شاتتىققا تولى بىرلىك كۇنى

­­­­­­­­­وسى مەيرامعا وراي ساياباققا ارنايى ات باسىن بۇرعان قالا باسشىسى مۇرات ايتەنوۆ قالا تۇرعىندارىمەن جۇزدەسىپ, ارقا-جارقا كوڭىل كۇيدە وتىرعان حالىققا ءوزىنىڭ جۇرەكجاردى لەبىزىن ءبىلدىردى.

«بارشاڭىزدى بۇگىنگى 1 مامىر – قا­زاق­ستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن! جۋىردا عانا قازاقستان حالقى اسسامبلەياسىنىڭ ءحححىى سەسسياسى وتكەنىن بىلەسىزدەر. وندا مەملەكەت باسشىسى قاسىم-جومارت توقاەۆ حالىق­تىڭ بىرلىگى بەكەم بولسا, ەكونوميكالىق دامۋ, بەيبىتشىلىك پەن تۇراقتىلىق بار ەكەنىن ايتقان ەدى. سوندىقتان ەلىمىزدە ءومىر ءسۇرىپ جاتقان بارلىق ەتنوس وكىلدەرى وسى قاعيدانى جەتە تۇسىنگەندىكتەن ءوز بولاشاعىن قا­زاقستانمەن بايلانىستىرادى. جانە ەڭ باستى قۋانارلىعى تۋعان ەلدىڭ وركەندەۋى جولىندا ۇلتقا, دىنگە, ناسىلگە بولىنبەي ءبىر اتانىڭ بالاسىنداي, ءبىر قولدىڭ سالاسىن­داي بىرگە ايانباي ەڭبەك ەتىپ كەلەدى. سول سەبەپتى ءبىزدىڭ جالعىز وتا­نىمىز بار. ول – قازاقستان دەپ ايتامىز. ەندەشە قازاق­ستاننىڭ شۋاق شاشقان بەيبىت كۇندەرى ماڭ­گى بولسىن, شاتتىققا تولى بىرلىك كۇنى بارشا­مىزعا قۇتتى بولسىن!» دەدى مۇرات دۇيسەنبەك ۇلى.

ءوز كەزەگىندە ساياباققا جينالعان كوپ­شىلىك «بىرلىگىمىز جاراسقان» ءانىن قوسىلا شىرقادى. سودان سوڭ حورەو­گرافيالىق قويىلىممەن باستاۋ العان مەرەكەلىك كونتسەرتتى تاماشالاپ, دۋماندى كەشتىڭ قىزىعىنا باتتى. وسىناۋ مەرەكەلىك كونتسەرت بارىسىندا ءتۇرلى ەتنوس وكىلدەرى وزدەرىنىڭ ۇلتتىق ءانى مەن بيىنەن شاشۋ شاشتى. وسىنداي قىزىقتى شاقتا كونتسەرتتىڭ كورىگىن ونەرپازدارمەن بىرگە قىزدىرعان كورەرمەندەر دە تابىلدى. سولاردىڭ اراسىندا ورىس حالقىنىڭ ءانى شىرقالعاندا اسەم ىرعاقپەن تەربەتىلىپ, ساحنا تورىنەن ءبىر-اق شىققان كىپ-كىشكەنتاي قىز ارينا تسيپيحينا ءوزىنىڭ مىڭ بۇرالا بيلەگەن بيىمەن كوپشىلىكتى تامساندىردى. التى جاستاعى شىمكەنتتىك بالعىن اناسىمەن بىرگە بۇگىنگى مەرەكەلىك باعدارلامانى تاماشالاۋعا كەلگەن ەكەن.

«1 مامىر – قازاقستان حالقى بىرلىگى كۇنىن ەرەكشە جاقسى كورەمىز. جىل سايىن­ اسىعا توسىپ وتىرامىز. ويتكەنى وسىناۋ مەرەكەدە كوكتەمنىڭ شۋاعى جاندى جىلىتسا, ءار ۇلت وكىلدەرىنىڭ ءداستۇرىن, تۇرمىس سالتى مەن باي اسحاناسىنان ءدام اۋىز تيۋگە بولادى. سول ءۇشىن دە وسى مەيرام ءبىز ءۇشىن – وتە ىستىق. ال ساياباقتا كەرەمەت كونتسەرت ءوتىپ جاتىر. وسىناۋ شاتتىقتى كوڭىل-كۇي سىيلاعانى ءۇشىن كونتسەرتتى ۇيىمداستىرۋشىلارعا مىڭ العىس! ال كىشكەنتاي قىزىم ادەمى ءان قويىلسا بولدى, دەرەۋ اياق-قولى قيمىلداپ بيلەي جونەلەدى. بالكىم وسكەندە ءبيشى بولار. ورىستىڭ پلياسكاسىنا, قازاقتىڭ توي اندەرى مەن ءتۇرلى ۇلتتىڭ كوڭىلدى اندەرىنە بيلەگەندى ۇناتادى» دەدى كىشكەنتاي قىز ارينانىڭ اناسى نادەجدا.

مەرەكەلىك كەشتە شىمكەنت قالا­لىق مادەنيەت ءۇيى ونەرپازدارى جانە «ايگولەك», «شامسينۋر»,«ەركەتاي», «قاراكوز», «بي تاڭى», «قازىنا» بي انسامبلدەرى جانە «MEIR» بالەت مەك­تەبى مەن «سۆەتوچ» حورى ءوز ونەرلەرىن ورتاعا پاش ەتتى. دۋماندى كەشتىڭ ەڭ ءبىر ەستە قالارلىق ءساتى كوپشىلىكپەن بىرگە «قازاقستان» ءانى شىرقالىپ, اسپان­عا 500 شار مەن 200 كوگەرشىن ۇشى­رىلدى. سونىمەن قاتار ءدال وسى كۇنى «اربات» الاڭىندا «كوگەرشىندەر» كور­مەسى مەن مەرەكەلىك ەتنوكورمە ۇيىم­داس­تىرىلدى. مەگاپوليستىڭ تاعى ءبىر سايالى مەكەنى «اباي» ساياباعىندا دا مەرە­كەلىك كونتسەرت قويىلدى. ال زووباقتا بۇلدىرشىندەر «تسيرك» ارتىستەرىنىڭ ارنايى نومىرلەرىن تاماشالادى. كوڭىلدى ءىس-شارا قالانىڭ «ورتالىق» ساياباعىندا دا جالعاسىن تاۋىپ, قۋىرشاق تەاترىنىڭ قويىلىمى ساحنالاندى. قۋىرشاقتار سومداعان ەرتەگىلەر الەمىن تاماشالاۋعا بۇلدىرشىندەر كوپ جينالدى.

جالپى, قالامىزداعى تاريحى تەرەڭ ونەر ورداسى شىمكەنت قالالىق قۋىر­شاق جانە جاسوسپىرىمدەر تەاترى سانالادى. ونەر ۇجىمى 1 مامىر – قازاقستان حال­قى­نىڭ بىرلىگى كۇنىنە وراي, ورتالىق سايا­باقتا بالالارعا ارناپ «تۋعان كۇن» اتتى قويىلىمىن ۇسىندى. تەاتر كورەرمەنىن قۋانتۋدان, تاڭعجايىپ دۇنيەلەر قويۋدان جالىققان ەمەس. وسىلايشا ۇنەمى ىزدە­نىستە جۇرەتىن تەاتر ۇجىمىنىڭ سايا­باقتاعى ساحنا­لىق قويىلىمى دا ەرەكشە بول­دى. م.ءاباي­دىلدانىڭ شىعارماسى جەلى­سىندە ساحنا­لانعان سپەكتاكل ءسوز جوق كوپشىلىكتىڭ كوڭىلىنەن شىقتى. قويىلىم مازمۇنىندا اڭدار ارقىلى بالالاردى وتانسۇيگىشتىككە, باۋىرمالدىققا, دوس­تىققا باۋلۋ تاربيەسى جاتىر. بالالاردى وسىلاي كىشكەنتايىنان مەيىرىمدى, ءبىر-بىرىنە باۋىرمال ەتىپ وسىرسە, البەتتە ەل­دىڭ بولاشاعى دا جارقىن بولادى دەگەن ءسوز. قازىرگى ۇلتارالىق تاتۋلىقتىڭ تىرەگى مىنە وسىنداي شاعارمالار ارقىلى دارىپتەلۋى ءتيىس-اق.

ءبىر ايتا كەتەرلىگى اشىق اسپان استىندا قويىلعان قويىلىم كورەرمەندەرى نەگىزىنەن كىشكەنتاي بۇلدىرشىندەرى بولعانىمەن, سپەكتاكل قىزىقتى سيۋجە­تىمەن ەرەسەكتەردى دە باۋراپ الدى. تەاتر باسشىسى سامات التايدىڭ ايتۋىنشا, ونەر ورداسى وسىلاي قالا ساياباق­تارىندا ءجيى قويىلىم قويادى ەكەن.

«بالالارىمىز تەاتردا عانا قويى­­لىم تاماشالامايدى. تەاتر اكتەرلەرلەرى قالا ماڭىنداعى اۋىلدارعا بارىپ, قويىلىم قويىپ قايتۋدى داستۇرگە اينال­دىرعان. بۇل دا بولسا بالالاردى سەر­گىتۋدىڭ ءبىر جولى. جانە تاربيەلىك ءمانى بار ءىس دەپ سانايمىن, دەدى تەاتر جەتەكشىسى.

بۇدان بولەك, تەاتر ۇجىمى «اربات» دەمالىس ايماعىندا دا كىشكەنتاي كورەر­مەندەرگە ارناپ ساحنالىق قويىلىم تاماشالاتتى.

راسىندا دا تاريحتىڭ وزىنە قاراساق, تەك ساياسي ءومىرى تۇراقتى بولعان ەل­دەر­دىڭ دامىپ, ءوسىپ-وركەندەگىنىن كورە­مىز. الىسقا بارماي-اق بۇگىنگى الەم كەل­بەتىندە ىشكى الاۋىزدىقتان ىلگەرى جىلجي الماي وتىر­عان كەيبىر مەملەكەتتەردى بايقايمىز. سوندىق­تان ءبىزدىڭ ەلدىڭ تىنىش تا بەيبىت, بەرەكەلى ومىرىنە تاۋبە دەۋ كەرەك. بىرلىكتى ساقتاۋ ءوز قولىمىزدا. ءبارىمىز تاتۋ-ءتاتتى ءومىر سۇرسەك, توننىڭ ىشكى باۋىنداي بىرلىگىمىز بەكەم بولسا, ءبىزدى سىرتتان دا ىشتەن دە جاۋ دا داۋ دا الا قويماس. ەڭ باستىسى وسى قۇندى­لىقتى وسكەلەڭ ۇرپاققا ۇعىندىرۋ كەرەك دەدى مەرەكەگە جينالعان كوپشىلىك قاۋىم.