ەنەرگەتيكا مينيسترلىگى قازاقستان رەسپۋبليكاسىنىڭ ىشكى نارىعىندا تاۋارلىق گازدى كوتەرمە ساۋدادا وتكىزۋدىڭ شەكتى باعالارىن بەكىتۋ تۋرالى بۇيرىقتىڭ جوباسىن دايىندادى, وعان سايكەس شەكتى كوتەرمە باعالار ورتا ەسەپپەن 15 % - عا وسەدى, دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
قازىرگى ۋاقىتتا قازاقستاندا تاۋارلىق گازدىڭ ورتاشا بولشەك ساۋدا باعاسى تۇرعىندار ءۇشىن 22,06 تەڭگە/م3 قۇرايدى. تاۋارلىق گازعا تۇرعىندارعا ارنالعان شەكتى كوتەرمە باعالار 15%-عا وسكەن كەزدە قازاقستانداعى بولشەك ساۋدا باعالار وڭىرگە بايلانىستى 1,1-دەن 3,87 تەڭگە/م3-گە دەيىن (ققس-تى ەسەپتەمەگەندە) وسەدى, ورتاشا ءوسىم شامامەن 2,7 تەڭگە/م3 قۇرايدى (ققس ەسەپتەمەگەندە).
تاۋارلىق گازعا شەكتى كوتەرمە باعالاردىڭ ءوسۋى تاۋارلىق گازدى جەتكىزۋ قۇنىنىڭ وسۋىنە, تاۋارلىق گاز ءوندىرىسىنىڭ 2019 جىلى 33,1 ملرد م3-تەن 2022 جىلى 27,8 ملرد م3-كە دەيىن تومەندەۋىنە جانە ىشكى نارىقتا تاۋارلىق گازدى تۇتىنۋدىڭ 2019 جىلى 15 ملرد م3-تەن 2022 جىلدىڭ قورىتىندىسى بويىنشا 19,3 ملرد م3-كە دەيىن وسۋىنە بايلانىستى.
بۇيرىقتىڭ جوباسى قازاقستان رەسپۋبليكاسىنىڭ وڭىرلەرىن گازبەن جابدىقتاۋدىڭ ەكونوميكالىق جانە الەۋمەتتىك جاعدايلارىن ەسكەرە وتىرىپ, ءاربىر وبلىس, رەسپۋبليكالىق ماڭىزى بار قالا, استانا ءۇشىن جىلدارعا بولە وتىرىپ, 2023 جىلعى 1 شىلدەدەن باستاپ 2028 جىلعى 30 ماۋسىمدى قوسا العان كەزەڭگە ىشكى نارىقتا تاۋارلىق گازدى كوتەرمە ساۋدادا وتكىزۋدىڭ شەكتى باعالارىن بەلگىلەۋدى كوزدەيدى. قازاقستان رەسپۋبليكاسىنىڭ زاڭناماسىنا سايكەس شەكتى كوتەرمە باعالاردىڭ ءوسۋى ءبىر كۇنتىزبەلىك جىل ىشىندە 15%-دان اسپاۋعا ءتيىس.
قۇجات «گاز جانە گازبەن جابدىقتاۋ تۋرالى» قازاقستان رەسپۋبليكاسى زاڭى 20-بابىنىڭ 3-تارماعىنا سايكەس 15 مامىردان كەشىكتىرىلمەي بەكىتىلەدى.