الماتى وبلىسىندا 35 جاستاعى جۇمىسشىنىڭ اياعى بەتون ارالاستىرعىشتا قىسىلىپ قالعان, دەپ حابارلايدى Egemen.kz.
وقىس وقيعا كەشە ساعات 16:52-دە ىلە اۋدانىنداعى گەيت سيتي ىقشام اۋدانىندا بولعان. بەلگىلى بولعانداي, قۇمدى تيەۋ جۇمىستارى كەزىندە 35 جاستاعى جۇمىسشىنىڭ وڭ اياعى بەتون ارالاستىرعىشتا قىسىلىپ قالعان.
رەسپۋبليكالىق جەدەل-قۇتقارۋ جاساعىنىڭ 5 قۇتقارۋشىدان قۇرىلعان جەدەل توبى مەن قوناەۆ قالاسى جەدەل-قۇتقارۋ جاساعىنىڭ 4 قۇتقارۋشىسى دەرەۋ وقيعا ورنىنا باردى.
«قۇتقارۋشىلار بولگاركانىڭ كومەگىمەن زارداپ شەككەن ەر ادامنىڭ قىسىلعان اياعىن بوساتتى. ونىڭ اياعى سىنىپ كەتكەن ەكەن. قۇتقارۋشىلار شوك العان ەر ادامدى جەدەل جاردەم بريگاداسىنا تاپسىردى. جەدەل جاردەم بريگاداسى ونى بىردەن اۋرۋحاناعا الىپ كەتتى», دەلىنگەن توتەنشە جاعدايلار مينيسترلىگى تاراتقان اقپاراتتا.