بۇگىن, 15 مامىردا تاشكەنتتە حالىقارالىق بوكس قاۋىمداستىعىنىڭ ديرەكتورلار كەڭەسى جيىن وتكىزدى. وتىرىس بارىسىندا كەلەسى جىلى وتەتىن ايەلدەر اراسىنداعى الەم چەمپيوناتى استانا قالاسىندا وتەتىنى حابارلاندى, دەپ جازادى Egemen.kz.
حالىقارالىق بوكس قاۋىمداستىعىنىڭ ءباسپاسوز قىزمەتى ءمالىم ەتكەندەي, قازاقستان بوكس فەدەراتسياسىنىڭ جاۋاپتى تۇلعالارى 2024 جىلعى ايەلدەر اراسىنداعى الەم چەمپيوناتىن استانادا وتكىزۋگە نيەت بىلدىرگەن.
وسىلايشا, الەمنىڭ ۇزدىك بوكسشى قىزدارى «بارىس ارەنانىڭ» شارشى الاڭىندا قولعاپ تۇيىستىرەدى.
«قازاقستان سياقتى قۋاتتى بوكس ەلى IBA ءىرى تۋرنيرلەرىنىڭ ءبىرىن وتكىزەدى. وسىدان جەتى جىل بۇرىن استانادا الەم چەمپيوناتى وتكەن ەدى. ءبىز ايەلدەردىڭ جۇلدە قورىن كوبەيتەمىز. چەمپيوندار 200 000 اقش دوللارىن الادى, ال جالپى جۇلدە قورى 12 نوميناتسيا بويىنشا 4,8 ميلليون دوللاردى قۇرايدى. بۇل سومانىڭ 10 پايىزى ۇلتتىق جاتتىقتىرۋشىلارعا بەرىلەدى. الداعى چەمپيوناتتى اسىعا كۇتەمىن جانە 2024 جىلى بوكسشىلاردى استانا تورىندە قارسى الامىن», دەدى IBA باسشىسى ومار كرەملەۆ.
ەسكە سالا كەتسەك, 2016 جىلدىڭ جازىندا قازاقستان ءوز تاريحىندا العاش رەت ايەلدەر اراسىنداعى الەم چەمپيوناتىن وتكىزىپ, وندا ءبىرىنشى كوماندالىق ورىندى جەڭىپ العان ەدى. ودان كەيىن بوكسشىلارىمىز ءتورت التىن, ەكى قولا مەدال جەڭىپ السا, قىتاي ەكىنشى, اقش ءۇشىنشى ورىنعا تابان تىرەدى.