الەم جانە ازيا چەمپيونى, ITTF حالىقارالىق فەدەراتسياسىنىڭ نۇسقاسىنداعى Hopes Wee كونتينەنتتىك جانە الەمدىك تۋرنيرلەرىنىڭ قورىتىندىسى بويىنشا 2019 جىلدىڭ ۇزدىك جاس تەننيسشىسى بولىپ تانىلعان الان قۇرمانعاليەۆ پەن ۇستەل تەننيسىنەن قازاقستان رەسپۋبليكاسى ۇلتتىق قۇراماسىنىڭ باس جاتتىقتىرۋشىسى, كسرو سپورت شەبەرى ەلميرا اليەۆا «ارسەلورميتتال تەمىرتاۋ» اق مەتاللۋرگتەرى اراسىندا وتكىزىلگەن ۇستەل تەننيسىنەن چەمپيوناتتىڭ قۇرمەتتى قوناقتارى بولدى.
اۋەلى الان قۇرمانعاليەۆ پەن ەلميرا اليەۆا بىرنەشە ساعات بويى مەتاللۋرگتەر كەيپىنە ەنىپ, «ارسەلورميتتال تەمىرتاۋ» اق-نىڭ كونۆەرتەر تسەحىندا بولدى. وندا بولاتتى حيميالىق تالداۋعا جانە تەمپەراتۋراسىن ولشەۋگە سىناما الىپ كوردى.
كونۆەرتەر تسەحىنا ەكسكۋرسيادان كەيىن «ارسەلورميتتال تەمىرتاۋ» اق باس ديرەكتورى ۆلاديمير يابلونسكي قوناقتارمەن كەزدەستى.
- تەننيس – ءبىزدىڭ قىزمەتكەرلەرىمىز ەرەكشە ۇناتاتىن سپورت ءتۇرى. كاسىپورىندارىمىز بەن تسەحتارىمىزدىڭ الاڭدارىندا ۇستەل تەننيسىن ويناۋعا ارنالعان ۇستەلدەر ورناتىلعان, - دەدى ۆلاديمير يۆانوۆيچ, - ءبىز ءوز ۇجىمىمىزدىڭ سپورتتىق باستامالارىن ءاردايىم قولداپ وتىرامىز. تەمىرتاۋ سپورتتىڭ تالاي ءتۇرى بويىنشا ايگىلى سپورتشىلارمەن جانە چەمپيوندارمەن تانىمال.
قۇرمەتتى قوناقتار ەكسكۋرسيادان العان اسەرلەرىن ورتاعا سالىپ, مۇنداي اۋقىمدى ءوندىرىستى بۇعان دەيىن كورمەگەندەرىن ايتىپ, تاڭدانىستارىن جاسىرمادى.
- ءبىز بۇگىن تسەحتا بولدىق. بۇل ءبىر عاجاپ ەكەن! ءبىز كۇندەلىكتى ومىردە مەتالمەن, ودان جاسالعان بۇيىمدارمەن بايلانىستا بولساق تا, ول جايلى ويلاي بەرمەيمىز. ال ءبىز بۇگىن ونىڭ قالاي جاسالاتىنىن – كوپتوننالىق ءشومىشتى, شويىننىڭ قالاي قۇيىلاتىنىن ءوز كوزىمىزبەن كوردىك, - دەدى ەلميرا اليەۆا, - «ارسەلورميتتال تەمىرتاۋ» كومپانياسىنىڭ باسشىلىعى سپورتتى دامىتۋعا قانشالىقتى قولداۋ كورسەتەتىنىن دە ءبىلىپ, رازى بولدىق. وندىرىستىك جۇمىستان قولىڭىز بوسامايتىنىنا قاراماستان, ءسىز ۋاقىت تاۋىپ, سپورتقا كوڭىل ءبولىپ ءجۇرسىز. بۇل – ەڭبەك ۇجىمىڭىزدى باعالاپ, قىزمەتكەرلەردىڭ دەنساۋلىعىنا قامقورلىقپەن قارايتىنىڭىزدىڭ ايعاعى.
- مەن وسىنداي ۇلكەن كاسىپورىندا العاش رەت بولىپ تۇرمىن. ارينە, مەن قازىر مۇنداعى كوپ نارسەنى تۇسىنە قويمايمىن. بىراق ۋاقىت وتە كەلە, ءبارىن زەرتتەپ بىلگىم كەلەدى. ويتكەنى, ءبارى قىزىقتى ەكەن, ءوندىرىس قانداي اۋقىمدى! - دەدى الان قۇرمانعاليەۆ. - ءارتۇرلى جابدىقتار وتە كوپ ەكەن, بۇل دەگەنىڭىز – زور قۋات قوي! سولاي بولا تۇرا, مەن ءتىپتى تسەحتاعى الاڭدا تۇرعانىمدا دا ءوزىمدى تولىق قاۋىپسىز سەزىندىم.
باس ديرەكتور قوناقتارعا كاسىپورىندارداعى قاۋىپسىزدىك – كومپانيانىڭ باسىم باعىتى ەكەنىن, وعان ءوندىرىستى جاڭعىرتۋ جانە قاۋىپسىز تەحنولوگيالاردى ەنگىزۋ ارقىلى قول جەتكىزىلەتىنىن ايتتى.
ۆلاديمير يابلونسكي مەن اتاقتى سپورتشىلار كومبيناتقا ساپاردان بەلگى رەتىندە وزدەرىنىڭ قولتاڭبالارىن قالدىرعان تەننيس راكەتكالارىمەن الماستى.
كومپانيانىڭ باس ديرەكتورى قوناقتارعا ەستەلىك سىيلىقتار مەن مەدالدار تابىس ەتتى. قالىپتاسقان ءداستۇر بويىنشا الان قۇرمانعاليەۆ پەن ەلميرا اليەۆا كومپانيانىڭ قۇرمەتتى قوناقتار كىتابىنا جازبا قالدىردى.
ۆلاديمير يابلونسكيدىڭ ۇستەل تەننيسىنەن قازاقستان ۇلتتىق قۇراماسىنىڭ باس باپكەرىن جاقىندا بولعان مەرەيتويىمەن قۇتتىقتاۋى ەلميرا اليەۆا ءۇشىن جاعىمدى توسىنسىي بولدى.
سودان كەيىن مەيماندار بيىل العاش رەت وتكىزىلىپ وتىرعان «ارسەلورميتتال تەمىرتاۋ» اق باس ديرەكتورىنىڭ كۋبوگى ءۇشىن ۇستەل تەننيسىنەن مەتاللۋرگتەر چەمپيوناتىنىڭ سالتاناتتى اشىلۋىنا قاتىستى. ءتىپتى چەمپيون مەن باس ديرەكتور ءوزارا شەبەرلىك سىناسىپ تا كوردى.
«ارسەلورميتتال تەمىرتاۋ» اق قىزمەتكەرلەرى سپورتتى جاي عانا جاقسى كورمەيدى – ونىمەن ءبارى دەرلىك اينالىسادى. مەتاللۋرگتەر اراسىندا چەمپيوناتتار مەن تۋرنيرلەر وتكىزۋ يگى داستۇرگە اينالعان.