بەلگيا استاناسىنداعى Atomium (اتوميۋم) عيماراتى بريۋسسەل سيمۆولدارىنىڭ ءبىرى بولىپ تابىلادى. ونىڭ قۇرىلىسى 1958 جىلى وسى قالادا بۇكىلالەمدىك كورمە (ەكسپو) اشىلاردىڭ قارساڭىندا سالىنعان. كەشەننىڭ جوباسىن ارحيتەكتور اندرە ۆاتەركەين جاساعان. ول اتوم عاسىرىنىڭ سيمۆولى جانە ونىڭ ەنەرگياسىن بەيبىت ماقساتقا جۇمساۋ لوزۋنگىسى رەتىندە ومىرگە كەلگەن. كەشەننىڭ قۇرىلىسى اندرە جانە ميشەل پولاك باستاعان ارحيتەكتورلاردىڭ باسشىلىعىمەن جۇرگىزىلگەن.
باسىندا قالايى قوسپاسىمەن كومكەرىلە جاسالعان قۇرىلىس 2006 جىلى اقپاندا كۇردەلى جوندەۋ جاسالعاننان كەيىن بولات قاپتامامەن الماستىرىلعان. ول 165 ميلليارد ەسە ۇلعايتىلعان پىشىندەگى تەمىردىڭ كريستالل فراگمەنتى كۋبىنا بىرىكتىرىلگەن توعىز اتومنان تۇرادى. اتوميۋمنىڭ بيىكتىگى 102 مەتر بولسا, سالماعى 2400 تونناعا جۋىق, ال ءاربىر توعىز سفەرانىڭ ديامەترى 18 مەتردى قۇرايدى. بۇل سفەرالاردىڭ التاۋى كەلۋشىلەردى قابىلداي الادى. سفەرالار ءوزارا ۇزىندىعى 23 مەترلىك تۇربالارمەن جالعاسقان. بۇلاردىڭ ورتاسىندا ەسكالاتورلار مەن جالعاۋشى دالىزدەر ورنالاسقان. شارلار اراسىنا بارلىعى 20 جالعاۋشى تۇربالار تارتىلعان. ولاردىڭ ورتاسىنداعى بولىگىندە كەلۋشىلەردى 25 سەكۋندتا كەشەننىڭ ەڭ باسىنداعى رەستوران مەن پانورامالى پلاتفورماعا جەتكىزەتىن ليفت بار.
«اتوميۋمنىڭ» سىرتتاعى اۋلاسىندا ەۋروپا ەلدەرىندەگى بەلگىلى عيماراتتاردىڭ كىشكەنتاي كوشىرمەلەرى قويىلعان «ميني-ەۋروپا» اتتى اشىق اسپان استىنداعى ساياباق-كورمە ورنالاسقان.
ءبىز بريۋسسەلدە بولعان ءۇش كۇنىمىزدىڭ ەكىنشىسىندە وسى «اتوميۋم» مەن «ميني-ەۋروپا» كورمەسىن ارالاپ كوردىك. «اتوميۋم» ءبىزدىڭ «بايتەرەككە», ال «ميني-ەۋروپا» الاڭى «اتامەكەنگە» قاتتى ۇقسايدى ەكەن. بۇلاردىڭ الدىڭعىسىنىڭ ۇشار باسىنداعى پلاتفورمادان بريۋسسەل الاقاندا تۇرعانداي اسەر بەرەدى. ايتارى جوق, كەشەننىڭ ماڭى اعاشقا تۇنعان ساياباققا تولى ەكەن. جالپى, قالا بۇل جەردەن ءتىپتى ادەمى بولىپ كورىنەدى.
سەرىك ءپىرنازار.