جاھاندىق جارىس

ول گەرمانيا قۇراماسىن ءتورتىنشى مارتە الەم چەمپيونى ەتتى شىلدەنىڭ 13-ءى كۇنى ءتۇن جارىمى اۋا برازيليادا ءبىر ايدان بەرى وتكەن الەم چەمپيوناتى ءوزىنىڭ مارەسىنە جەتتى. تۋرا 31 كۇنگە سوزىلعان فۋتبول مارافونىنىڭ سوڭعى نۇكتەسىن ريو-دە-جانەيرو قالاسىنداعى اتاقتى «ماراكانا» ستاديونىندا وتكەن گەرمانيا جانە ارگەنتينا قۇراما كوماندالارى اراسىنداعى فينالدىق ماتچ قويدى. قارسىلاستار كەزدەسۋدىڭ نەگىزگى ۋاقىتىندا ەسەپ اشا الماي تارقاستى. ەكسترا-تايمدا بۋندەستيمنىڭ باعى جاندى. «نەمىس ماشينەسى» وسىلاي 113-مينۋتتا ماريو گيوتتسە سوققان جالعىز گولدىڭ ارقاسىندا الەم چەمپيونى اتاندى. ساراپشىلاردىڭ باعامى بويىنشا, الاڭدا جارتى ساعاتتان ءسال عانا ارتىق ويناعان جەڭىس گولىنىڭ يەسى ماتچتىڭ ۇزدىك ويىنشىسى بولىپ تانىلدى. سونىمەن قاتار, گەرمانيا امەريكا قۇرلىعىندا وتكەن الەم بىرىنشىلىگىندە توپ جارعان ءبىرىنشى ەۋروپالىق كوماندا بولدى. ادەتتە بۇل ەكى كونتينەنتتىڭ جاساقتارى وزدەرىندە جالاۋ كوتەرگەن مۋنديالداردا سىرتتان ەشكىمگە جەڭىس تىزگىنىن ۇستاتا بەرمەۋشى ەدى. ءدال وسىلاي امەريكالىقتار دا بۇعان دەيىن ەۋروپا جەرىندە تۋى تىگىلگەن چەمپيوناتتا ءبىر-اق رەت جەڭىمپاز اتانعان-دى. ونىڭ ءوزىن سوناۋ الىستاعى 1958 جىلى شۆەتسيادا جۇلدىز جوسىلتقان دوپ دوداسىندا برازيليا قۇراماسى جاساعان بولاتىن. مىنە, نەمىستەردىڭ بۇل جەڭىسى ءبىر جاعى ەكى دۇنيە اراسىنداعى باسەكە بەزبەنىنىڭ باسىن تەڭگەرىپ تە وتىر. ەندى الەمنىڭ ەڭ كۇشتى كومانداسى اتاعىن الۋ ءۇشىن اقتىق سىندا كەزدەسكەن گەرمانيا جانە ارگەنتينا قۇرامالارى جايىنا كەلسەك, بۇلاردىڭ ەكەۋى بىرگە وسى كەزگە دەيىن بەس مارتە چەمپيوندىق اتاققا قول جەتكىزگەن ەدى. سونىڭ ىشىندە نەمىستەر – 3, ولاردىڭ قارسىلاستارى 2 رەت جاھاننىڭ ءبىرىنشى جاساعى بولىپ ۇلگەرگەن. ال سوڭعى ۇتىستىڭ ناتيجەسىندە نەمىستەر مۇنىڭ سانىن تاعى بىرەۋگە ارتتىرىپ, يتاليانى قۋىپ جەتتى. ەندى الدا 5 دۇركىن جەڭىمپاز بولعان برازيلياعا عانا تۇر. تاعى ءبىر نازار اۋداراتىنى, گەرمانيا مەن ارگەنتينا تەكە­تى­رە­سىنىڭ تاريحى دا باي. بۇل ءۇشىن بۇگىنگى ولاردىڭ وسى كۇنى ءۇشىنشى رەت فينالدىق شايقاستا توقايلاسقانىن ايتساق تا جەتكىلىكتى. كوماندالار ونىڭ دەڭگەيىندە 1:1 ەسەبىمەن تەڭ ءتۇسىپ كەلدى. ارگەنتينالىقتار 1986 جىلى 3:2 ەسەبىمەن جەڭىسكە جەتسە, نەمىستەر 1990 جىلى 1:0 ەتىپ قارىمتا قايتاردى. ءسوز ەتىپ وتىرعان كوماندالار بۇدان بولەك, 2006 جانە 2010 جىلدارعى مۋنديالداردا تاعى ۇشىراستى. بۇلاردىڭ العاشقىسىندا بۋندەستيم نەگىزگى ۋاقىتتا 1:1 بولىپ تەڭ ويناپ, پەنالتيدەن 4:2 ەسەبىمەن باسىم تۇسكەن. كەلەسىسىندە «نەمىس ماشينەسى» 4:0 ەسەبىمەن كۇيرەتە جەڭگەن. ءبىر قىزىعى, الدىڭ­عى ەكى فينالدىق ماتچقا دا ديەگو مارادونا قاتىستى. ول, سونداي-اق, تىزىمدەگى سوڭعى كەزدەسۋگە ارگەنتينا قۇراماسىنىڭ باس جاتتىقتىرۋشىسى رەتىندە اتسالىستى. بۇل جولعى فينالدىق ويىننىڭ ءبىرىنشى تايمى كوماندالاردىڭ بىردە-ءبىرىنىڭ باسىمدىلىعىن بايقاتپاعان تەڭ كۇرەس جاعدايىندا ءوتتى. كوپشىلىك كۇتكەندەي, ارگەنتي­نالىقتار بىردەن تاس ءتۇيىن قورعانىس­قا كەتىپ قالماي, قارسى شابۋىل جاساپ تۇرۋعا كىرىستى. ال نەمىستەر ويىننىڭ العاشقى جارتى ساعاتىندا كريستوف كرامەردىڭ ورنىنا الاڭعا اندرە شيۋررلە شىققاننان باستاپ شابۋىلدا بەلسەندىلىك كورسەتتى. ارگەنتينالىقتار قاقپاسىنا جاسالعان ەڭ العاشقى ايرىقشا قاۋىپتى ءسات تايمعا قوسىلعان قوسىم­شا ۋاقىتتا تىركەلدى. ەكىنشى تايمنىڭ باسىندا الەحاندرو سابەليانىڭ شاكىرتتەرى شابۋىل شەبىن كۇشەيتۋگە باعىت ۇستادى. سول بويدا ولار ەسەپ تە اشىپ كەتە جازدادى. بىراق قاقپاشى مانۋەل نويەرمەن بەتپە-بەت شىق­قان ليونەل مەسسي دوپ­تى قاقپا باعانىنىڭ جانىنان جىبەرىپ بارماق تىستەدى. بۇدان كەيىن شابۋىلدىڭ ەكپىنى ءبىرشاما باسىلدى. الايدا, كەسكىلەسكەن كۇرەس الاڭنىڭ ءار مۇيىسىندە ءجۇرىپ جاتتى. سونداي ءساتتىڭ بىرىندە گونسالو يگۋاين نەمىس قاقپاشىسىمەن سوقتىعىسىپ قالدى. سونىڭ سالدارىنان باسىنان قاتتى سوققى الدى. بۇل بىرنەشە مينۋتتان كەيىن ونىڭ ورنىنا رودريگو پالاسيونى شىعارۋعا ءماجبۇر ەتتى. وسىنداي ايقاسپەن كەزدەسۋدىڭ نەگىزگى ۋاقىتى دا اياقتالدى. وۆەر­تايمنىڭ باس جاعى الدىڭعى كەزەڭدەگى ويىنداردان كوپ وزگەرە قويعان جوق. ەكى جاق ءبىر-ءبىرىنىڭ قادامدارىن تۇساۋلاي وتىرىپ, قارسى شابۋىل جاساۋعا كوبىرەك سۇيەندى. ەكىنشى ەكسترا-تايمدا نەمىس باستيان شۆاينشتايگەر كەزەكتى دوپقا تالاس تۇسىندا قاباعىن جارىپ الدى. سوعان قاراماستان, ول الاڭنان كەتپەي, ورشەلەنە وينادى. ونىڭ مۇنىسى كومانداعا قاتتى اسەر ەتتى. وسىدان جىگەر العان اندرە شيۋررلە مەن ماريو گيوتتسە قارسى قاپتالعا قاراي قۇيىنداي ۇشتى. بۇلاردىڭ سوڭعىسى قارسى قاقپا الاڭى ىشىندە جۇگىرىپ كەلە جاتىپ, ارىپتەسىنەن العان دوبىن كەۋدەسىمەن تومەن قاراي تۇسىرە بەرىپ, قاقپاعا قاراي اتتى دا جىبەردى. اۋەلەي ۇشقان دوپ قاقپاعا قيالاپ بارىپ, كىرىپ كەتتى. ەسەپ ويىننىڭ 113-مينۋتىندا وسىلاي اشىلدى. ارگەنتينالىقتار قالعان ۋاقىت ىشىندە جانتالاسقان شابۋىلعا كوشتى. بىراق ولاردىڭ بارلىق قيمىلدارىن مانۋەل نويەر قيىپ تاستاپ تۇردى. بۇل نەمىستەردىڭ جەڭىسكە جەتۋىن قامتاماسىز ەتتى. جوعارىدا ايتقانىمىزداي, گەرمانيا وسىلايشا امەريكا قۇرلىعىندا چەمپيون اتانعان ءبىرىنشى ەۋروپالىق كوماندا اتان­دى. بارلىعى بۇل قۇرلىقتا 7 مارتە الەم چەمپيوناتى ءوتتى. ولار مىنا ەلدەردى قامتىپ, تومەن­دەگىدەي جەڭىمپازداردى شىعار­دى: ۋرۋگۆاي-1930 (چەمپيون – ۋرۋگۆاي), برازيليا-1950 (ۋرۋگ­ۆاي), چيلي-1962 (برازيليا), مەكسي­كا-1970 (برازيليا), ارگەنتي­نا-1978 (ارگەنتينا), مەكسي­كا-1986 (ارگەنتينا), اقش-1994 (برازيليا). مىنە, سول ستاتيستي­كانىڭ ەندى ساعى سىنىپ وتىر. ءۇشىنشى ورىن ءۇشىن تالاس بۇدان ءبىر كۇن بۇرىن وينالدى. وندا برازيليانى 3:0 ەتىپ جەڭگەن گوللانديا قولا جۇلدەگەر اتاندى. «قىزعالداقتار ەلىنىڭ» قۇراماسى ءوزىنىڭ تاريحىندا تۇڭعىش رەت الەم چەمپيوناتىنىڭ قولا مەدالىنە قول جەتكىزدى. ەكى كوماندا دا ءۇشىنشى ورىن ءۇشىن ولىسپەي بەرىسپەيتىن سەبەپ بولدى. سونىڭ ىشىندە جارتىلاي فينالدا گەرمانيادان 1:7 بولىپ كۇيرەي جەڭىلگەن برازيليالىقتار ءۇشىن بۇل ۇتىس اۋاداي قاجەت ەدى. ال گوللانديا بۇعان دەيىن بىردە-ءبىر چەمپيوناتتى كوتەرىڭكى نوتادا اياقتاپ كورمەگەن ەكەن. ولار ءتىپتى فينالدا شايقاسقان 2010 جىلى دا ونى جەڭىلىسپەن بىتىرگەن. وسىنىڭ الدىندا لۋي ۆان گال الەم چەمپيوناتىندا ءۇشىنشى ورىن الۋدىڭ ەشقانداي ءمانى جوق ەكەنىن مالىمدەگەنىنە قاراماستان, بۇل ەل كومانداسىنىڭ اتالمىش ماتچقا بارىنشا جوعارى دايىندىقپەن كەلگەنى بىردەن بايقالدى. مۇنى «قىزعىلت-سارىلاردىڭ» كەزدەسۋگە نەگىزگى قۇرامىمەن شىق­قانى دا ايعاقتاپ بەردى. تەك ماتچ الدىنداعى دەنە قىزدىرۋ كەزىندە ءسىڭىرىن سوزىپ العان ۋەسلي سنەيدەر مەن جاراقاتىنان تو­لىق ايىقپاعان نايدجەل دە يونگ عانا ويىنعا قاتىسقان جوق. بۇ­لاردىڭ ءبىرىنشىسىن دجوناتان دە گۋزمان الماستىرسا, ەكىنشىسىنىڭ ورنىنا يوردي كلاسي شىقتى. برازيليالىقتاردىڭ باس باپكەرى لۋيس فەليپە سكولاري كۇتپەگەن جەردەن ەكسپەريمەنتكە بارىپ, ستارتتىق قۇرامعا بۇرىن نازارعا ىلىكپەگەن ويىنشىلاردى ەنگىزدى. نەگىزگى سانالعانداردان قاقپاشى جۋليو سەزار, قورعاۋشىلار داۆيد لۋيس پەن وسىنىڭ الدىنداعى ويىندى ديسكۆاليفيكاتسياعا بايلانىستى جىبەرگەن تياگو سيلۆا, سونداي-اق وسكار عانا الاڭعا شىقتى. ستارتتىق قۇرامنان فرەد پەن حالكقا ورىن تابىلمادى. بۇل جولى سەلەساو ءبىر عانا ايقىن فورۆارد – جونى العا سالىپ وينادى. ناتيجەسىندە كەزدەسۋ جارتىلاي فينالدىڭ جالعاسى ىسپەتتى بولىپ باستالدى. شابۋىلمەن باستاعان برازيليانىڭ قورعانىس شەبى تەز سەتىنەپ سالا بەرەتىنى ءبىر­دەن بايقالدى. الايدا, ولار­دىڭ قاقپاسىنا سوعىلعان العاش­قى ەكى گول دا ۇلكەن كۇمان شاقى­رادى. بۇلاردىڭ ءبىرىنشىسى 3-مينۋتتا توردى تۋلاتتى. ول ايىپ الاڭىنىڭ سىرت جاعىندا كەمىندە ەكى مەتر ارىدان شالىنىپ, ىشكە كەلىپ ادەمى قۇلاي بىلگەن ارەن روببەننىڭ «تاپقىرلىعى» ارقاسىندا بەلگىلەندى. بۇل جەردە ويىنعا قازىلىق ەتكەن الجيرلىك تورەشى دجامەل حايمۋدي اككى فۋتبولشىنىڭ ارانىنا ءتۇسىپ قالدى. وسى كۇماندى پەنالتيدى روبين ۆان پەرسي ءدال ءتۇسىردى – 1:0. سول ارقىلى پەنتاكامپەوندار بۇل بىرىنشىلىكتە وتكىزىپ العان گولدارى سانىن 12-گە تولتىردى. بۇعان دەيىنگى چەمپيوناتتاردا ولاردىڭ بۇل جونىندەگى كورسەتكىشى 11-دەن اسىپ كورمەگەن ەدى. ونىڭ ءوزىن قۇراما الىستاعى 1938 جىلى تىركەگەن-ءدى. دەمەك, سارى جەيدەلى كوماندا تاعى ءبىر انتيرەكوردقا قول جەتكىزىپ وتىر. ويىننىڭ 17-مينۋتىندا گول­لانديا ەسەپتى 2:0-گە جەتكىزدى. بۇل جولى «قىزعىلت-سارىلار» ونى وفسايدتان سالدى. دجوناتان دە گۋزمان ارەن روببەننەن پاس العان كەزدە ويىننان تىس قالعان ەدى. بىراق قاپتالداعى لاينسمان مۇنى اڭعارمادى. سوسىن گۋزماننىڭ قيالاتىپ جەتكىزگەن پاسىن دەيلي بليند قاقپاعا تۋرالاپ ۇرىپ كىرگىزدى. وسى دەرەكتىڭ ءوزى چەمپيوناتقا قىزمەت ەتىپ جاتقان تورەشىلەر دەڭگەيىنىڭ تومەن ەكەنى جونىندەگى پىكىردىڭ تەگىن ەمەس ەكەنىن بەكەمدەي ءتۇستى. ال العاشقى ەكى گولدى دا تورەشىلەردىڭ كومەگىمەن سالعان گوللانديا بۇدان ءارى دە اسا ساق قيمىلداي وتىرىپ, قارسى شابۋىلدىڭ شىرايىن شىعارۋعا تىرىسىپ باقتى. لۋيس سكولاري كومانداسىنىڭ ءبىر ءتاۋىر جەرى, ماتچتىڭ بىردەن وزدەرى ءۇشىن قىرىن سيپاتتا وربىگەنىنە قاراماستان, نەمىستەرمەن ويىنداعىداي سالدى سۋعا كەتىرىپ, ءبارىن تاعدىردىڭ تالكەگىنە تاستاي سالمادى. گوللانديالىقتار بۇدان بۇرىن, 1998 جىلى فرانتسيادا وتكەن الەم بىرىنشىلىگىندە ءبىر رەت ءۇشىنشى ورىنعا تالاسىپ كورىپ ەدى. بىراق سول جولى حورۆاتتاردان 1:2 بولىپ ۇتىلىپ قالعان. بۇلارعا قاراعاندا, برازيليالىقتاردىڭ ءۇشىنشى ورىنعا تالاستا ءبىرشاما باي تاجىريبەسى بار. ولار مۇنداي شايقاستاردى 1938, 1974 جانە 1978 جىلدارى باستان وتكەردى. سونىڭ ىشىندە سەلەساو ءۇشىن 1938 جانە 1978 جىلدار ءساتتى بولدى. كەزدەسۋدىڭ ەكىنشى جارتىسىندا برازيليا ويىن باسىمدىعىنا يە بولدى. الايدا, تابلوداعى ەسەپ وزگەرە قويمادى. كوماندا 68-مينۋتتا ءبىر دوپتىڭ قارىمتاسىن قايتارۋعا وتە جاقىن قالدى. سەبەبى, قارسىلاستار ايىپ الاڭىنا قۇستاي ۇشىپ جەتكەن وسكار ءبليندتى شالىپ قۇلاتتى. ال تورەشى پەنالتي بەلگىلەۋ ورنىنا برازيليالىق شابۋىلشى وسىنى قاساقانا ىستەدى دەپ ەسەپتەپ, وعان «سارى قاعاز» كورسەتتى. برازيليالىقتار بۇدان كەيىن دە شابۋىلدى جالعاستىردى. بىراق بىردە-ءبىر رەت قارسى قاقپانى ءدال كوزدەي المادى. مۇنىڭ ەسەسىنە ويىننىڭ نەگىزگى ۋاقىتىنا قوسىلعان 2-مينۋتتا دجوردجينو ۆەينالدۋم كۇتپەگەن جەردەن تاعى ءبىر گولدى سالىپ كەتتى. وسىلايشا ويىن 3:0 بولىپ اياقتالدى. سونىمەن, كەزەكتى الەم چەمپيوناتى دا ءوزىنىڭ مارەسىنە جەتتى. ونىڭ سوڭعى كۇندەرى رەسەي پرەزيدەنتى ۆلاديمير پۋتين فيفا پرەزيدەنتى يوزەف بلاتتەردىڭ قولىنان الەم چەمپيوناتىنىڭ ەستافەتاسىن قابىلداپ الدى. بۇل 2018 جىلى وتەتىن كەلەسى دوپ دوداسىنىڭ رەسەي ەلىندە جالاۋ كوتەرگەلى تۇرعانى تاريحي شىندىق ەكەنىن تاعى ءبىر مارتە ايقىنداپ كورسەتىپ بەردى. سەرىك ءپىرنازار, «ەگەمەن قازاقستان».

دەرەك پەن دايەك

• گەرمانيا وڭتۇستىك امەريكادا وتكەن الەم چەمپيوناتتارىندا العاش رەت باس جۇلدەنى جەڭىپ العان ەۋروپالىق كوماندا بولدى. بۇعان دەيىن يسپانيا 2010 جىلى العاش بولىپ وزگە (افريكا) قۇرلىقتا چەمپيون اتانعان ەدى. • ارگەنتينا مەن گەرمانيا الەم چەمپيو­نات­­تارىندا جەتى رەت كەزدەسىپ, ءۇش رەت فينالدا وينادى. ەكى فينالدا (1990, 2014) «نەمىس ءماش­ينەسى» چەمپيون بولسا, بىرەۋىندە (1986) «البي­سالەتە» باس جۇلدەنى جەڭىپ الىپتى. • الدىڭعى كۇنگى فينالدى ساناعاندا ارگەنتينا مەن گەرمانيا ءبىر-بىرىمەن 21 رەت كەزدەسكەن. سونىڭ توعىز ويىنىندا ار­­­­گەنتينا, جەتى ماتچىندا گەرمانيا جەڭىسكە جەتكەن. بەس كەزدەسۋ تەڭ ەسەپپەن اياقتالعان. • بۋندەستيم وسى تۋرنيردە جەتى گولدى الىستان سوققان. • گەرمانيا سەگىزىنشى رەت فينالدا وينادى. ءالى بىردە-ءبىر ۇلتتىق قۇراما وسىنشاما رەت فينالدا ويناعان ەمەس. • اندرە شيۋررلە, كريستوف كرامەر, شكود­­ران مۇستافي, ەريك دۋرم, ماريو گيوتتسە, يۋليان دراكسلەر مەن ماتتياس گينتەر  سەكىلدى نە­مىس فۋت­بولشىلارى گەرمانيا 1990 جىلى الەم چەم­پيونى بولعاننان كەيىن دۇنيەگە كەلگەندەر. • «نەمىس ماشينەسى» بارلىق الەم چەمپيوناتتارىندا 224 گول سوققان. برازيليا 221 رەت قاقپاعا دوپ توعىتقان. • بيىلعى فينالعا دەيىن ارگەنتينا 27 كەزدەسۋدە جەڭىلمەگەن. 19 رەت ۇتىپ, 8 رەت تەڭ ويناعان. • الەم چەمپيوناتىنىڭ ەڭ ۇزدىك ويىنشىسى بولىپ ارگەنتينا قۇراماسىنىڭ شا­بۋىلشىسى ليونەل مەسسي اتاندى. ول 7 ماتچ­تا 4 گول سوقتى. ءبىر رەت ناتيجەلى پاس بەردى. كولۋمبيا قۇراماسىنىڭ جارتىلاي قور­عاۋشىسى دجەيمس رودريگەس ۇزدىك بومباردير اتاندى. ول 5 ويىندا 6 گول سوقتى.  سونىمەن بىرگە, ارىپتەستەرىنە 4 ناتيجەلى پاس بەرگەن. • گەرمانيا كومانداسىنىڭ شابۋىلشىسى ميروسلاۆ كلوزە ءوزى قاتىسقان ءتورت الەم چەمپيوناتىندا 16 گول سوعىپ, برا­زيليالىق رونالدونى باسىپ وزدى. رو­نالدو ءوزى قاتىسقان ءۇش چەمپيوناتتا (1998, 2002, 2006) 15 دوپ سوققان ەدى. 1994 جى­لى برازيليالىق 17 جاسار شابۋىلشى قوسال­قى قۇرامدا الەم چەمپيونى اتانعان. • بۇل چەمپيوناتتا 171 گول سوعىلدى. 1990 جىلى پلەي-وففتا سەگىز ماتچ 120 مينۋتقا سوزىلعان ەكەن. بيىلعى باسەكەدە دە  سولاي بولدى. • گەرمانيا الەم چەمپيوناتىنداعى 105-ءشى ماتچىن وتكىزدى. برازيليا – 103, يتاليا  – 83, ارگەنتينا 76 رەت وينادى. • فينالدا ونەر كورسەتكەن قوس قۇرامانىڭ فۋتبولشىلارىنىڭ اراسىندا ميروسلاۆ كلوزە (137), لۋكاس پودولسكي (116), فيليپپ لام (112), باستيان شۆاينشتايگەر (108), پەر مەرتەساكەر (104), ارگەنتينادا حاۆەر ماسكەرانو (105) 100 ماتچتان كوپ ويىن وتكىزگەن. ليونەل مەسسي فينالدا ءوزىنىڭ ۇلتتىق قۇراماداعى 93-ءشى ويىنىن وتكىزدى. ال ونىڭ وتانداسى ديەگو مارادونا 91 ماتچ­تا ويناعان. • بيىلعى دودانىڭ باستى سەنساتسياسى كوستا-ريكا مەن كولۋمبيانىڭ شيرەك فينالعا شىققانى ەمەس, برازيليانىڭ گەرمانيادان 1:7 ەسەبىمەن ۇتىلعانى بولدى. بۇل الەم تاريحىندا يتاليا – اقش (1934 جىلى) جانە برازيليا – شۆەتسيا (1950) اراسىنداعى ماتچتاردا عانا كەزدەسكەن. وسىعان دەيىن جارتىلاي فينالدا 6 دوپ ايىرماسىمەن جەڭۋ دەگەن ويىن بولماعان. ۋرۋگۆاي – يۋگوسلاۆيا – 6:1(1930), ارگەنتينا – اقش – 6:1 (1930), ۆەنگريا – شۆەتسيا – 5:1 (1938), گەرمانيا – اۆستريا – 6:1 (1954), برازيليا – فرانتسيا – 5:2 (1958) اراسىندا وتكەن كەزدەسۋلەر وسىنداي ەسەپپەن اياقتالعان. «ەگەمەن-اقپارات».