پرەمەر-مينيستر ءاليحان سمايىلوۆ جەمقورلاردان تاركىلەنگەن اقشانى مەكتەپ قۇرىلىسىنا جۇمسالاتىنى جونىندەگى قاۋلىعا قول قويدى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى حالىققا جولداۋىندا جەمقورلاردان الىنعان قاراجاتتى ءبىلىم بەرۋ ينفراقۇرىلىمىن قولداۋعا باعىتتاۋدى تاپسىرعان ەدى.
«جالپى, مەكتەپ سالۋ ۇكىمەت پەن اكىمدىكتەر ءۇشىن باستى مىندەتتەردىڭ ءبىرى بولۋى كەرەك. جەمقورلار سوتتالعاندا, ولاردىڭ زاڭسىز تاپقان قارجىسى مەملەكەتكە ءوتىپ, تۇگەلدەي مەكتەپ قۇرىلىسىنا جۇمسالۋعا ءتيىس», دەدى قاسىم-جومارت توقاەۆ.
قر پرەمەر-ءمينيسترىنىڭ ءباسپاسوز قىزمەتىنىڭ مالىمەتىنە سۇيەنسەك, بۇگىنگى تاڭدا ءبىلىم بەرۋ ينفراقۇرىلىمىن قولداۋ قورىنا 121,7 ملرد تەڭگە ءتۇستى. سونىمەن قاتار ەل باسشىلىعىنىڭ تاپسىرماسى بويىنشا رەسپۋبليكالىق بيۋدجەت كوميسسياسى 106,7 ملرد تەڭگەنى قۇرايتىن 72 جوبانى قولدادى. اتاپ ايتقاندا, 94,1 ملرد تەڭگە 85 مىڭ ورىندىق 69 مەكتەپتىڭ قۇرىلىسىن اياقتاۋعا جانە تاعى 12,6 ملرد تەڭگە 3 جاڭا نىساننىڭ (ەكى اۋىسىمدا 1400 ورىنعا ارنالعان 2 مەكتەپ جانە 200 ورىندىق مەكتەپ-ينتەرنات) قۇرىلىسىن اياقتاۋعا جوسپارلانعان.