قىتاي مەن قازاقستان اراسىنداعى بايلانىستى دامىتۋ ماقساتىندا ۆيزاسىز رەجيم ەنگىزۋ جوسپارلانىپ جاتىر. بىراق كوپشىلىك بۇل شەشىمدى قىزۋ تالقىلاپ, قارسى ەكەنىن بىلدىرگەن. وسىعان قاتىستى سىرتقى ىستەر مينيسترلىگىنىڭ رەسمي وكىلى ايبەك سمادياروۆ پىكىر ءبىلدىردى, دەپ حابارلايدى Egemen.kz.
ەكى ەل اراسىندا ءتۋريزمدى دامىتۋ ماسەلەلەرى 8 جىل بۇرىن باستالىپ, قولعا الىنعان. ناتيجەسىندە, قىتاي ازاماتتارىنا ۋاقىتشا ۆيزاسىز رەجىمى ەنگىزىلگەن.
«سوڭعى كەزدەرى قازاقستان مەن قىتاي اراسىندا ۆيزادان بوساتۋ تۋرالى كەلىسىمگە قارسى وي-پىكىرلەر ءوربىپ جاتىر. ول كەلىسىمگە ءالى قول قويىلمادى. قىتاي ازاماتتارى وتكەن جىلدىڭ جازىنان باستاپ 14 كۇنگە ۆيزاسىز كەلە الادى. ەندى 14 كۇنگە كەلەتىن ازاماتتار, 30 كۇنگە كەلە الادى. بۇل - ءبىر. قازاقستان ازاماتتارى تۋرا سول سياقتى قىتايدا ۆيزاسىز 30 كۇن بولا الادى. بۇل كەلىسىمگە قول قويىلعان جاعدايدا جۇزەگە اسادى. بۇل تۋريستىك نەمەسە ىسكەرلىك ساپار عانا بولا الادى. ەكى تاراپتىڭ ازاماتتارى دا جۇمىس ىستەي المايدى. بۇل رەجيمدى بۇزاتىن بولسا, ولار جازالانادى», دەدى سمادياروۆ.
ال ساراپشىلاردىڭ پايىمىنشا, بۇل شىن مانىندە تۋريستەردىڭ كەلۋىن ارتتىرىپ, تۋريستىك ەكونوميكانى دامىتادى. سونداي-اق شەتەل ينۆەستورلارى مەن بيزنەسمەندەرىنە قولايلى جاعداي تۋعىزادى.
قازاقستان - قىتايدىڭ نەگىزگى ساۋدا سەرىكتەسى. ەكى ەل اراسىنداعى تاۋار اينالىمى 24 ملرد اقش دوللارىنان اسادى.
ءسىم مالىمەتىنشە, ۆيزاسىز رەجىم ساۋدا قارىم-قاتىناسىن ودان ءارى جانداندىرۋعا مۇمكىندىك بەرەدى.
«ۆيزاسىز رەجىم قازاقستان مەن قىتاي اراسىنداعى جۇك كولىگىنىڭ جۇرگىزۋشىلەرىنە ۆيزاسىز كىرۋگە مۇمكىندىك تۋعىزادى. بۇل ءبىراز ماسەلەنى شەشەدى. قوس ەل اراسىنداعى ساۋدا-ساتتىق ءوسىپ, وڭىرارالىق ىنتىماقتاستىق نىعايادى, ەكونوميكامىزعا اسەر ەتەدى. ەگەر شەكارانى جاۋىپ تاستاساق, ەففەكت باسقاشا بولادى. شەكارانى اشقاننان كەيىن جۇمىس ىستەۋىمىز كەرەك. قىتاي – الپاۋىت ەكونوميكاسى بار مەملەكەت. ورتالىق ازيادا قىتايمەن ۆيزاسىز رەجىم ورناتقان جالعىز مەملەكەتپىز. مۇنى ءبىز ديپلوماتيالىق جەڭىس دەپ ەسەپتەيمىز», دەيدى ول.
ايبەك سمادياروۆ كەلىسىمگە مامىر ايىندا قول قويىلاتىنىن ايتتى.