1 مامىر – حالقىمىز ءۇشىن ماڭىزى مەن ءمانى تۇرعىسىنان ەڭ باستى مەرەكەلەردىڭ ءبىرى. ويتكەنى قوعام ومىرىندەگى كەز كەلگەن ءىستىڭ بەرەكەلى دە باياندى بولۋى اۋىزبىرشىلىك پەن ىنتىماققا كەلىپ تىرەلەدى. ونسىز جاسامپازدىق تا, ونەر دە, مادەنيەت تە, ءتىل دە, ءدىن دە ومىرشەڭ بولماس ەدى. ءتىپتى ىنتىماق پەن كەلىسىمسىز عاسىرلار بويى ارمانداعان تاۋەلسىزدىگىمىزدى دە, وتانىمىزدىڭ كەلەشەگىن دە باياندى قىلا الماس ەدىك. ءبىز وسى باقىتىمىز بەن قۇندىلىقتارىمىزدىڭ بارلىعىنا باس قوسقان بىرلىگىمىز بەن تىزە قوسقان تىرلىگىمىزدىڭ ارقاسىندا جەتتىك.
«بايلىق – بايلىق ەمەس, بىرلىك – بايلىق» دەگەن ۇستانىمدى تۋ كوتەرگەن حالقىمىز تاۋەلسىزدىككە قول جەتكىزگەن كۇننەن باستاپ ۇلتارالىق جانە دىنارالىق تاتۋلىق پەن تولەرانتتىلىقتى ەل دامۋىنىڭ باستى جەلكەنى قىلدى. كەلىسىم جوق جەردە كەلەشەك, بىرلىك جوق جەردە بولاشاق بولمايتىنىن ۇعىنعان جۇرت ءۇشىن بۇدان وزگە جول دا, باعىت تا جوق ەدى. قوناقجاي قازاق جەرىن مەكەندەگەن ءاربىر ۇلت ءوزىنىڭ ءتىلى مەن ءدىنىن, مادەنيەتى مەن ءداستۇرىن ەركىن ۇستانىپ, زامان اعىمىنا ساي دامىتۋعا العاشقى كۇننەن مۇمكىندىك الدى.
كۇنى كەشە 1 مامىر مەرەكەسى قارساڭىندا قازاقستان حالقى اسسامبلەياسىنىڭ «ادىلەتتى قازاقستان: بىرلىك, تۇراقتىلىق, دامۋ» دەگەن اتاۋمەن وتكەن ءحححىى سەسسياسىندا مەملەكەت باسشىسى قاسىم-جومارت توقاەۆ ەلىمىزدىڭ ىنتىماق پەن كەلىسىمنىڭ ارقاسىندا جەتكەن تابىستارى مەن بەيبىتشىلىگىن تاعى ءبىر شەگەلەپ ايتتى.
ء «بىز ءبارىمىز – ءبىر وتباسىمىز. بۇل – ارتىق ايتقاندىق ەمەس. بۇل – ءبىزدىڭ شىنايى بولمىسىمىز», دەگەن مەملەكەت باسشىسى ەل حالقىنىڭ بىرلىگىن ارتتىرىپ, اۋىزبىرشىلىگىن نىعايتاتىن فاكتورلاردىڭ ءبىرى – مەملەكەتتىك ءتىل ەكەنىن دە تاعى ءبىر ەسكە سالدى.
«بارلىق ازاماتتىڭ مەملەكەتتىك ءتىلدى مەڭگەرۋ ماسەلەسى ساياساتىمىزدىڭ ستراتەگيالىق باعىتى بولىپ قالا بەرەدى. قازاق ءتىلى – ازاماتتىق ينتەگراتسيانىڭ ءتيىمدى قۇرالى, مادەني-رۋحاني تۇتاستىقتىڭ جارقىن كورىنىسى. مەملەكەتتىك ءتىلدى, اسىرەسە انا ءتىلىن, ياعني قازاق ءتىلىن ءبىلۋ – قانداي دا ءبىر ازاماتتىڭ مادەني ورەسى, ازاماتتىق جاۋاپكەرشىلىگى قانشالىقتى بيىك ەكەنىن بىلدىرەدى. سونداي-اق قانشالىقتى پاتريوت ەكەنىن كورسەتەدى», دەپ اتاپ كورسەتتى پرەزيدەنت.
بۇگىندە قازاق ەلىن الەم جۇرتشىلىعى «بەيبىتشىلىك بەسىگى» رەتىندە تانيتىنى بەسەنەدەن بەلگىلى. ءبىزدىڭ مىندەتىمىز – وسى تاتۋلىعىمىزدىڭ تۇنىعىن لايلاماي, تۇراقتىلىعىن بۇزباي, ودان ءارى نىعايتۋ, بىرلىگىمىزدى ارتتىرا بەرۋ. 1 مامىر سەكىلدى ەلدىك ماڭىزى بار مەرەكەلەردىڭ ارتىقشىلىعى مەن قۇندىلىعى وسىندايدا كورىنسە كەرەك.