا كيگەن قازاقى تاقياسى دا وزىنە جاراسىپ تۇر.

ال ەكىنشى مينيسترلىك باسشىسى «تيمۋر بەكمامبەتوۆپەن وتە قىزىقتى كەزدەسۋ وتكە­نىن», بەلگىلى رەجيسسەردىڭ IT ءبىلىم بەرۋ سالا­سىنداعى قوعامدىق جوبالارىن تانىس­تىرعانىن ايتقان. كەزدەسۋدە «الەمنىڭ قاي­دا باعىت الىپ بارا جاتقانىن تۇسىنەتىن» قۇرمەتتى قوناق «ومىردە كەزدەسەتىن ءتۇرلى جاع­دايعا بايلانىستى كەيبىر ادامدى ء«بىز­دىڭ مەملەكەتىمىز قايدا؟» دەگەن ساۋال تولعان­دىرۋى مۇمكىن. مەنىڭ مەملەكەتىم مەن قاي جەردە بولسام دا, وسىنداي سمس-حابارلاما الاتىن مەملەكەت بولۋعا ءتيىس», دەگەن ەكەن.

ال جاقىندا ءبىر كەزدەرى رەسەيدىڭ ءبىرىنشى ۇلتتىق مۋزىكالىق تەلەارناسى «مۋز-تۆ»-ءنىڭ باس ديرەكتورى بولعان, «رەسەيلىك شوۋ-بيزنەستىڭ قۇپيا كاردينالى» اتانىپ كەتكەن ارمان داۋلەتياروۆتى ەلىمىزدە وتكەن جىلدان بەرى قازاق جانە ورىس تىلىندە شىعا باستاعان «Jibek joly»-نان كوردىك. تەلەارنانىڭ «تور­لەتىڭىز» حابارىنىڭ جۇرگىزۋشىسى ەكەن.

تاپتىشتەپ «تانىستىرىپ» وتىرعان بۇل ەكى ازامات تا جات جەردە جۇرگەندە بيىكتەن كورىنگەن, باعالانعان, مول تابىسقا جەتكەن. بىراق «بالاپان باسىنا, تۇرىمتاي تۇسىنا كەتكەندە» ەكەۋىنىڭ دە ەلگە كەلىپ, ارقا سۇيە­گەنىن ارقالاي بولجاپ, ءتۇرلى پايىم جاساۋعا بولادى. بىراق نەگە ەكەنى ءبىزدىڭ ەسىمىزگە بىردەن دىنمۇحامەد قوناەۆتىڭ اسانباي اسقاروۆقا ايتقان «ورىستى رەنجiتسەڭ ماسكەۋگە شابادى, قازاقتى رەنجiتسەڭ قايدا شابادى؟ ءوزiڭنiڭ الدىڭا اينالىپ كەلەدi. ورىستىڭ ارتىندا تۇرعان ماسكەۋi بار. قازاقتىڭ ارتىندا ماسكەۋi جوق, قازاقتىڭ ماسكەۋi – بiزدەرمiز, اسانباي», دەگەن ءسوزى ءتۇستى.

قاي قازاق الەمنىڭ قاي تۇپكىرىندە جۇرسە دە, قانداي بيىككە جەتىپ, ابىرويى اسقاق بولسا دا ارقا سۇيەيتىن, تابان تىرەيتىن اتامەكەنى بار. ويتكەنى قازاقتىڭ استاناسى بار. بۇل ءبىزدىڭ ەل بولىپ قالىپتاسقانىمىزدىڭ, مەملەكەت رەتىندە الەمدىك ارەنادا ورنىمىزدى بەكەمدەي تۇسكەنىمىزدىڭ بەلگىسى. كۇنى كەشە تاشكەنت تورىندە وتكەن الەم چەمپيوناتىندا ۇلتتىق قۇراماداعى جىگىتتەرگە عانا ەمەس, سول ەلدەگى قانداستاردىڭ بارىنە رۋح بەرىپ, ەڭسەسىن كوتەرگەن ۇلى كۇش تە وسى – قازاقتىڭ استاناسى. جات جەردە جۇرگەن قانداستىڭ دا سۇيەنەتىن, سەنەتىن ەلى بار.

ءسوز باسىندا ءححى عاسىردىڭ قوس قا­سىرەتىنەن حالىق قانداي ساباق الدى دەپ سۇراق قويدىق قوي. سوعىس پەن پاندەميا بۇكىل ادامزاتتىڭ عانا ەمەس, قوعامنىڭ ءاربىر مۇشەسىنىڭ شىنايى بەت-بەينەسىن, ارمان-ماقساتى مەن مۇڭ-مۇقتاجىن كورسەتىپ بەرگەنى انىق. جەمە-جەمگە كەلگەندە جۇرەكتەگى ەلدىك­تىڭ دە مويىندالعانى راس. مىنە, بۇل سۇراقتىڭ جاۋابى وسى بولار.